2 Samiɛl 13 - NYANMIƐN NDƐ'N 1998

Amnɔn nin Tamar be ndɛ'n

¹ I sin'n, sa ng'ɔ juli'n yɛ: David i wa Absalɔm i niaan bla kun o lɛ, ɔ ti klanman kpa, be flɛ i kɛ Tamar. Kannzu David i wa Amnɔn klo i sa.

² I niaan bla Tamar dunman nun ti ɔ la-a, ɔ lafi-man, ɔ'a tɔ i ti tukpacɛ. Amnɔn wun-man kɛ ɔ ko yo nan ɔ'a nyɛn i-ɔ, afin ɔ tɛ yo talua mɔnnɛn.

³ Amnɔn lɛ i janvuɛ kun, David i niaan Simea i wa-a. Be flɛ i kɛ Zɔnadab, ɔ si gblɛ kpɛ kpa.

⁴ Zɔnadab usɛli i kɛ: «?Ɔ bɔbɔ bɔ a ti famiɛn wa'n, ɔ yo sɛ ti yɛ kɛ aliɛ'n ´cɛn b'ɔ ´san kɔ'n, wuun a ´yo kokloo sɔ-ɔ? Kan sa'n kle min.» Amnɔn tɛli i su kɛ: «N klo min niaan Absalɔm i niaan bla Tamar.»

⁵ Yɛ Zɔnadab seli i kɛ: «La ɔ bɛ'n su nan yo kɛ ɔ wunnɛn yo wɔ ya sa. Sɛ ɔ́ si ba ɔ yako yolɛ'n, se i kɛ: ‹N klo kɛ min niaan bla Tamar wa yo like kan man min man n di. Man ɔ wa tɔn i min nyrun wa nan i bɔbɔ fa man min man n di.› »

⁶ Yɛ Amnɔn lali-ɔ. Ɔ yoli kɛ i wunnɛn yo i ya sa. Famiɛn'n bali i yako yolɛ. Yɛ Amnɔn seli i kɛ: «N klo kɛ min niaan bla Tamar bla wa tɔn gato nnyɔn, nan i bɔbɔ fa man min man n di.»

⁷ Yɛ David man be ko seli Tamar sua lɔ kɛ ɔ wɔ i niaan bian Amnɔn i sua lɔ ko tɔn like mɛn i-ɔ.

⁸ Yɛ Tamar ɔli i niaan bian Amnɔn i sua lɔ-ɔ, kɛ ɔ ´kɔ'n wuun ɔ'a la. Tamar guali sanmlɛn'n nun nzue, ɔ fɔtɔli. Ɔ tɔnnin gato'n i nyrun lɛ, gato'n beli.

⁹ Kpɛkuun ɔ yili gato'n sɛ nga be fa tɔn'n nun. Ɔ fa mɛnnin i, kpɛkuun i waan ɔ di-man. I waan: «Man sran'm be kwlaa be fite.» Yɛ sran'm be kwlaa be fiteli-ɔ.

¹⁰ Yɛ ɔ seli Tamar kɛ: «Fa gato'n bla sua ba'n nun wa man n di.» Yɛ Tamar fali gato ng'ɔ yoli'n ɔ fa ko mannin i niaan bian Amnɔn i sua ba'n nun lɔ-ɔ.

¹¹ Kɛ ɔ ´fa mɛn i kɛ ɔ `di'n yɛ ɔ trɛli i-ɔ. I waan: «E `la, min niaan bla.»

¹² Tamar seli kɛ: «Aa! Min niaan, nán mian min kɛ a nin min la. Be yo-man nga Izraɛl wa. Nán bo tete nga .

¹³ ?N ´fɛ i sɔ nyannzuɛn liɛ'n n ´kɔ nin? Ɔ kusu sɛ a yo sɔ'n, a ´kaci finfinfuɛ Izraɛl mɛn'n nun. N ´srɛ wɔ kpa ti-ɔ, ɔ li kan kle famiɛn'n. Ɔ su se-man kɛ ɔ fa-man min man-man wɔ.»

¹⁴ Amnɔn ɔ'a fɛ-mɛn i su ɔ'a tie-man nga Tamar kannin'n. Ɔ miɛnnin i nan ɔ nin i b'a la kekle nun,

¹⁵ kpɛkuun ɔ wa kpɔli i tɛtɛ kpa. Kpɔlɛ sɔ'n, i dan trali klolɛ nga ɔ dun mmua kloli i'n. Yɛ ɔ seli i kɛ: «Sin fite.»

¹⁶ Yɛ Tamar waan: «Nán yo sɔ, afin sɛ a fuan min'n, i sɔ sa tɛ liɛ'n tra nga a dun mmua yoli min'n.»

¹⁷ Sanngɛ Amnɔn ɔ'a tie-man. Ɔ flɛli gbanflɛn nga ɔ di i junman'n nan ɔ'a se i kɛ: «Fuan bla nga man ɔ wɔ, nán n wun i, ɔ `fite nan nyin anuan'n i sin.»

¹⁸ Gbanflɛn'n fɛli i fiteli yɛ ɔ toli anuan'n nun-ɔn. Kɛ ɔ ´yo sɔ'n, wuun Tamar i tralɛ dan jaja nun'n wo i wun, afin yɛ ɔ ti famiɛn'm bé mma mmla nga be tɛ yo talua mɔnnɛn'm bé tralɛ-ɔ.

¹⁹ Tamar fali nzuɛn guɛli i ti'n su. Ɔ titili i tralɛ tɛnndɛn jaja nun'n nun, kpɛkuun ɔ fɛ i sa guɛli i ti, ɔ ´kɔ'n, wuun ɔ ´sun.

²⁰ I niaan bian Absalɔm usɛli i kɛ: «?Ɔ niaan bian Amnɔn nin wɔ lali? Min niaan bla muan ɔ́ nuan, ɔ niaan-an! Nán fa sa sɔ'n yo ndɛ kan.» Yɛ Tamar fɛli i awlaboɛ'n trannin i niaan bian Absalɔm awlo lɔ-ɔ.

²¹ Kɛ famiɛn David tili sa sɔ'n, ɔ fali ya dan.

²² Kɛ ɔ fin lɛ'n, Absalɔm nin Amnɔn b'a ijɔ-man kun. I nyin cili i, afin ɔ yoli i niaan bla'n i finfin.

Absalɔm tuli i klunngbɔ

²³ Kɛ ɔ yoli sɔ'n, i afuɛ nnyɔn sinnin. Le kun bua ndrɛ kpɛfuɛ'm be ɔli Absalɔm sin Baal-Azɔr lɔ, lika sɔ'n mantan Efraim. Yɛ Absalɔm flɛli famiɛn'n i mma'm be kwlaa.

²⁴ Absalɔm ko toli David. I waan: «Nannan, bua ndrɛ kpɛfuɛ'm b'a ba mín sin lɔ, yɛ n waan n ´se wɔ nan a nin ɔ mantanfuɛ'm be bla min wun lɔ.»

²⁵ Yɛ famiɛn'n seli i kɛ: «Nán man ɔ yo sɔ mín wa, sɛ e kwlakwla e ko gua ɔ́ sa su ɔklɔɔ sɔ'n, ɔ ´yo ɔ su trɔ.» Ɔ kɛnnin lelele famiɛn'n ɔ'a kplin-man su. Nan famiɛn'n ɔ'a yrɛ i nguan.

²⁶ Absalɔm waan: «Yoo, sɛ ɔ waan a kɔ-man'n, man min niaan bian Amnɔn i atin man ɔ ko sunman ye.» Famiɛn'n usɛli i kɛ: «?Ɔ `ko yo nzu ɔ lika lɔ?»

²⁷ Absalɔm srɛli i lelele yɛ famiɛn'n man i mma'm be kwlaa be ɔli-ɔ. Amnɔn ɔli wie.

²⁸ Absalɔm seli i gbanflɛn'm be kɛ: «Amun `nian Amnɔn su kpa, sɛ nzan'n ti i kpa'n, kɛ n ´se kɛ: ‹Amun `kun Amnɔn,› kpɛkuun amun `kun i. M bɔbɔ min dunman nun amun `jran kekle, amun `tra amun anwlɛn. Nán srɛ kun amun.»

²⁹ Absalɔm i gbanflɛn'm be niannin nga be min'n kan kleli be'n su be yoli. Kpɛkuun famiɛn'n i mma'm be kwlaa be fuli nnɛn bɔ be flɛ i milɛ'n be su, nan b'a wanndi b'a ɔ.

³⁰ Kɛ be ´kɔ'n, bɔ be tɛ o atin nun'n, wuun David ɔ'a dun mmua ɔ'a ti i lɔ lalaa kɛ: «Absalɔm ɔ'a kun famiɛn'n i mma'm be kwlaa, kun sa ɔ'a ka-man lɛ.»

³¹ Yɛ famiɛn'n jasoli-ɔ, ɔ titili i wun tralɛ'm be nun, kpɛkuun yɛ ɔ lali asiɛ wun-ɔn. I mantanfuɛ'm be kwlaa be o i wun lɛ. Be titili be wun tralɛ'm be nun wie.

³² Nan David i niaan Simea i wa Zɔnadab ɔ'a se kɛ: «Nannan nan, nán bu i kɛ be kunnin ɔ mma yasua'm be kwlaa. Amnɔn kunngba yɛ ɔ wuli-ɔ. Kɛ ɔ fin cɛn b'ɔ nin Absalɔm i niaan bla Tamar be lali kekle nun'n, yɛ Absalɔm fuali kɛ ɔ ´kun i-ɔ.

³³ Famiɛn, , nán ɔ wa yasua'm be kwlaa yɛ be wuli-ɔ. Amnɔn kunngba yɛ ɔ wuli-ɔ.»

³⁴ Kɛ ɔ yoli sɔ'n, Absalɔm wanndili. Gbanflɛn nga ɔ nian klɔ'n su'n ɔ ´nian-an, sran kaka kpa be fin Ɔrɔnfuɛ'm be atin'n ng'ɔ o kpɔlɛ'n su lɔ'n i nun lɔ be su ba.

³⁵ Yɛ Zɔnadab seli famiɛn'n kɛ: «Nannan, ɔ mma mun yɛ be ´ba yɛ. Nga n kannin'n kpɛnnin su.»

³⁶ I nuan'n b'ɔ ´tɔ cɛ'n, famiɛn'n i mma'm be yɛ b'a ba yɛ. Be tikeli bé ti be sunnin. Famiɛn'n nin i mantanfuɛ'm be kusu be sunnin kpa.

³⁷ Famiɛn'n sunnin i wa'n cɛn'n kwlakwlakwla. Kɛ ɔ ´yo sɔ'n, wuun Absalɔm ɔ'a wanndi ɔ'a ko talo Amiir b'ɔ ti Gesir famiɛn'n i wa Talmai.

³⁸ Absalɔm wanndi ɔli Gesir, ɔ dili afuɛ nsan lɔ.

³⁹ Ya nga famiɛn David fɛli i Absalɔm wun'n Amnɔn i wulɛ'n ti'n, ɔ kannin ase, afin i wla fili i wun.