2 Samiɛl 12 - NYANMIƐN NDƐ'N 1998

Sa ng'ɔ wa ju David i su'n, Natan ɔ'a ɔ i kan klelɛ

¹ Anannganman sunmannin Natan David wun lɔ. Ɔ ko toli i nan ɔ'a se i kɛ: «Sran nnyɔn be o klɔ kun su. Kun ti anyanbeunfuɛ, yɛ kun ti yalɛfuɛ .

² Anyanbeunfuɛ'n lɛ bua nin nannin kpanngban kpa.

³ Yalɛfuɛ'n i bua'n ti kaan kunngba cɛ. Ɔ ko toli, ɔ tɛli i ɔ nin i bɔbɔ i mma mun, be nyinnin i sa nun likawlɛ. Aliɛ ng'ɔ di'n, i wie yɛ ɔ mɛn i-ɔ. Ɔ nin i be nɔn klowa kunngba nun. Kɛ ɔ la sa'n, ɔ lɛ i i wun lɛ, ɔ yoli kɛ i wa bla sa.

⁴ Le kun aofuɛ kun wa sikeli anyanbeunfuɛ'n. Kɛ ɔ ´fa i bua nin i nannin'n wie wlɛ i tro nun'n, ɔ'a yo-mɛn i sɔ. Ɔ ko fali yalɛfuɛ'n i bua'n yɛ ɔ fa wlɛli i aofuɛ'n i tro nun-ɔn.»

⁵ David fali ya kpa bian sɔ'n wun. Ɔ seli Natan kɛ: «N kan Nyanmiɛn, sran ng'ɔ yoli i sɔ sa'n, ɔ nin wie wulɛ yɛ ɔ fata-a.

⁶ Ɔ fata kɛ ɔ fa bua nnan sie kun'n i osu aunnvuɛ b'ɔ si-man'n b'ɔ yo sa sɔ'n ti.»

⁷ Yɛ Natan seli David kɛ: «Sran sɔ'n yɛlɛ wɔ. Anannganman Izraɛl Nyanmiɛn'n waan: ‹M bɔbɔ n kpali wɔ kɛ a yo Izraɛlfuɛ'm be famiɛn, n deli wɔ Sail sa nun.

⁸ N fɛli i awlo'n m mannin wɔ, n fɛli i yi mun m mannin wɔ. N fali Izraɛl akpasua'n nin Zida akpasua'n m mannin wɔ. Sɛ nga m mannin wɔ'n ɔ ti kaan'n, n kwla uka su.

⁹ ?Yɛ ɔ yo sɛ ti yɛ a yoli min ndɛ'm be finfin, bɔ a yoli sa nga n klo-mɛn i nin-ɔn? A kunnin Iri b'ɔ ti Ɛtfuɛ'n. A yoli man Amɔnfuɛ'm be kunnin i alɛ'n nun, kpɛkuun a fɛli i yi'n yoli ɔ liɛ .

¹⁰ I sɔ'n ti, alɛ su jaso-man wɔ awlo'n nun le nan kɛ ɔ ´yo-ɔ, ɔ'a yo-ɔ, ɔ finfin bɔ a yoli min bɔ a fali Iri b'ɔ ti Ɛtfuɛ'n i yi'n yoli ɔ liɛ'n ti.

¹¹ Min wan yo, sa yalɛ nga n ´fa yi ɔ su'n, ɔ ´fin wɔ awlo'n nun. N ´fa ɔ́ yi mun ɔ nyrun lɛ, n ´fa man ɔ osufuɛ'n kun, ɔ nin be wa la wia klakla kpa'n nun.

¹² Nga a yoli i nvialiɛ nun'n, n wa yo i Izraɛlfuɛ'm be kwlaa be nyrun wia'n nun .› »

¹³ Yɛ David seli Natan kɛ: «N yoli sa tɛ Anannganman wun.» Natan tɛli David su kɛ: «Anannganman ɔ'a yaci ɔ sa sɔ'n ɔ'a cɛ wɔ . A su wu-man,

¹⁴ sanngɛ wɔ man Anannganman i kpɔfuɛ'm be yoli i finfin. I sɔ'n ti ba nga w'a wu i yɛ'n ɔ ´wu.»

¹⁵ Yɛ Natan ɔli i awlo-ɔ. Anannganman man ba nga David nin Iri i angboti'n be wuli i'n, ɔ wa tɔli tukpacɛ kekle kpa.

Bat-seba i wa'n i wie ndɛ'n

¹⁶ David srɛli Nyanmiɛn mannin bakan'n. Ɔ cili nglɛmun. Kɔnguɛ kɛ ɔ ju i sua lɔ'n, ɔ la asiɛ wun.

¹⁷ I awlo'n nun kpɛnngbɛn'm be ko seli i kɛ ɔ mɛn i wun su, sanngɛ ɔ'a kplin-man su. Ɔ nin be ɔ'a di-man like likawlɛ.

¹⁸ I le nso su'n, bakan'n wuli. David i mantanfuɛ'm be wun-man kɛ be ´yo nan b'a kan kle i kɛ ba'n wuli-ɔ. Be waan: «Kɛ bakan'n i nyin tɛ o su'n bɔbɔ'n, ndɛ nga e kan kle i'n, ɔ fa-man. ?Yɛ sɛ e se i kɛ ba'n wuli'n, ɔ su yo-mɛn i wun like?»

¹⁹ David ´nian-an, i mantanfuɛ'm b'a wɔ bé nuan ase bé su tu aswre, kpɛkuun ɔ wunnin i wlɛ kɛ ba'n ɔ'a wu. Yɛ ɔ usali be kɛ: «?Ba'n wuli?» Be tɛli su kɛ: «Ɛɛn, ɔ wuli.»

²⁰ Yɛ David jasoli nan ɔ'a wunnzin, ɔ kpakpali, yɛ ɔ wlali tralɛ uflɛ. Kpɛkuun ɔ ɔli Anannganman i sua'n nun lɔ, ɔ ko kotoli i bo. Kɛ ɔ sɛli i sin i awlo lɔ'n, i waan be `mɛn i like man ɔ di. Be mɛnnin i, ɔ dili.

²¹ I mantanfuɛ'm be usɛli i kɛ: «?Sa nga a yo i yɛ'n, i bo ti sɛ? Kɛ ba'n i nyin o su'n, a cili nglɛmun, a sunnin. Ɔ wuli siɛn'n, kpɛkuun a jaso asiɛ wun, a di like.»

²² David waan: «Kɛ ba'n i nyin tɛ o su'n, n cili nglɛmun n sunnin. N waan sɛ wienun-ɔn, Anannganman ´si min aunnvuɛ nan ba'n ko wu-man o!

²³ ?Siɛn'n bɔ ɔ'a wu kwlaa nin-ɔn, n ´ci nglɛmun sɛ? N kwla fɛ-mɛn i n sɛ-man i sin wa kun. M bɔbɔ min yɛ n ´kɔ kan ɔ o lɔ nin-ɔn. I liɛ'n, ɔ sɛ i sin wa ekun-ɔn, ɔ yo-man ye.»

Salomɔn i awuliɛ

²⁴ David fɔnvɔli i yi Bat-Seba. Ɔ nin i be lali. Bat-Seba wuli ba yasua kun. Ɔ flɛli i kɛ Salomɔn . Anannganman kloli ba sɔ'n.

²⁵ Ɔ sunmannin Natan kɛ ɔ ko kɛn i sɔ kle David, nan Natan ɔ'a tɔn ba'n i dunman kɛ Zɛdidza, klolɛ bɔ Anannganman klo i'n ti.

David fali Raba klɔ'n yoli i liɛ

²⁶ Zoab nin Amɔnfuɛ'm be klɔ nga be flɛ i Raba'n i su fuɛ'm be kunnin, nan ɔ'a fa akpasua nga famiɛn'n tran lɛ'n.

²⁷ Yɛ ɔ sunmannin sran David sin kɛ be ko se i kɛ: «E nin Rabafuɛ mun e kunnin, m'an fa klɔ'n i kan nga nzue'n wo lɔ'n.

²⁸ Nan i ti flɛflɛ sonja nga be ka lɔ'n, nan amun nin klɔ'n i su fuɛ'm be wa kun, nan ɔ bɔbɔ fa klɔ sɔ'n. Sɛ min yɛ n fa'n, min yɛ n ´nyan su dunman-an.»

²⁹ Yɛ David flɛflɛli sonja'm be kwlaa, nan ɔ'a ɔ Raba. Ɔ nin klɔ'n i su fuɛ'm be kunnin nan ɔ'a fa.

³⁰ Ɔ yili amuɛn nga be flɛ i Milkɔm i ti kle'n. Kle sɔ'n i nɔnnin'n tra kilo ablasan. Yɛbuɛ kpakpa wie'm be tata su. Be fa wlali David i ti. David isali klɔ'n nun ninnge kpanngban kpa ɔli.

³¹ Ɔ fali klɔ'n nun sran mun bali Izraɛl. Ɔ fa be wlali plɔtrɔ nun: wie'm be dili waka junman, wie'm be kpacili yɛbuɛ, wie'm be kpɛli waka, wie'm be kpɛli bliki. Amɔnfuɛ'm be klɔ'n kwlaa su ɔ yoli be sɔ. Yɛ ɔ nin i sonja'm be sali bé sin Zerizalɛm-ɔ.