2 Samiɛl 10 - NYANMIƐN NDƐ'N 1998

David i sran'm bɔ be kuakuali be'n

¹ I sin Amɔnfuɛ'm be famiɛn'n ɔ wa wuli. I wa Anɛn trannin i ja nun.

² David seli i wun kɛ: «N ´yo Nasas i wa Anɛn i kpa kɛ i si fa yoli min kpa'n sa.» David sunmannin i sran mun kɛ be ko yo i yako i si i wie'n ti. Yɛ David i sran'm be ko juli Amɔnfuɛ'm be mɛn'n nun lɔ-ɔ.

³ Amɔn famiɛn i awlo lɔ sran dan dan'm be seli be min Anɛn kɛ: «?Ɔ yo wɔ kɛ ɔ́ si i nɛnnɛn dilɛ ti yɛ David yi sran bali ɔ yako yolɛ yɛ nin-ɔn? ?Nán klɔ'n i nzɔliɛ sielɛ nin i kplalɛ kɛ ɔ ko yo nan b'a utu i cɛn wie'n, i ti yɛ be bali-ɔ?»

⁴ Yɛ Anɛn trali David i sran mun nan ɔ'a yi be akanza'n i bue, yɛ ɔ kpɛli be tralɛ'n i afiɛn'n yili, ɔ kpɛli i bé bo ndrɛ'n su, nan ɔ'a se be kɛ be wɔ.

⁵ Kɛ David tili'n, ɔ sunmannin sran mun kɛ be ko kpa be atin. Nanwlɛ David i sran klikli sɔ'm be wunnin nyannzuɛn dan. Famiɛn'n man be ko seli be kɛ be `ka Zeriko lɔ lele man be akanza'n fu nan b'a ba.

David kwlali Amɔnfuɛ nin Sirifuɛ mun

⁶ Kɛ Amɔnfuɛ'm be wunnin i kɛ b'a wɔ David safle'n, be fali sika be ko yiali Bɛt-Rɛɔb lɔ Sirifuɛ mun, ɔ nin Sɔba lɔ Sirifuɛ'm be sonja akpi-akpi ablaɔn (20.000), ɔ nin Maaka famiɛn'n i sonja akpi, ɔ nin Tɔbfuɛ'm be sonja akpi-akpi blu-nin-nnyɔn (12.000).

⁷ David kusu tili i sɔ, nan ɔ'a sunman Zoab nin sonja kpakpa'm be ngba.

⁸ Amɔnfuɛ'm be fiteli be wa jrannin klɔ'n i anuan'n nun alɛ'n i kunlɛ ti. Sirifuɛ nga be fin Sɔba nin Rɛɔb'n be nin Tɔbfuɛ nin Maakafuɛ'm be o be liɛ aawlɛ flɛnnɛn i lika uflɛ nun.

⁹ Zoab wunnin kɛ i kpɔfuɛ'm be ti akpasua nnyɔn. Kun wo i sin, yɛ kun wo i nyrun. Yɛ ɔ kpali Izraɛl sonja kpakpa mun nan ɔ nin be b'a jranjran kɛ be nin Sirifuɛ'm be ´kun.

¹⁰ Ɔ yacili sonja kun nga mun i niaan Abisai sa nun, be kusu be jranjrannin kɛ be nin Amɔnfuɛ'm be ´kun.

¹¹ Ɔ seli Abisai kɛ: «Sɛ Sirifuɛ'm be kwla min'n, bla wa de min. Sɛ kusu Amɔnfuɛ'm be kwla wɔ'n, n ko de wɔ.

¹² Jran kekle. E `fa yakpa e `kun alɛ'n e `man e nvle'n ɔ nin e Nyanmiɛn'n i klɔ mun! Man Anannganman i klun sa'n yo!»

¹³ Zoab nin i sran'm be ɔli kɛ be nin Sirifuɛ'm be ko ta su, nan Sirifuɛ'm b'a wanndi bé bo.

¹⁴ Amɔnfuɛ'm be ´nian-an, Sirifuɛ'm be su wanndi, yɛ be kusu be wanndili Abisai'm be bo wluli klɔ'n nun-ɔn. Zoab nin Amɔnfuɛ'm b'a kun-man alɛ'n kun, nan ɔ'a ba Zerizalɛm.

¹⁵ Sirifuɛ'm be wunnin kɛ Izraɛlfuɛ'm b'a kwla be, yɛ be yiali be sonja mun-ɔn.

¹⁶ Adadezɛr ko yiali Sirifuɛ nga be o nzue'n sin lɔ'n, nan b'a ba Elam. Sɔbak b'ɔ ti Adadezɛr i sonja'm bé su kpɛn'n yɛ ɔ dun mmua be nyrun-ɔn.

¹⁷ Kɛ David tili'n, ɔ yiali Izraɛlfuɛ'm be kwlaa nan b'a kpɛ Zurdɛn'n b'a ba Elam. Sirifuɛ'm be jranjrannin, be nin David nin i sran'm be kunnin.

¹⁸ Sirifuɛ'm be wanndili Izraɛlfuɛ'm bé bo. David nin i sran'm be kunnin be kakaklolo ya nso bé su nnɛn kpanngɔ mun, ɔ nin be nnɛn kpanngɔ fufuɛ akpi-akpi ablanan (40.000). Be boli Sɔbak b'ɔ ti be sonja kpɛnngbɛn'n i kannin nan ɔ'a wu lɛ.

¹⁹ Kɛ famiɛn nga be su Adadezɛr su'n be wunnin kɛ Izraɛlfuɛ'm b'a kwla be'n, be nin Izraɛlfuɛ'm be siesieli be afiɛn, nan b'a su be. Kɛ ɔ fin i lɛ'n, Sirifuɛ'm b'a uka-man Amɔnfuɛ'm be alɛ kunlɛ'n nun kun.