2 Samiɛl 1 - NYANMIƐN NDƐ'N 1998

David tili Sail i wie'n

¹ Kɛ Sail wuli'n, David b'ɔ ko kwlali Amalɛkfuɛ mun'n, ɔ sɛli i sin bali Ziklag nan ɔ'a di lɛ le nnyɔn.

² I le nsan su'n, sran kun fin Sail i alɛ ngblaliɛ'n nun lɔ bali. Kɛ ɔ ´ba'n ɔ titili i wun tralɛ'm be nun, ɔ yoli i wun kɛ sɛnvuɛ sa, ndutre o i ti'n su. Kɛ ɔ juli David wun lɛ'n, ɔ kotoli nan ɔ'a utu i nyin ase.

³ David usɛli i kɛ: «?A fin nin?» I waan: «N fin Izraɛlfuɛ'm be ngblaliɛ'n nun lɔ yɛ n wanndi m ba-a.»

⁴ David usɛli kɛ: «?Yɛ nguɛ sa-a? Kan man n ti.» Ɔ tɛli i su kɛ: «Izraɛlfuɛ'm be wanndili alɛ'n bo. Be nun sunman be tɔli, yɛ be nun sunman be wuli. Sail nin i wa Zonatan be wuli wie bɔbɔ.»

⁵ Yɛ David usali gbanflɛn ng'ɔ wa boli jasin sɔ'n kɛ: «?Ɔ yo sɛ yɛ a si kɛ Sail nin i wa Zonatan be wuli-ɔ?»

⁶ Gbanflɛn'n tɛli i su kɛ: «N wo Gilboa oka'n su lɛ, kpɛkuun n ´nian-an, Sail kisɛ i cua'n su. Kɛ ɔ ´yo sɔ'n, wuun i kpɔfuɛ'm be kakaklolo nin nnɛn kpanngɔ fufuɛ'm be su i su.

⁷ Yɛ ɔ ´kpɛ i wun-ɔn, nan ɔ'a wun min, yɛ ɔ flɛli min-ɔn. N tɛli i su kɛ: ‹Nannan!›

⁸ Ɔ usali min kɛ: ‹?Ninfan fuɛ yɛlɛ wɔ?› N tɛli i su kɛ: ‹N ti Amalɛkfuɛ.›

⁹ Yɛ i waan: ‹Bla wa wiewie min, n tɛ de wunmiɛn, sanngɛ min nyinma su kpɛ min.›

¹⁰ Kɛ ɔ seli min sɔ'n yɛ n ɔli n ko wiewieli i-ɔ, afin n wunnin kɛ kwlalɛ nga Filistifuɛ'm be kwlɛli i lɛ'n ti ɔ ´wu. I sin min min, n tuli i ti famiɛn kle'n, n yili i sa nga'n, yɛ n ´fa blɛ wɔ yɛ .»

¹¹ Yɛ David sɔli i wun tralɛ'm bé nun yɛ ɔ titi be nun-ɔn. Be nga be o i wun lɛ'n be kusu be titili be liɛ'm be nun.

¹² Sail nin i wa Zonatan, ɔ nin Izraɛlfuɛ'm bɔ be ti Anannganman i nvle'n nun sran'm bɔ be wuli alɛ nun'n ti, David nin sran nga be o i wun lɛ sɔ'n be trannin awlaboɛ tranlɛ, be sunnin, b'a di-man like lele nnɔsua.

¹³ David usali gbanflɛn nga ɔ wa boli sɛ'n kɛ: «?A fin ye sɛ?» Ɔ tɛli su kɛ: «Amalɛkfuɛ kun b'ɔ tran Izraɛl wa'n i wa yɛlɛ min.»

¹⁴ David usɛli i kɛ: «?A kwla kunnin Anannganman i sran ng'ɔ sieli famiɛn'n sa bɔ cɛ, ɔ klun a ti-man wɔ?»

¹⁵ Yɛ David flɛli i gbanflɛn'm be nun kun-ɔn, nan ɔ'a se i kɛ: «Kɔ, ko kun i.» Yɛ kpɔ, yɛ gbanflɛn'n kunnin i-ɔ.

¹⁶ David seli i kɛ: «Ɔ wie'n fin ɔ bɔbɔ, afin ɔ fin ɔ́ nuan fiteli kɛ a kunnin Anannganman i sran ng'ɔ sieli i famiɛn'n, ɔ bɔbɔ yɛ a buli ɔ wun fɔ-ɔ.»

David sunnin Sail nin Zonatan

¹⁷ David kpɛli sɛ jue Sail nin i wa Zonatan bé su.

¹⁸ I waan be fa kle Zidafuɛ mun. Be flɛ jue sɔ'n kɛ «Ta'n i su jue.» Ɔ klɛ sran kpa'n i fluwa'n nun. Jue sɔ'n yɛ:

¹⁹ Izraɛlfuɛ mun, amun safunyrɛn mun yɛ b'a kun be oka'm be su yɛ. ?Ɔ yo sɛ yɛ man alɛ kunfuɛ kpakpa'm be tɔ sa-a?

²⁰ N ´srɛ, nán be bo jasin nga Gat lɔ. Nán be kan sin Askalɔn akpɔ'm bé su, sɛ ɔ yo sɔ'n, Filisti talua'm be klun ´jɔ, sɛ ɔ yo sɔ'n, be nga b'a wla-man be klɛn sɔ'n be mma bla'm be ´bo sro.

²¹ Gilboa oka mun, nán bɔlɛ gua amun su nan se kɛ nzue yɛ ɔ ´tɔ-ɔ. Nán fie nga be o amun su'n be yo ye. Nán man be nyan be su mma klikli bɔ be fa yi sraka'n, afin lɔ yɛ alɛ kunfuɛ kpakpa'm be nyrɛn'm be tɔli-ɔ. Ɔ man be su kankan-man Sail i nyrɛn'n nin ngo kun.

²² Sɛ Zonatan i ta'n ti sran'n, wuun n ´se kɛ kannzɛ i kpɔfuɛ'm be ti wunmiɛnfuɛ sɛ, sanngɛ ɔ'a wanndi-man be bo le. Yɛ Sail kusu, sɛ i tokofi'n ti sran'n, wuun n ´se kɛ ɔ'a sɛ-mɛn i sin ngbɛn sa le.

²³ Sail nin Zonatan be kloli bé wun lele b'a ti-man nun le. Be wie'n nun bɔbɔ b'a kpɔci-man. Bé wun yo nnyra tra anunman nyin. Be lɛ wunmiɛn tra asɔmɔli.

²⁴ Izraɛl talua mun, amun `sun Sail bɔ man amun wla tralɛ klanman nin tralɛ kpakpa mun'n, b'ɔ fa sika ɔkwlɛ ninnge mun sie su'n.

²⁵ ?Ɔ yo sɛ ti yɛ safunyrɛn'm be wuli alɛ nun sɔ-ɔ? ?Ɔ yo sɛ ti yɛ be wɔli Zonatan cua oka'm bé su sɔ-ɔ?

²⁶ Zonatan min niaan, min anwlɛn'n ɔ'a kpɛ min klun wɔ ti. Wɔ yɛ man min klun jɔ-ɔ. Klolɛ nga a fa klo min'n, be fa-man bla'm be klolɛ'n fa sunnzun-mɛn i.

²⁷ ?Ɔ yo sɛ ti yɛ safunyrɛn'm be tɔli sɔ-ɔ? ?Ɔ yo sɛ ti yɛ be alɛ kunlɛ ninnge'm be mlinnin sɔ-ɔ?