2 Piɛr 3 - NYANMIƐN NDƐ'N 1998

E Min'n i balɛ

¹ N sran kpa mun, n fluwa bɔ n klɛ blɛ amun'n i nnyɔn su'n yɛ. Fluwa sɔ'n i nnyɔn'n nun'n, n kpɛnnin amún wla kɛ man amun akunndan tran sa nga an si be laa'm bé su nan an bu akunndan kpa.

² An `bu ndɛ nga Nyanmiɛn nuan ijɔfuɛ'm be kan kleli amun laa'n, ɔ nin sa nga e Min b'ɔ ti e Defuɛ'n seli kɛ e `yo'n, bɔ be nga ɔ sunmannin be amún sin'n be kan kleli amun'n, i akunndan.

³ Man an si kpa kɛ cɛn wie lele kɛ mɛn'n ɔ ´kɔ i bue nuan'n, sran wie'm be ´ba, be ´yo sa nga be klun klo'n, yɛ be ´sri amun ,

⁴ be ´se kɛ: «?Ɔ seli amun kɛ ɔ ´ba, nɛ́n i-ɔ? ?Yɛ ɔ o nin? Kɛ ɔ fin lalaa'n bɔ e nannan'm be wuli'n, like nga Nyanmiɛn yili be'n, be kwlaa be tɛ o be osu'n nun.»

⁵ Sa kun o lɛ bɔ be klo-man kɛ be bu i akunndan. Sa sɔ'n yɛlɛ kɛ lalafuɛ nun kɛ Nyanmiɛn kannin ndɛ kun'n, kpɛkuun asiɛ'n nin nyanmiɛn su lɔ'n be trannin lɛ. Asiɛ'n fin nzue'n nun yɛ ɔ fiteli-ɔ, ɔ o nzue i afiɛn.

⁶ Yɛ nzue kunngba'n kusu, kɛ ɔ yi katali asiɛ'n su'n, ɔ nunnunnin laa mɛn liɛ'n .

⁷ Nyanmiɛn kunngba'n yɛ ɔ seli ekun kɛ man be sie nyanmiɛn su lɔ'n nin asiɛ nga be o lɛ ndɛ'n, be lɛ man sin di be. Be ´sie be lɛ lele ´fa ju cɛn nga be ´bu sran nga be sro-man Nyanmiɛn'n be fɔ bɔ be ´saci be'n.

⁸ N sran kpa mun, sa kun o lɛ bɔ nán amún wla fi: yɛlɛ kɛ e Min'n liɛ'n, cɛn ba kun'n ti i nyrun afuɛ akpi, yɛ afuɛ akpi'n ti i nyrun cɛn ba kun .

⁹ Like nga e Min'n se kɛ ɔ ´yo, ɔ cuɛn-cuɛn-mɛn i ase kɛ sran'm be bu i'n sa. Sanngɛ ɔ trɛ i anwlɛn amun wun, ɔ klo-man kɛ sran kun sa mlin, ɔ klo kɛ sran'm be kwlaa be kaci be nzuɛn'n.

¹⁰ E Min'n i balɛ'n ɔ ´fu e nun kɛ awiefuɛ sa. Cɛn sɔ'n nun nyanmiɛn su lɔ'n ´kpla wuu, kpɛkuun be su wun-mɛn i kun. Yɛ nyanmiɛn su lɔ ninnge'm be ´yra, yɛ asiɛ'n nin i su ninnge'n kwlaa be ´nunnun .

¹¹ ?Sɛ ninnge sɔ'n kwlaa be ´saci sɔ'n, like onin yɛ sɛ an yo-ɔ ɔ ti su-ɔ? Man amun nzuɛn'n yo kpa, yɛ an `fa amún wun mantan Nyanmiɛn!

¹² Kɛ amun ´minndɛ kɛ Nyanmiɛn i cɛn'n ju'n, an `yo like kwlaa nga an kwla yo'n man ɔ ju ndɛndɛ. Cɛn sɔ'n nun nyanmiɛn su lɔ'n ɔ ´yra, yɛ nyanmiɛn su lɔ ninnge'm be ´klo .

¹³ Nyanmiɛn seli kɛ ɔ ´man e nyanmiɛn su lɔ nin asiɛ uflɛ, lɔ yɛ be nga be yo sa kpa'n be ´tran-an. I yɛ e su minndɛ i-ɔ .

¹⁴ N sran kpa mun, i sɔ'n ti, kɛ e ´minndɛ cɛn sɔ'n, an `yo like kwlaa nga an kwla yo'n nan ɔ'a wun kɛ an ti sran kpa bɔ sa kaan sa nun-man amun wun nan amun nin i amún nuan a sɛ.

¹⁵ An `nian e Min'n i anwlɛn b'ɔ trɛ amun wun'n, amún ti nyanlɛ ti-ɔ. E niaan Pɔl b'ɔ ti e sran kpa'n, bɔ Nyanmiɛn mɛnnin i ngwlɛlɛ'n, kɛ ɔ klɛ i sɔ blɛli amun-ɔn.

¹⁶ I fluwa kwlaa ng'ɔ klɛ b'ɔ kan like sɔ'n i ndɛ'n, kɛ ɔ klɛli i sɔ-ɔ. I nun ndɛ wie'm be wlɛ wunlɛ ti kekle, ɔ man be nga be wun-man sa wlɛ'n, bɔ be lɛ-man anwlɛn'n, be kaci ndɛ sɔ'n kɛ be kaci Nyanmiɛn Ndɛ nga be klɛli'n i wie sa. Kɛ be yo sɔ'n, ɔ man be ´mlin.

¹⁷ Sanngɛ amun bɔ an ti n sran kpa'n, bɔ an si sɔ laa'n, an `nian amun wun, kɛ ɔ ´yo nan amu'an su-man sran tɛtɛ bɔ be yo sa b'ɔ ti-mɛn i su'n, bé su nan amun ta a kpɔ-man.

¹⁸ Ye bɔ e Min'n b'ɔ ti e Defuɛ'n yo amun'n ti'n, man be wun kɛ amu'an yo sran, yɛ man be wun kɛ amun nin i tran nan amu'an si i kpa. Kɛ ɔ fin ndɛ'n, man be yi i ayɛ tititi. Man ɔ yo sɔ!