2 Piɛr 2 - NYANMIƐN NDƐ'N 1998

Be nga be kle like b'ɔ ti-mɛn i su'n

¹ Kɛ be nga be tɔn bé wun suɛn kɛ be ti Nyanmiɛn nuan ijɔfuɛ'n be trannin sran'm be nun'n, be nga be tɔn bé wun suɛn kɛ be ti like klefuɛ'n kɛ be wa tran amun nun sɔ-ɔ. Be ´kle amun like nga be ti ato b'ɔ be saci sran'n gblɛ nun'n. Kɛ be bu-man be Min'n b'ɔ kpɔli bé ti'n i like fi kun'n, ɔ man be ´ka lɛ mlin.

² Sran kpanngban be ´su bé su bé sa tɛtɛ yolɛ sɔ'm be nun. Be ti, be ´kan atin kpafuɛ'n i wun ndɛ tɛ.

³ Bé nyin b'ɔ blo ninnge'm bé su'n ti, be ´kpɛ bé ti nun kan ndɛ mun, yɛ be ´fa amun kunndɛ be sika su. Be buli be fɔ ɔ'a cɛ, san be ´mlin.

⁴ Afin Nyanmiɛn a yaci-man anz'm bɔ be yoli i sa'n be lɛ, ɔ kan be bo guɛli i nyrɛnnɛn lika'n nun, yɛ be cili be sieli be aosin'n nun lɔ kɛ be `tran lɛ lele man ɔ fa ju jɔlɛ dilɛ cɛn'n.

⁵ Laa mɛn liɛ'n, Nyanmiɛn a yaci-mɛn i lɛ, ɔ man nzue'n tɔli ɔ yili dan kpa nan ɔ'a kun sran tɛtɛ nga be o mɛn nun'n be kwlaa. Sanngɛ ɔ deli Noe b'ɔ bo sa nga be yo-ɔ ɔ ti su'n i ndolo'n, yɛ ɔ deli sran nso ekun .

⁶ Ɔ seli kɛ ɔ ´nunnun Sodɔm klɔ'n nin Gomɔr klɔ'n mlɔnmlɔn, yɛ ɔ fa sin guali bé su nunnunnin be. Ɔ yo i sɔ fa kleli be nga be sro-mɛn i'n kɛ kɛ be liɛ'n ɔ wa yo sɔ-ɔ .

⁷ Sanngɛ ɔ deli Lɔt b'ɔ ti sran kpa'n, bɔ sa tɛtɛ nga sran'm be yo'n yo i ya'n .

⁸ Sran kpa sɔ'n b'ɔ tran sran tɛtɛ'm be afiɛn'n, cɛn kwlaa ɔ ti sa tɛtɛ nga be yo'n, yɛ ɔ wun i. Sran kpa b'ɔ ti'n ti, ɔ man i anwlɛn'n kpɛli i klun.

⁹ Ɔ man e si kɛ e Min'n kwla de be nga be sro i bɔ sa tɔ bé su'n. Yɛ ɔ si be nga be yo sa tɛ'n be siewlɛ nan jɔlɛ dilɛ cɛn'n nun ɔ'a bu be fɔ.

¹⁰ Be nga be liɛ'n ´yo tɛ tra su'n yɛlɛ be nga be konvi sɔ sa tɛtɛ'm be yolɛ'n, bɔ be bu-man Nyanmiɛn i like fi'n. Be yo sa nyin kekle su, yɛ be yo be bɔbɔ be klun sa. Be sro-man nyanmiɛn su lɔ sran nga be lɛ nyrun'n be nzowa kpɛlɛ.

¹¹ Anz mun bɔbɔ bɔ be ti tinwa tra sran sɔ mun'n, bɔ be kwla yo sa kekleekle tra be'n, be kan-man nyanmiɛn su lɔ sran sɔ'm bé wun ndɛ tɛ kle-man e Min'n!

¹² Sanngɛ sran sɔ'm be yo sa kɛ blo nnɛn bɔ be wun-man sa wlɛ bɔ be wu be kɛ be tra be be kun be'n, be liɛ'n sa, yɛ like nga be wun-mɛn i wlɛ'n, be kɛn i ndɛ kɛ ɔ ti-man kpa. Be ´wu kɛ blo nnɛn'm be liɛ'n sa.

¹³ Sa nga be fa yo sran wie mun'n, i kunngba'n yɛ be ´fa yo be-ɔ. Kɛ aliɛ ko cɛn'n, sa ng'ɔ yo be fɛ'n yɛlɛ mɛn dilɛ'n, kɛ a wun be'n, nyannzuɛn kun wɔ. Kɛ amun nin be yia aliɛ'n su'n, amún nyin gua ase, be saci amun wun, yɛ be gblɛgblɛ sa nga be yo'n ɔ yo be fɛ.

¹⁴ Kɛ be wun bla mun'n, be kunndɛlɛ akunndan yɛ be bu-ɔ, be konvi tu-man sa tɛtɛ yolɛ'n su. Be laka be bɔ be lɛ-man anwlɛn kpa'n. Bé nyin yi-man like mlɔnmlɔn. Nyanmiɛn man be wun su jɔ-man be le!

¹⁵ B'a yaci atin kpafuɛ'n, b'a mlin, be fa atin nga Bɛɔr wa Balaam fali su'n su. Sika nga be fa mɛnnin i sa tɛ b'ɔ yoli'n ti'n, ɔ jɔli i klun,

¹⁶ sanngɛ Nyanmiɛn tuli i fɔ sa sɔ'n b'ɔ yoli'n ti, afin aflunmun'n fiteli i, ɔ ijɔli i nyrun, ɔ man Nyanmiɛn nuan ijɔfuɛ sɔ'n yacili i sinnzin sɔ'n i yolɛ .

¹⁷ Be ti kɛ nzue ti bɔ ɔ'a wu'n sa, be ti kɛ nyanmiɛn b'ɔ dun tuun'n bɔ aunngban'n tu i'n sa. Be lika nga Nyanmiɛn sieli be'n ti aosin kpa tritritri.

¹⁸ Be ijɔ dandan ngbɛn, be fa ninnge nga klɔ sran nyin blo su'n laka be nga be nin be wiengu bɔ be fa-man atin kpafuɛ su'n be su bu'n.

¹⁹ Be se be kɛ be man be ´nyan bé ti, sanngɛ be bɔbɔ be ti kɛ kanga sa sa tɛ b'ɔ ti be nzuɛn'n ti. Afin sɛ sran kun kwla sran kun'n, yɛ ɔ sie i-ɔ.

²⁰ Afin sran nga be si e Min Jésus-Krist e Defuɛ'n, b'ɔ man be yaci sa nga be yo-ɔ be saci'n, sɛ be sa be sin ko fa sa sɔ'n kaci be junman ekun'n, be sacilɛ kasiɛn liɛ'n, ɔ yo tɛ tra klikli liɛ'n.

²¹ Sɛ b'a wun-man atin ng'ɔ ti kpa'n, ɔ ti kpa tra kɛ be wunnin i bɔ be yaci Nyanmiɛn mmla'n b'ɔ fa mannin be'n.

²² Sa nga be yoli'n, ɔ man nyanndra nga be bu se kɛ: «Alua'n ɔ'a sɛ i sin a ko di like ng'ɔ kpuli'n.», yɛ: «Kɔkɔti'n bɔ be wunnzinnin i'n ɔ'a sɛ i sin a ko bo i nnɔtiɛ'n ekun'n .», ɔ ti nanwlɛ.