2 Piɛr 1 - NYANMIƐN NDƐ'N 1998

Sran ng'ɔ klɛ fluwa'n ko mannin be'n

¹ N Simɔn Piɛr bɔ n ti Jésus-Krist junman difuɛ'n, b'ɔ sunmannin min'n, n ´klɛ fluwa nga blɛ amun bɔ Nyanmiɛn man amun lafi i su kpa kɛ e sa'n. I sɔ'n fin e Defuɛ Jésus-Krist b'ɔ ti Nyanmiɛn'n, afin ɔ ti sran kpa.

² Nyanmiɛn nin e Min Jésus bɔ an si be'n ti, be man an ´nyan ye titi, yɛ man amún wun ´jɔ amun fɔuun!

Nyanmiɛn i sran be flɛlɛ nin be falɛ

³ Kɛ e si sran ng'ɔ flɛli ye kɛ e `nyan nyrun'n, bɔ e yo sa ng'ɔ ti kpa kɛ i bɔbɔ sa'n ti'n, like nga b'ɔ man e kwla fa é wun mantan Nyanmiɛn titi'n i fanngan nun'n, ɔ fɛ i kwlaa'n mannin e.

⁴ Kɛ ɔ yoli sɔ'n, ɔ kannin ndɛ fɛ kleli ye kɛ ɔ wa yo like dan man e nan kɛ an ko nyan like sɔ'n, an yaci like nga bé nyin blo su b'ɔ man mɛn'n saci'n, nan an kaci kɛ Nyanmiɛn sa.

⁵ Like bɔ e wa nyan be sɔ'n ti, kɛ an lafi Nyanmiɛn su'n, an `yo like nga an kwlɛ i yo'n i kwlaa, man amun nzuɛn'n yo kpa. Kɛ amun nzuɛn'n kɔ yo kpa'n, an `kunndɛ kɛ amun ´wun sa'm be wlɛ.

⁶ Kɛ an wun sa'm be wlɛ'n, an `nian amun wun su. Kɛ an nian amún wun su'n, an `tra amun anwlɛn. Kɛ an tra amun anwlɛn'n, an `fa amún wun mantan Nyanmiɛn.

⁷ Kɛ an mantan Nyanmiɛn'n, an `yo amun niaan'm be kpa. Kɛ an yo be kpa'n, an `klo sran.

⁸ Nanwlɛ, sɛ an nian sa sɔ'm be su bɔ an yo be titi'n, kɛ an kunndɛ kɛ amun ´si e Min Jésus-Krist, san amun ´si i, afin an su tran-man lɛ ngbɛn, yɛ like nga an yo'n ɔ ´yo ye.

⁹ Sanngɛ sran ng'ɔ yo-man sa sɔ mun'n, ɔ ti anyansifuɛ, ɔ wun-man mmua, yɛ i wla fi i wun sa laa'n b'ɔ wieli'n su.

¹⁰ Aniaan mun, i sɔ'n ti, an `bu flɛlɛ nin falɛ bɔ Nyanmiɛn fali amun'n i akunndan kpa nan an `jran kekle. Sɛ an yo sɔ'n, an su fɔn-man mlɔnmlɔn.

¹¹ I sɔ'n nun yɛ e Min Jésus-Krist b'ɔ ti e Defuɛ'n, ɔ ´sɔ amun nun kpa, yɛ ɔ ´fa amun wlɛ i sran ng'ɔ sie be titi'n be nun-ɔn.

¹² An si sa sɔ mun, yɛ an lafi ndɛ nanwlɛ nga an tili'n su kpa, sanngɛ n su yaci-man amun wla kpɛnlɛ sa sɔ'm bé su.

¹³ Kɛ n nian wu-man'n, sɛ n kpɛn amún wla nan an fa sa sɔ'n sie amun klun'n, n wun i kɛ ɔ ti kpa.

¹⁴ Afin n si kɛ ɔ cɛ kaan n ´wu, kɛ e Min Jésus-Krist kan kleli n sɔ-ɔ.

¹⁵ Sanngɛ n ´yo like nga n kwlɛ i yo'n i kwlaa nan sɛ n wu-ɔ amún wla a tran sa sɔ'm bé su tititi.

Be nga be wunnin Krist nyrun b'ɔ lɛ'n

¹⁶ Nanwlɛ, kɛ e ´kan e Min Jésus-Krist i balɛ'n, nin i kwlalɛ b'ɔ kwla'n i ndɛ kle amun'n, ɔ ti-man kɛ ngua bɔ be fa bé ti nun ngwlɛlɛ fa di'n, yɛ e di kleli amun-ɔn. Sanngɛ e bɔbɔ e wunnin i nyrun ng'ɔ lɛ i'n nin e nyinma.

¹⁷ I le kunngba nga e Si Nyanmiɛn ´mɛnmɛn i b'ɔ ´yi i ayɛ'n, e bɔbɔ e wo i bo. Ɔ tili i nɛn b'ɔ fin lika'n b'ɔ kpaja nyannyan'n nun'n, ɔ seli kɛ: «Min anwlɛn su ba'n yɛ, i su yɛ n wla'n kwlaa wo-ɔ.»

¹⁸ Kɛ e nin i e o Nyanmiɛn i oka'n su lɔ'n yɛ e tili i nɛn sɔ nin-ɔn .

¹⁹ Ɔ man e wunnin Nyanmiɛn nuan ijɔfuɛ'm be ndɛ nga be kannin'n i wlɛ kpa. Sɛ an fa amún nyin sie su kpa'n, ɔ ti kpa, afin ɔ ti kɛ kannin b'ɔ kpaja lika tuun wie nun sa lele fa ju aliɛ njɛnniɛn kɔmin su, yɛ awuɛ nzraama'n ɔ ´fite, ɔ ´yi sa'm bé nyin weiin kle amun.

²⁰ Man an si kpa kɛ sran kun i bɔbɔ tiaun ɔ kwla tu-man Nyanmiɛn Ndɛ nga i nuan ijɔfuɛ'm be klɛli'n i nun kun sa bo.

²¹ Afin Nyanmiɛn ndɛ nga sran'm be kannin'n, b'a kpɛ-man wie fi bé ti nun yɛ be kannin-ɔn, i Wawɛ'n yɛ ɔ fa wla bé nuan yɛ be kannin-ɔn.