2 Jean 1 - NYANMIƐN NDƐ'N 1998

Sran ng'ɔ klɛ fluwa'n ko mannin be'n

¹ Mmo, m bɔ n ti kpɛnngbɛn'n, n ´klɛ fluwa nga m ´blɛ wɔ bɔ Nyanmiɛn fali wɔ'n, n ´klɛ m ´blɛ wɔ nin ɔ mma mun bɔ n klo amún sa kpa'n. Nán min ngunmin yɛ n klo amún sa-a, be kwlaa nga be si ndɛ nanwlɛ'n, be klo amun wie.

² Afin e fa ndɛ nanwlɛ'n su, yɛ e ´fa su tititi.

³ Man e Si Nyanmiɛn nin Jésus-Krist b'ɔ ti i Wa'n be man e nyan ye, be si ye aunnvuɛ, yɛ be man é wun jɔ e fɔuun, nan e yo nanwlɛfuɛ, e klo e wun.

Nanwlɛ nin bé wun klolɛ

⁴ Kɛ n wunnin kɛ ɔ mma'm be nun wie'm be fa ndɛ nga e Si kan kleli ye'n su, bɔ be ti nanwlɛfuɛ titi'n, n klun jɔ dan kpa.

⁵ Mmo, ɔ bɔ a ti n sran kpa'n, ndɛ nga n ´klɛ m blɛ wɔ yɛ'n, nán sa uflɛ yɛ n se kɛ e `yo-ɔ, sanngɛ sa kunngba nga e tili i bo bolɛ nun nin-ɔn. N ´srɛ wɔ, man e klo e wun .

⁶ Bé wun klolɛ sɔ'n yɛlɛ i ndɛ'n bɔ an tili i bo bolɛ nun'n, yɛlɛ kɛ an klo amun wun.

⁷ Afin sran kpanngban b'a sanndi mɛn'n nun, be laka sran mun, be waan, Jésus-Krist a kaci-man sran. Sran ng'ɔ se sɔ'n yɛ ɔ ti sran lakafuɛ nin Krist i kpɔfuɛ nin-ɔn.

⁸ I sɔ'n ti, an `nian amún wun kpa nan amun junman'n i nuan like'n ɔ'a to-man fuan-man amun sanngɛ amu'an nyan nun like kpa'n ti.

⁹ Sran nga ndɛ nga Krist kle'n ju-mɛn i'n, b'ɔ uka su'n, wuun ɔ si-man Nyanmiɛn, sanngɛ sran ng'ɔ fa like ng'ɔ kle su'n, ɔ si e Si'n nin i Wa'n.

¹⁰ Sɛ sran wie wa to amun b'ɔ kan-man ndɛ kunngba nga'n, nán an sike i, nán an yo i blandɛ.

¹¹ Afin sran ng'ɔ yo i blandɛ'n, wuun ɔ'a yo sa kunngba ng'ɔ yo be'n be wie.

I ndɛ'n i atabo

¹² Ndɛ kpanngban wo n klun, n klo kɛ n ´kan kle amun, sanngɛ n klo-man kɛ n klɛ. N waan m ´ba amún wun lɔ nan min nin amun ´koko yalɛ nan e klun jɔ dan.

¹³ Ɔ niaan bla bɔ Nyanmiɛn kpɛli fali i'n, i mma'm be ´yo wɔ like.