1 Timote 5 - NYANMIƐN NDƐ'N 1998

Like nga be yo man angboti bla mun, nin kpɛnngbɛn mun, nin kanga mun'n

¹ Nán ijɔ kpɛnngbɛn mun, sanngɛ tu be fɔ amanniɛn su, fa be bu ɔ́ si, bu gbanflɛn mun ɔ niaan,

² bu bla kpɛnngbɛn mun ɔ nin, bu talua mun ɔ niaan sa'n kwlaa nun.

³ Bu bla nga bé wun wuli bɔ be lɛ-man sran'm be sran, nian be lika.

⁴ Sanngɛ ng'ɔ lɛ ba annzɛ anunman'n, man ba sɔ'm be si kɛ be Nyanmiɛn sulɛ'n nun'n, sa nga be ´dun mmua yo'n yɛlɛ be awlo'n i lika nianlɛ, ɔ nin like nga bé si nin be nin, ɔ nin be nannan'm be yo mannin be'n i wunsu yolɛ. I sɔ'n yo Nyanmiɛn fɛ.

⁵ Bla nga i wun wuli b'ɔ lɛ-man sran niɛn-mɛn i lika mlɔnmlɔn'n, ɔ fɛ i wla'n gua Nyanmiɛn su, yɛ wia nun o, kɔnguɛ o, ɔ nin i koko yalɛ, ɔ srɛ i kɛ ɔ niɛn i su.

⁶ Sanngɛ angboti nga mɛn dilɛ'n yo i fɛ'n, kannzɛ i nyin o su'n, ɔ ti kɛ ɔ'a wu sa.

⁷ Kɛn i sɔ kle be nan b'a kwla kan-man bé wun ndɛ.

⁸ Sran ng'ɔ niɛn-mɛn i fuɛ'm be lika'n ɔ ti tɛ, nga b'ɔ ti tɛ'n tra su'n yɛlɛ sran ng'ɔ niɛn-mɛn i bɔbɔ i awlo'n i lika'n, ɔ ti-man Nyanmiɛn sufuɛ, i tɛ liɛ'n tra sran ng'ɔ lafi-man Krist su'n.

⁹ Bla nga i wun wuli bɔ be waan be ´klɛ i dunman angboti mmla'm be fluwa nun'n, man ɔ yo bɔ ɔ'a di afuɛ ablesiɛn, bɔ ɔ'a ja bian kpɛ kunngba.

¹⁰ Man be wun kɛ ɔ yo sran'm be ye, yɛ ɔ niɛn i mma'm be su kpa, man be wun kɛ ɔ ti aklunyefuɛ, yɛ ɔ wunnzin Nyanmiɛn sran'm bé ja, man be wun ekun kɛ ɔ uka yalɛfuɛ mun, yɛ ɔ yo sa kpakpa'n kwlaa.

¹¹ Sanngɛ nán klɛ angboti bla nga be tɛ yo talua'm be dunman angboti mmla'm be fluwa'n nun, afin sɛ cɛn wie be konvi wa sɔ bian jalɛ'n, kpɛkuun be ´yaci Krist,

¹² yɛ like nga be se be kɛ be ´yo bɔ b'a yo-man'n ti, be ´kaci sa tɛ yofuɛ.

¹³ Kɛ ɔ ko yo sɔ'n, be yo-man like fi, be wlan-wlan awlo'm be nun, yɛ ng'ɔ ti tɛ tra su'n, be ijɔ fiaii, ndɛ ng'ɔ ti-man be ndɛ'n nin ndɛ ng'ɔ fata-man'n yɛ be kan-an.

¹⁴ I sɔ'n ti, man be nga be tɛ yo talua'n be ja bian, be wu ba, be nian be awlo'n su, nan e kpɔfuɛ'm b'a kwla saci-man e wun.

¹⁵ Afin be wie'm b'a yaci atin kpafuɛ'n b'a ko su Satan su.

¹⁶ Sɛ Kristfuɛ bla wie lɛ angboti bla i awlo nun'n, man i bɔbɔ nian be lika nan asɔnun'n ɔ'a kwla nian be nga be lɛ-man sran'm be lika, nán man ɔ yaci be asɔnun'n sa nun.

¹⁷ Asɔnun kpɛnngbɛn nga be sie asɔnun'n i kpa'n, man be bu be sran yɛ be yo be mo dan. I li kpɛnngbɛn nga be di junman kpa bɔ be kan Nyanmiɛn ndɛ yɛ be kle like'n, man be mo yolɛ liɛ'n yo dan tra su.

¹⁸ Afin be klɛli i Nyanmiɛn Ndɛ'n nun kɛ: «Nannin ng'ɔ bo awie'n, nán be cici i nuan.» Yɛ be klɛli i ekun kɛ: «Junman difuɛ'n i sa ka-man ngbɛn .»

¹⁹ Sɛ be kan asɔnun kpɛnngbɛn wie wun ndɛ kle wɔ'n, sɛ w'a tie-mɛn i sran nnyɔn annzɛ nsan bé nuan nun'n, nán fa su .

²⁰ Sanngɛ be nga be yo sa tɛ'n, tu be fɔ sran'm be kwlaa be nyrun, nan srɛ kun be nga'm be kusu wie.

²¹ Fa ndɛ nga m'an kan kle wɔ yɛ'n su kpa, sɛ a nian ti-man sran kun i nuan nun ndɛ'n, nán bu i fɔ, nán bu sran'n wie kpa tra wie. Nyanmiɛn, nin Krist-Jésus, ɔ nin Nyanmiɛn i anz'm b'ɔ kpali be'n be ti min lalofuɛ kɛ n kan ndɛ sɔ'n kleli wɔ.

²² Nán kpli sie ɔ́ sa sran su ndɛndɛ kɛ ɔ di Nyanmiɛn junman. Nán fa ɔ wun wlɛ i sa tɛ nga be wie'm be yo'n nun. Nian ɔ wun, nán yo sa tɛ fi.

²³ Ɔ ku'n nin tukpacɛ bɔ a tɔ i tikatika'n ti, nán nɔn nzue ngunmin kun, nɔn nzan kan.

²⁴ Sran wie'm bé sa tɛ'm be fite su nan b'a di be jɔlɛ, sanngɛ wie'm be kusu be liɛ'm be fite-man su san ɔ cɛ lele ka.

²⁵ Yɛ sa kpa nga kusu bɔ sran wie'm be yo'n, sran'm be wun i, nga kusu bɔ b'a ka-man lɛ b'a wun-mɛn i'n, ɔ su ka-man bui bo, san be ´wun i.