1 Timote 4 - NYANMIƐN NDƐ'N 1998

Be nga be kle like ng'ɔ ti-man su'n

¹ Nyanmiɛn Wawɛ'n kɛn i weiin kɛ, cɛn wie lele kɛ mɛn'n ´kɔ i bue nuan'n, sran wie'm be su lafi-man Nyanmiɛn su kun, be ´fa like nga mmusu bɔ be laka sran'n be kle'n su.

² Be nga be kle like sɔ'n, be ti atofuɛ be klo dunman, be klun akunndan'n ɔ'a yo kɛ blalɛ nglɛ b'ɔ yra sran-an ɔ yo kokloko'n sa.

³ Be se kɛ nán man be ja bla nin bian, yɛ nán man be di like nga Nyanmiɛn yili be'n be ngba. Sanngɛ Nyanmiɛn yili ninnge sɔ mun kɛ be nga be lafi i su bɔ be si nanwlɛ'n, be lɛ i ase nan be di.

⁴ Like nga Nyanmiɛn yili be'n, be kwlaa be ti kpa, nán man be yi wie fi ase, sanngɛ man be sɔ nun be lɛ i ase,

⁵ afin be yo Nyanmiɛn liɛ i ndɛ'n nin i asenna'n ti.

Jésus-Krist i junman difuɛ kpa

⁶ Sɛ a kɛn i sɔ kle aniaan mun'n, bɔ a ´fa Nyanmiɛn i sulafilɛ ndɛ'n nin like kpa nga be kleli wɔ bɔ a fali su'n kaci kɛ wɔ aliɛ sa'n, a ´yo Krist-Jésus i junman difuɛ kpa.

⁷ Sanngɛ nán fa ndɛ b'ɔ ti-man Nyanmiɛn liɛ b'ɔ ti kɛ bla oke ndɛ sa'm bé su. Mian ɔ́ nyin mantan Nyanmiɛn kpa.

⁸ Afin bé wun kpinngbinlɛ'n ɔ ti kpa, sanngɛ bé wun bɔ be fa mantan Nyanmiɛn'n ɔ ti kpa sa'n kwlaa nun trɛ i, ɔ man sɛ be yo sɔ'n, be si kɛ be ´nyan nguan kɛ e o yɛ'n nin blɛ ng'ɔ ba lɔ'n nun.

⁹ Ndɛ sɔ'n ti nanwlɛ weiin, sɛ be fa su-ɔ ɔ ti kpa.

¹⁰ I ti yɛ man e di junman lele e fɛ nin-ɔn, afin e fa e wla'n guali Nyanmiɛn b'ɔ lafi-man, b'ɔ ti sran'm be kwlaa be Defuɛ'n i su, sanngɛ be nga be lafi i su'n, be liɛ yɛlɛ delɛ sɔ'n i bo'n.

¹¹ Fa ndɛ sɔ'n kle be, yɛ jran su man be fa su.

¹² Kɛ bɔ a ti gbanflɛn kan'n ti'n, nán yo man sran fi yo wɔ finfin, sanngɛ yo sa ng'ɔ ti kpa'n, man be nga be lafi Krist su'n be nian su yo, ɔ ijɔlɛ nun o, ɔ nzuɛn'n nun o, ɔ sran klolɛ nun o, ɔ Nyanmiɛn sulafilɛ nun o, ɔ nin sa tɛ bɔ a yo-man nin o.

¹³ Nyanmiɛn Ndɛ kannganlɛ nzra nun'n, nin afɔtuɛ manlɛ'n, ɔ nin like klelɛ'n, fa yo ɔ junman man m ma to wɔ su.

¹⁴ Like nga Nyanmiɛn fa mannin wɔ kɛ a yo'n, Nyanmiɛn nuan ijɔfuɛ'm be ndɛ bɔ be kannin'n ti'n b'ɔ man kpɛnngbɛn'm be yiali be fa bé sa fuali ɔ su'n, nán kpa su.

¹⁵ Mian ɔ́ nyin yo ninnge sɔ mun, man be yolɛ'n lo wɔ kpa nan sran'n kwlaa be `wun kɛ a su yo kpa tra laa'n.

¹⁶ Nian ɔ bɔbɔ ɔ wun su ɔ nin ɔ ninnge bɔ a kle'n su kpa, afin sɛ a yo sɔ tititi'n, a ´de ɔ bɔbɔ nin be nga bé ti ɔ ndɛ'n.