1 Timote 3 - NYANMIƐN NDƐ'N 1998

Asɔnun sunianfuɛ mun

¹ Ndɛ ng'ɔ wo yɛ'n ɔ ti nanwlɛ weiin: sran ng'ɔ klo kɛ ɔ ´yo asɔnun sunianfuɛ'n, wuun ɔ klo junman b'ɔ ti kpa.

² Sanngɛ i sɔ sran liɛ'n, man ɔ yo sran bɔ be kwla saci-mɛn i wun kaan sa, bɔ i yi ti kun, b'ɔ niɛn i wun su kpa, b'ɔ si ngwlɛlɛ, b'ɔ yo sa i nuan su, b'ɔ ti aklunyefuɛ, b'ɔ si like kle.

³ Nán man ɔ yo nzan nɔnfuɛ nin utre klofuɛ, sanngɛ man ɔ yo wɛtɛɛfuɛ b'ɔ kunndɛ-man ndɛnngan, nán man ɔ yo sran bɔ i nyin yi-man like.

⁴ Man ɔ yo sran b'ɔ si i bɔbɔ i awlo'n su nian, bɔ i mma'm be bu i sran bé nyin yi i kpa.

⁵ ?Afin sɛ sran kun si-mɛn i bɔbɔ i awlo'n su nian'n, ɔ ´yo sɛ yɛ ɔ ´kwla nian Nyanmiɛn i asɔnun'n su-ɔ .

⁶ Nán man ɔ yo sran b'ɔ fɛ i wun man Nyanmiɛn-ɔn ɔ nian cɛ-man, sɛ ɔ yo sɔ'n, ɔ cɛ-man nan ɔ'a tu i wun nan fɔ bulɛ kunngba nga be buli mmusu'm bé si Satan'n b'a bu i wie .

⁷ Man ɔ yo sran bɔ be nga be ti-man Kristfuɛ'n be bo i dunman kpa nan b'a kɛn-mɛn i wun ndɛ, nan ɔ'a tɔ-man aya nga mmusu'm bé si Satan'n suali'n nun.

Asɔnunfuɛ'm be lika nianfuɛ mun

⁸ Asɔnunfuɛ'm be lika nianfuɛ'm be kusu, man be yo sran nanwlɛfuɛ bɔ bé nuan nun ti-man nnyɔn-nnyɔn, nán man be yo nzan nɔnfuɛ dan, nán man be kunndɛ sika i wafa ng'ɔ ti-mɛn i su'n,

⁹ man be yo sran bɔ be nzuɛn kpa'n ti be klun titi-man be, b'ɔ man be fa Nyanmiɛn i sulafilɛ ndɛ b'ɔ yili i nglo'n su kpa.

¹⁰ Man be dun mmua sa be nian, sɛ be nian be bɔ b'a wun-man fɔ be wun'n, be ko di be junman sɔ'n.

¹¹ Man bé yi'm be kusu be yo sran nanwlɛfuɛ, nán man be yo abla difuɛ, man be yo akunndanfuɛ, man be yo sran bɔ be kwla fa be wla gua be su sa'n kwlaa nun.

¹² Man asɔnunfuɛ'm be lika nianfuɛ'm be yo sran bɔ be lɛ bla kun, bɔ be nian be mma mun nin be bɔbɔ be awlo'm be su kpa.

¹³ Afin be nga be di be junman'n kpa'n, be ´nyan kɔmin, ɔ man be ´kwla kan Nyanmiɛn su bɔ e lafi nin sran wunmuan bɔ e nin Krist-Jésus y'a yo'n i ndɛ'n yakpa su.

Abonuan sa dan bɔ e wun-mɛn i wlɛ'n

¹⁴ Fluwa yɛ n su klɛ blɛ wɔ yɛ, sanngɛ ɔ o n klun kɛ ɔ cɛ kan-an n ´kɔ ɔ wun lɔ.

¹⁵ Sanngɛ sɛ m'an kwla ɔ-man icra'n, fluwa nga nun ndɛ'n ɔ ´yo man a ´si sa nga a ´yo i Nyanmiɛn i awlo'n nun'n. Awlo sɔ'n yɛlɛ Nyanmiɛn b'ɔ lafi-man'n i Asɔnun'n. Sɛ nanwlɛ'n ti sua'n, wuun Asɔnun'n ti i kuatrɛn nin i kofiaja.

¹⁶ Nanwlɛ, e kwlaa e si kɛ kɛ ɔ yoli bɔ e yoli Nyanmiɛn liɛ'n, ɔ ti abonuan dan, sran wun-mɛn i wlɛ. Ɔ yoli i wun sran'n, ɔ yili i wun nglo, Nyanmiɛn Wawɛ'n kle kɛ ɔ ti sran kpa, anz'm be wunnin i. Be kɛnnin i ndɛ nvle'm be nun. Be lafili i su mɛn wunmuan'n nun. Be mɛnnin i su ɔli nyanmiɛn su lɔ, ɔ nyannin nyrun dan.