1 Timote 2 - NYANMIƐN NDƐ'N 1998

An `srɛ Nyanmiɛn kɛ ɔ nian sran'm be kwlaa bé su

¹ Afɔtuɛ nga n waan m ´man wɔ'n i klikli'n yɛ: an `kan sran'm be kwlaa be ndɛ kle Nyanmiɛn, an `srɛ i kɛ ɔ nian bé su, an `srɛ i aunnvuɛ su, an `lɛ i ase.

² An `srɛ i kɛ ɔ nian famiɛn mun nin sran ngbli-ngbli'm be kwlaa bé su, man e di alaje, yɛ man e nyan e ti fɔuun nan e sro Nyanmiɛn kpa, yɛ e nzuɛn'n `yo kpa.

³ Sa sɔ'n ti kpa, ɔ yo e Defuɛ Nyanmiɛn'n i fɛ.

⁴ Ɔ klo kɛ ɔ ´de sran'm be kwlaa nan be wun sa ng'ɔ ti nanwlɛ'n i wlɛ kpa.

⁵ Afin Nyanmiɛn'n ti kun, yɛ kpatafuɛ ng'ɔ jran sran'm bé nuan kpata Nyanmiɛn'n ti kun kusu, yɛlɛ Krist-Jésus, ɔ ti sran.

⁶ Ɔ fɛ i wun mannin kɛ ɔ ´kpɔ sran'm be kwlaa bé ti. Kɛ ɔ yoli sɔ blɛ nga Nyanmiɛn sieli'n su'n, yɛ ɔ kle kɛ Nyanmiɛn klo kɛ ɔ ´de sran'n kwlaa nin-ɔn.

⁷ Ɔ sieli min kɛ n kan ndɛ sɔ'n, yɛ ɔ sunmannin min kɛ n kan ndɛ nanwlɛ'n nin i sulafilɛ ndɛ'n kle be bɔ be ti-man Zuif'n. Nanwlɛ'n yɛ n di-ɔ, m bua-man ato.

⁸ I sɔ'n ti, yasua bɔ sa tɛ kaan sa, nin ya, ɔ nin akunndan tɛ nun-man be klun'n, lika kwlaa nga be wo'n, n klo kɛ be man bé sa'm be su be koko yalɛ kle Nyanmiɛn.

⁹ I kunngba'n, n klo kɛ tannin nga mmla'm be kla'n be klɛ i kpa, nán man be fa bé wun kle, sanngɛ man be sie bé wun kpa . Kɛ be ´siesie bé wun'n, nán man be fa be wla guɛ i be ti bɔ be yo'n, nin sika ɔkwlɛ, nin afle, nin tralɛ b'ɔ lɛ gua'm bé su,

¹⁰ sanngɛ man be yo sran ye, afin bla nga be sro Nyanmiɛn'n, sɛ be yo sɔ-ɔ ɔ ti kpa.

¹¹ Man mmla'm be tran diin be sie bé su like nga be kle be'n su, man be yo bé wun aenvuɛ.

¹² N kplin-man su kɛ bla kle like yɛ ɔ sie yasua, sanngɛ man ɔ tran diin.

¹³ Afin Adam yɛ Nyanmiɛn dun mmua yili i-ɔ, i sin yɛ ɔ yili Ɛv-ɔ ,

¹⁴ yɛ nán Adam yɛ be lɛkɛ i-ɔ, sanngɛ Ɛv b'ɔ ti bla nin-ɔn. Kɛ be lɛkɛli i bɔ be nyɛnnin i'n, yɛ ɔ yoli sa tɛ nin-ɔn .

¹⁵ Sanngɛ sɛ bla lafi Nyanmiɛn su kpa'n, sɛ ɔ klo sran titi'n, sɛ ɔ yo Nyanmiɛn liɛ mlɔnmlɔn nan ɔ niɛn i wun su kpa'n, sɛ ɔ ko wu ba'n, ɔ ´fite nun.