1 Timote 1 - NYANMIƐN NDƐ'N 1998

Pɔl klɛ fluwa nga ko mannin Timote

¹ M Pɔl bɔ e Defuɛ Nyanmiɛn man Krist-Jésus bɔ e fa é wla guɛ i su'n ɔ sunmannin min'n,

² n ´klɛ fluwa nga blɛ wɔ Timote. A ti mín wa sakpa, afin min yɛ man a lafili Krist su-ɔ. Man é Si Nyanmiɛn nin e Min Krist-Jésus be man a nyan ye, man be si wɔ aunnvuɛ, yɛ man ɔ́ wun jɔ wɔ fɔuun.

Like nga be kle b'ɔ ti-man su'n

³ Kɛ n ´kɔ Maseduani'n, n seli wɔ kɛ a ka Efɛz lɔ nan a tu sran wie'm be fɔ kɛ nán man be kle like uflɛ,

⁴ yɛ ngua nin be nannan-nannan'm be osu'n i finwlɛ b'ɔ wie-man mlɔnmlɔn'n b'ɔ kpɛ saɛ'n, min waan a tu be fɔ ekun kɛ nán man be fa be wla'n gua ninnge sɔ'm bé su. Sa sɔ'm be uka-man sran kɛ ɔ lafi Nyanmiɛn su ɔ yo sa ng'ɔ ti i klun sa'n.

⁵ E waan be `klo sran kpa ti yɛ e tu be fɔ sɔ nin-ɔn. Klolɛ sɔ'n fin sran bɔ sa tɛ kaan sa nun-mɛn i anwlɛn'n nun, b'ɔ man i klun titi-mɛn i'n, b'ɔ lafi Nyanmiɛn su sakpa'n.

⁶ Sran wie'm b'a yaci ninnge sɔ'm be yolɛ, b'a fa be wun a wla ndɛ ngbɛn-ngbɛn'm be kanlɛ nun.

⁷ Be klo kɛ be ´yo mmla'n i klefuɛ, sanngɛ ndɛ nga be bɔbɔ be kan'n nin like nga be jran su kɛ ɔ ti nanwlɛ sakpa'n, be wun-man be wlɛ.

⁸ E si kɛ sɛ sran yo mmla'n i nuan su sa'n, ɔ ti kpa.

⁹ Afin e si kɛ nán be nga be ti sran kpa'n be ti yɛ be sieli mmla nin-ɔn. Sanngɛ be sie mannin be nga be ti-man kpa'n, nin nyin keklefuɛ mun, nin be bɔ be sro-man Nyanmiɛn'n, nin sa tɛ yofuɛ mun, nin be bɔ bé nyin yi-man Nyanmiɛn bɔ be bu i ninnge'm be finfin'n, nin be bɔ be kun be si nin be nin'n, nin sran kunfuɛ mun,

¹⁰ nin bla nin bian kunndɛfuɛ mun, nin yasua nga be kunndɛ be wiengu yasua'n, nin be nga be tra sran ndɔlɛ'n, nin atofuɛ mun, nin be nga be tɔn sran suɛn'n, ɔ nin be kwlaa nga be yo sa nga b'ɔ nin sa nga be kle be kɛ be yo'n ɔ ti-man kun'n.

¹¹ Kɛ be klɛli Nyanmiɛn bɔ be bo i dunman fɛ titi'n i jasin fɛ'n b'ɔ fa wlali n sa nun'n nun sɔ-ɔ.

Pɔl lali Krist ase

^12-13 N ´la e Min Krist-Jésus b'ɔ wlali n fanngan'n i ase, afin m bɔ laa n saci i dunman'n bɔ n kle i yalɛ'n, bɔ n kpɛ i nzowa'n, ɔ buli n sran, yɛ ɔ fa min wlɛli i i junman'n nun. Nyanmiɛn sili min aunnvuɛ, afin sa wlɛ bɔ n wun-mɛn i'n nin i su bɔ n lafi-man'n ti yɛ n yoli sɔ-ɔ.

¹⁴ Ye nga e Min'n yoli min'n i nyin fiteli dan, ɔ man kɛ e nin Krist-Jésus e kacili sran wunmuan'n, e lafi i su, yɛ e klo i nin sran mun.

¹⁵ Ndɛ nga ti nanwlɛ weiin, sɛ be fa su'n ɔ ti kpa, yɛlɛ kɛ Krist-Jésus bali mɛn'n nun sa tɛ yofuɛ mun bɔ n ti be nun klikli'n be delɛ.

¹⁶ Min bɔ ń sa tɛ liɛ'n tra sran'm be kwlaa be liɛ'n, Nyanmiɛn sili min aunnvuɛ, nan Krist-Jésus fɛ i anwlɛn b'ɔ trɛ i sran wun'n ´kle be nga be wa lafi i su bɔ be ´nyan anannganman nguan'n. Ɔ man be ´wun kɛ ɔ trɛ i anwlɛn bé wun wie.

¹⁷ Famiɛn b'ɔ ti anannganman'n, b'ɔ wu-man, bɔ be wun-mɛn i'n, b'ɔ ti Nyanmiɛn bɔ like fi nun-mɛn i sin'n, man be mɛnmɛn i, yɛ be yi i ayɛ tititi, nán be yaci i le! Man ɔ yo sɔ!

¹⁸ Mín wa Timote, afɔtuɛ nga n ´fa man wɔ yɛ'n, ɔ nin ɔ́ wun ndɛ nga be bo su kleli min laa'n ɔ ti kun. Fa ndɛ sɔ'n, mian ɔ́ nyin yo sa ng'ɔ ti kpa'n

¹⁹ Nyanmiɛn su bɔ a lafi'n nin ɔ klun b'ɔ titi-man wɔ'n ti. Sran wie'm be yo-man sa kpa nga be klun lɔ akunndan'n se be kɛ be yo'n, ɔ man be lafi-man Nyanmiɛn su kpa kun.

²⁰ Imene nin Alɛksandri be o sran sɔ'm be nun. N fa be wlali Satan sa nun nan be bu akunndan nan nán man be saci Nyanmiɛn dunman kun.