1 Samiɛl 9 - NYANMIƐN NDƐ'N 1998

Sail i si i aflunmun'm be kunndɛlɛ

¹ I blɛ sɔ nun'n, bian kun o lɛ, be flɛ i kɛ Kis, be flɛ i si kɛ Abiɛl. Abiɛl i si liɛ'n yɛlɛ Zɛrɔr, Zɛrɔr kusu i si liɛ'n yɛlɛ Bɛkɔrat, yɛ Bɛkɔrat liɛ'n yɛlɛ Afiak. Kis sɔ'n ti Bɛnzamɛn akpasua'n sufuɛ. Ɔ ti yasua sran, yɛ kusu ɔ lɛ nyrun.

² I wa yasua kun suan Sail. Ɔ ti gbanflɛn klanman kpa, Izraɛlfuɛ'm be nun sran fi ju-mɛn i nun. I ti'n tra sran'm be kwlaa be su.

³ Le kun Kis i aflunmun bla'm be mlinnin. Yɛ Kis seli i wa Sail kɛ: «A nin gbanflɛn'm be nun kun be `wɔ be `ko kunndɛ aflunmun mun.»

⁴ Sail nin gbanflɛn'n be sinnin Efraim oka-oka lika'n nun, be sinnin Salisa nvle'n nun, b'a wun-man be. Kpɛkuun, be sinnin Salɔm nvle'n nun, b'a wun-man be. I sin be sinnin Bɛnzamɛn nvle'n nun, b'a wun-man be ekun.

⁵ Kɛ be kpɛnnin Zif nvle'n nun'n, Sail seli i gbanflɛn ng'ɔ nin i kɔ'n kɛ: «E `wɔ klɔ. Sɛ ɔ'a yo-man sɔ'n, mín si ´yaci aflunmun'm be ndɛ, yɛ i akunndan ɔ ´sanngan e ti.»

⁶ Gbanflɛn'n seli i kɛ: «Nian, Nyanmiɛn nuan ijɔfuɛ kun o klɔ nga su. I dunman'n ɔ'a fu kpa. Ndɛ kwlaa ng'ɔ kan'n, ɔ kpɛn su. E `ko wun i wun sɛ ɔ ´kle ye atin nga e `fa su nin o.»

⁷ Sail usɛli i gbanflɛn'n kɛ: «?Sɛ e ju lɔ'n, nguɛ yɛ e ´fa man Nyanmiɛn nuan ijɔfuɛ sɔ nin-ɔn? Kpaun nun-man e bajɛ'n nun kun. E lɛ-man like fi bɔ e ´fa man Nyanmiɛn nuan ijɔfuɛ nin-ɔn. Like fi nun-man é sa nun.»

⁸ Gbanflɛn tɛli Sail su ekun kɛ: «Sika mma kaan kun wo ń sa nun. Sɛ n fa man Nyanmiɛn nuan ijɔfuɛ'n, ɔ ´kle ye atin nga e `fa su'n.»

^9-11 Sail waan: «Man e wɔ e!» Yɛ be fali klɔ nga Nyanmiɛn nuan ijɔfuɛ'n wo su'n i atin nin-ɔn. Kɛ be ´fu klɔ'n i kpɔlɛ'n, talua'm be fin klɔ nun lɔ be su kɔ nzue nun. Yɛ be usali be kɛ: «?Jeliwafuɛ'n wo lɛ?» (Laa, Izraɛl lɔ sɛ be ´ko wun Nyanmiɛn nuan ijɔfuɛ'n i wun'n, be se kɛ e ko wun Jeliwafuɛ'n wun, afin laa be flɛ Nyanmiɛn nuan ijɔfuɛ'n kɛ Jeliwafuɛ.)

¹² Talua'm be tɛli be su kɛ: «Ɛɛn, ɔ o lɛ. Ɔ juli wa-a, ɔ nian cɛ-man. Ndɛkɛn klɔ nunfuɛ'm be ´yi tɛ sraka yiwlɛ lika ng'ɔ o kpɔlɛ su lɔ'n nun lɔ. I ti yɛ ɔ bali-ɔ. Amun `kan amún wun.

¹³ Kɛ amun wlu klɔ'n nun, amun ´to i lɛ. Sɛ amun kan amún wun'n, amun ´to i lɛ ka nan ɔ'a ɔ like dilɛ sraka yiwlɛ lika sɔ nun lɔ. Sɛ ɔ nian ju-man lɔ'n, klɔ nunfuɛ'm be nian di-man like. Afin i yɛ ɔ srɛ su Nyanmiɛn nan be kwlaa bɔ be yia lɛ'n b'a di-ɔ. Ɔ man amun `wɔ icra'n. Amun ´to i lɔ.»

Sail nin Samiɛl be nun yialɛ

¹⁴ Yɛ be ɔli-ɔ. Kɛ be juli klɔ'n nun lɔ'n, be ´nian-an, Samiɛl yɛ ɔ su ba yɛ, ɔ su kɔ kan be yi tɛ lɔ'n.

¹⁵ Kannzu cɛn nga bɔ sɛ i aliɛ cɛn-ɔn, yɛ Sail ´ba'n, Anannganman yili i nglo kleli Samiɛl, ɔ seli i kɛ:

¹⁶ «Ainman dɔ kunngba nga su, n ´fa Bɛnzamɛn akpasua'n su lɔ sran kun ´blɛ wɔ. Sɛ ɔ ba'n, guɛ i ti su ngo man ɔ sie Izraɛl b'ɔ ti min nvle'n. Ɔ wa de min nvle'n Filistifuɛ'm bé sa nun, afin mín nyin o min nvle'n sɔ'n su. Kpanlɛ nga min nvle'n nunfuɛ'm be kpan'n toli min wa.»

¹⁷ Kɛ Samiɛl wunnin Sail'n, Anannganman seli i kɛ: «Sran nga n seli wɔ kɛ ɔ ´sie min nvle'n yɛ ɔ o yɛ.»

¹⁸ Sail wunngeli Samiɛl wun lɔ klɔ'n i anuan nun, ɔ seli i kɛ: «Kle min jeliwafuɛ'n i awlo'n.»

¹⁹ Samiɛl tɛli Sail su kɛ: «M bɔbɔ min yɛ n ti jeliwafuɛ nin-ɔn. Dun mmua man e wɔ kan be yi tɛ lɔ'n. E nin amun e di like ndɛ. Ainman nglɛmun n ko man wɔ atin a ko wɔ. I liɛ'n, sa ng'ɔ o ɔ klun bɔ ɔ waan a ´usa min wun ndɛ'n, n ´kɛn i kwlaa'n n ´kle wɔ.

²⁰ Aflunmun bla nga be mlinnin ɔ'a di le nsan'n, nán ɔ sanngan wɔ akunndan. Be wunnin be, sanngɛ kusu wɔ nin ɔ́ si i awlo'n amun yɛ Izraɛlfuɛ'm be wa fa be wla ´gua amun su-ɔ.»

²¹ Sail tɛli i su kɛ: «N fin Bɛnzamɛn i akpasua'n su. Bɛnzamɛn i akpasua'n yɛ ɔ ti Izraɛl akpasua'm be nun kaan nin-ɔn, yɛ kusu mín si i awlo'n yɛ ɔ ti Bɛnzamɛn awlo'm be nun kaan nin-ɔn. ?Ɔ yo sɛ ti yɛ a kan ndɛ sa kle min-ɔn?»

²² Yɛ Samiɛl fali Sail nin i gbanflɛn'n be ɔli sua lɔ-ɔ. Ɔ fa be sieli i sran dandan'm be tranwlɛ'n nun. Be nga be flɛli be lɛ kɛ be wa di like'n, be ti sran ablasan.

²³ Samiɛl seli aliɛ tɔnfuɛ'n kɛ: «Nnɛn nga n fa mannin wɔ'n, bɔ n seli wɔ kɛ a `sie i ngunmin'n, fa bla.»

²⁴ Nnɛn i walɛ'n nin i lua'n b'ɔ aliɛ tɔnfuɛ tɔnnin'n, ɔ fa jinnin Sail bo, kpɛkuun Samiɛl seli Sail kɛ: «Nnɛn nga e fa sieli wɔ'n yɛ ɔ o lɛ-ɔ, di! Kɛ e flɛflɛ sran mun kɛ be bla'n yɛ e fa sieli wɔ-ɔ.» Le kun sɔ'n nun Sail nin Samiɛl be dili like.

²⁵ Be fɛli i sraka yiwlɛ lika'n sɔ'n su lɔ jrali, nan ɔ nin Samiɛl b'a koko yalɛ sua'n i ti gbagblagba'n su.

Sail i famiɛn bɔ be sieli i'n

²⁶ Ke i aliɛ cɛnnin'n, be tinngeli ndɛ. Kɛ wia'n ´tu i bo'n, Samiɛl flɛli Sail aunngban fawlɛ lɔ, ɔ seli i kɛ: «E wɔ, man n ko sunman wɔ.» Yɛ Sail jasoli nan ɔ nin Samiɛl b'a fa atin'n.

²⁷ Kɛ be juli klɔ'n i tiwa lɔ'n, Samiɛl seli Sail kɛ: «Se ɔ gbanflɛn'n kɛ ɔ dun mmua.» Yɛ ɔ dunnin mmua-a. Samiɛl waan: «Jran man n kan ndɛ kun bɔ Nyanmiɛn waan n kan kle wɔ'n, n kle wɔ.»