1 Samiɛl 7 - NYANMIƐN NDƐ'N 1998

¹ Kirzat-Zearimfuɛ'm be wa fali Anannganman i alaka'n be ɔli. Be ko sieli i Aminadab i awlo b'ɔ o kpɔlɛ'n su lɔ nun, nan b'a fɛ i wa Eleazar b'a sie i kɛ ɔ nian su .

Izraɛlfuɛ'm be Filistifuɛ'm be kwlalɛ Samiɛl yɛ ɔ sie Izraɛl nvle nin-ɔn

² Kɛ be fali alaka'n ɔli Kirzat-Zearim lɔ'n, ɔ cɛli lɔ kpa, ɔ dili afuɛ ablaɔn. Izraɛlfuɛ'm be kwlaa be sun flɛli Anannganman.

³ Yɛ Samiɛl seli be kɛ: «Sɛ amun klo kɛ amun ´sa amún sin amun ´su Anannganman sakpa'n, amun `gua amuɛn nga amun ko tuli be nvle wie be nun bɔ i wie yɛlɛ Astarte be blo. Amun `fa amún wun mantan Anannganman yɛ amun `su i kunngba, kpɛkuun ɔ wa de amun Filistifuɛ'm bé sa nun.»

⁴ Yɛ Izraɛlfuɛ'm be guali amuɛn nga be flɛ be Baal nin Astarte'm be blo nan b'a su Anannganman i kunngba.

⁵ Samiɛl waan: «Amun Izraɛlfuɛ mun kwlaa amun `yia Mizpa, nan n `srɛ Anannganman m `man amun.»

⁶ Yɛ be yiali Mizpa-a. Be sali nzue be guɛli i ase Anannganman i nyrun. Le kun sɔ'n, be cili nglɛmun. Be waan: «E fɔnnin Anannganman i wun.» Mizpa lɛ yɛ Samiɛl yoli Izraɛl nvle'n i siefuɛ nin-ɔn.

⁷ Kɛ Filistifuɛ'm be tili kɛ Izraɛlfuɛ'm b'a yia Mizpa'n, be kpɛnngbɛn nnun'm be ɔli kɛ be nin Izraɛl'n be ´ko kun. Kɛ Izraɛlfuɛ'm be tili'n, srɛ kunnin be Filistifuɛ'm bé wun.

⁸ Izraɛlfuɛ'm be seli Samiɛl kɛ: «Nán yaci e ti srɛlɛ. Kpan flɛ Anannganman e Nyanmiɛn'n man ɔ de e Filistifuɛ'm bé sa nun.»

⁹ Samiɛl fali bua nga b'a kpɛ cro'n kun. Ɔ fɛli i wunmuan'n yili tɛ nga be yrɛ i nnɛn'n kɔlikɔli'n mannin Anannganman. Izraɛlfuɛ'm be ti, Samiɛl sun flɛli Anannganman. Anannganman kusu tɛli i su.

¹⁰ Kɛ Samiɛl ´yi tɛ nga be yrɛ i nnɛn'n kɔlikɔli'n, wuun Filistifuɛ'm be su ba, be su wa fa alɛ'n wla Izraɛlfuɛ'm be sin. Le kun sɔ'n, Anannganman man nyanmiɛn kplali kekle kpa Filistifuɛ'm bé su nun, kpɛkuun Filistifuɛ'm b'a wun-man kɛ be yo be wun-ɔn. Be lɛ wanndilɛ Izraɛlfuɛ'm be nyrun. Nan Izraɛlfuɛ'm b'a kwla be.

¹¹ Kɛ Izraɛlfuɛ'm be fin Mizpa be fiteli'n, be suli Filistifuɛ'm bé su lele juli Bɛt-Kar, be ´kɔ'n, wuun be ´kun be.

¹² Samiɛl fali yɛbuɛ kun sieli i Mizpa nin Sɛn be afiɛn, kpɛkuun ɔ tɔnnin i dunman kɛ Ebɛn-Ezɛr. I waan: «Kɛ ɔ fɛ i laa lele b'ɔ ´fa ju yɛ'n Anannganman ukali ye.»

¹³ Filistifuɛ'm bé nyin guali ase. Anannganman i fanngan'n ti be yacili Izraɛl nvle'n i sin alɛ wlalɛ Samiɛl i nyin su.

¹⁴ Izraɛl klɔ nga Filistifuɛ'm be fali'n, kɛ ɔ fɛ i Ekrɔn b'ɔ fa ju Gat'n, be wa yoli Izraɛlfuɛ'm be liɛ ekun. Izraɛlfuɛ'm be deli be Filistifuɛ'm bé sa nun, kpɛkuun Izraɛlfuɛ'm be nin Amɔrfuɛ'm be trannin fɔuun.

¹⁵ Samiɛl sieli Izraɛl nvle'n lele fa juli i wie cɛn.

¹⁶ Afuɛ nuan kwlaa ɔ sin klɔklɔ'm bé su. Ɔ sin Betɛl nin Gilgal nin Mizpa, ɔ di Izraɛlfuɛ'm be jɔlɛ klɔ'n be kwlaa be su,

¹⁷ kpɛkuun ɔ sɛ i sin Rama. Lɔ yɛ ɔ tran-an. Lɔ yɛ ɔ o yɛ ɔ sie Izraɛl nvle nin-ɔn. Ɔ kplannin Nyanmiɛn sɔwlɛ kun lɛ mannin Anannganman.