1 Samiɛl 6 - NYANMIƐN NDƐ'N 1998

Be fali Nyanmiɛn i alaka'n be sɛli i sin

¹ Anannganman i alaka'n kali Filistifuɛ'm be mɛn'n nun lɔ anglo nso.

² Filistifuɛ'm be flɛli be amuɛn nyrun tranfuɛ ɔ nin be kɔmiɛn difuɛ mun nan b'a usa be kɛ: «?E ´yo Anannganman i alaka'n sɛ? ?E ´yo i sɛ nan y'a fa sɛ i sin i osu lɔ?»

³ Be tɛli bé su kɛ: «Sɛ amun ´fa Izraɛlfuɛ'm be Nyanmiɛn'n i alaka'n be ´sɛ i sin, nán amun fa sɛ i sin sa ngbɛn. Amun `yi afiɛn siesielɛ tɛ be man Anannganman. Kpɛkuun sɛ amun tukpacɛ'n wie'n, i liɛ'n amun ´si sa ti b'ɔ kleli amun yalɛ'n.»

⁴ Be usali kɛ: «?Nguɛ like yɛ e ´fa mɛn i-ɔ?» Yɛ be tɛli bé su kɛ: «Amun `fa sika ɔkwlɛ be yo i kɛ putɛputɛ'n b'ɔ wun be'n sa i sɔ lele nnun. Amun `yo gbekle ba sɔ nnun ekun. Amun `nian Filistifuɛ'm be kpɛnngbɛn'm be nuan'n su, yɛ be `yo-ɔ, afin like kunngba ng'ɔ juli amún su'n, i kunngba'n kusu yɛ ɔ juli amún su kpɛn'm bé su-ɔ.

⁵ Putɛputɛ'n ɔ nin gbekle nga be saci amun mɛn'n, amun `yi be ba. Amun `manman Izraɛl Nyanmiɛn'n. Sɛ ɔ ´yaci amun nin amun mɛn nunfuɛ mun, nin amun amuɛn'm be yalɛ klelɛ o.

⁶ Nán amun yo nyin kekle kɛ Eziptfuɛ mun nin be famiɛn'n be yoli'n sa. Be yoli sɔ kusu-ɔ, Anannganman kleli be yalɛ kpa nan b'a yaci Izraɛlfuɛ'm be nun.

⁷ Amun `yo kakaklolo uflɛ kun. Amun `fa nannin ta nnyɔn bɔ be nian di-man junman le'n amun `fa be minnda kakaklolo'n. Amun `ti bé sin ba mun nan amun `fa be mma sɔ mun sa bé sin be tuin'n nun lɔ.

⁸ Kpɛkuun amun `fa Anannganman i alaka'n be sie i kakaklolo'n nun. Sika ɔkwlɛ like nga amun ´fa man Anannganman kɛ i kpatalɛ like sa'n, amun `fa sie i gbogbo kun nun be `jin i alaka'n wun lɛ, kpɛkuun man kakaklolo'n wɔ.

⁹ Sɛ amun ´nian nan ɔ fa Izraɛl atin'n ɔ kɔ Bɛt-Semɛs ndɛnman'n, wuun Izraɛl Nyanmiɛn'n yɛ ɔ yoli e sa yaya sɔ nin-ɔn. Sɛ ɔ'a yo-man sɔ'n, wuun nɛ́n i yɛ ɔ yoli ye-ɔ. Wuun sa sɔ'n juli sɔ ngbɛn.»

¹⁰ Filistifuɛ'm be yoli i sɔ. Be fali nannin ta nnyɔn be minndali kakaklolo'n. Be tili bé sin mma'm be yacili be be tuin'n nun lɔ.

¹¹ Be fali Anannganman i alaka'n sieli i kakaklolo'n nun ɔ nin gbogbo nga sika ɔkwlɛ gbekle nin putɛputɛ'n i ba nga be yoli'n be o nun'n.

¹² Nannin'm be fali Bɛt-Semɛs atin'n su seiin, b'a ɔ-man bɛ su annzɛ fama su. Be ´kɔ'n, wuun be ´kpan. Filisti kpɛnngbɛn'm be su bé su lele be juli Bɛt-Semɛs anyialiɛ'n su.

¹³ Kɛ ɔ ´yo sɔ'n, wuun Bɛt-Semɛsfuɛ'm be o lika kpɛtɛkplɛɛ nun be ´kpɛ ble. Be ´man bé nyin su-ɔ, alaka'n yɛ. Nanwlɛ ɔ yoli be fɛ dan.

¹⁴ Kɛ kakaklolo'n juli Bɛt-Semɛs lɛ'n bian nga be flɛ i Zozie i fie'n su'n, kpɛkuun ɔ'a jran yɛbuɛ dan kun wun lɛ. Be kpaci kpacili kakaklolo'n i waka'n nun nan b'a fa nannin mun b'a yi tɛ nga be yrɛ i nnɛn'n kɔlikɔli'n b'a man Anannganman.

¹⁵ Levi akpasua sufuɛ'm be yili Anannganman i alaka'n ɔ nin gbogbo nga sika ɔkwlɛ ninnge'm be o nun'n. Be yili be kakaklolo'n nun, yɛ be fa sieli i yɛbuɛ dan'n su. Kpɛkuun le kunngba sɔ nun'n Bɛt-Semɛsfuɛ'm be yili tɛ nga be yra be nnɛn'n kɔlikɔli'n. Be yili tɛ uflɛ mun ekun be mannin Anannganman.

¹⁶ Kɛ Filistifuɛ'm be kpɛnngbɛn'm be wunnin sa sɔ mun'n, be sali bé sin Ekrɔn cɛn kunngba'n nun.

¹⁷ Putɛputɛ'n i ba nga Filistifuɛ'm be fa sika ɔkwlɛ be yoli'n, ɔ ti sa nga be yoli'n i ti kpatalɛ like. Be fa mannin Anannganman. Be nga be yoli mun be yɛ: Asdɔdfuɛ mun, Gazafuɛ mun, Askalɔnfuɛ mun, Gatfuɛ mun, yɛ Ekrɔnfuɛ mun. Klɔ kun su be yo kun klɔ kun su be yo kun.

¹⁸ Sika ɔkwlɛ gbekle'n kusu bé nuan ju kɛ Filistifuɛ'm be kpɛnngbɛn'm be klɔ'm bé nuan fa ju'n sa, afin Filisti kpɛnngbɛn kun lɛ i klɔ nga be si be wun'n, ɔ nin klɔ nga b'a si-man bé wun'n. Ndɛ nin ndɛ Zozie b'ɔ fin Bɛt-Semɛs i fie nun yɛbuɛ dan nga be jinnin Anannganman i alaka'n su'n, ɔ man bé wla tɛ kpɛn sa sɔ'n su.

¹⁹ Bɛt-Semɛsfuɛ'm be niannin Anannganman i alaka'n nun, i ti ɔ nin be nyɛnnin. Ɔ kunnin be nun sran ableso. Klɔ nunfuɛ'm be trannin awlaboɛ nun sa yalɛ dan sɔ'n bɔ Anannganman fa yili bé su'n ti.

²⁰ Be waan: «Nga, sran fi jran Anannganman nyrun-ɔn, ɔ yo-man ye, afin ɔ ti Nyanmiɛn kun bɔ i nzuɛn nin klɔ sran liɛ'n ti-man kun. ?Yɛ wan yɛ e ´fa ko mɛn i nan ɔ'a jaso é wun wa-a?»

²¹ Ɔ man be sunmannin sran Kirzat-Zearimfuɛ bé sin kɛ be se be kɛ: «Filistifuɛ'm be fali Anannganman i alaka'n be sɛli i sin, amun `bla be `wa fa wɔ.»