1 Samiɛl 5 - NYANMIƐN NDƐ'N 1998

Filistifuɛ'm be ndawlɛ

¹ Filistifuɛ'm be fali Nyanmiɛn i alaka'n Ebɛn-Ezɛr lɛ be ɔli Asdɔd.

² Be fali Nyanmiɛn i alaka'n be wluli be amuɛn nga be flɛ Dagɔn'n i sua'n nun. Be sieli i Dagɔn wun lɛ.

³ Nglɛmun kɛ Asdɔdfuɛ mun be jaso'n be ´nian-an, Dagɔn ɔ'a tɔ, i nyin utu ase Anannganman i alaka'n i nyrun lɛ. Yɛ be mɛnnin i su be sieli i osu nun-ɔn.

⁴ Kɛ aliɛ'n cɛnnin nglɛmun'n, be ´nian-an, Dagɔn ɔ'a tɔ, i nyin utu ase Anannganman i alaka'n i nyrun lɛ ekun. I ti'n nin i sa nnyɔn'm b'a bubu be gua anuan nun lɛ. I ba mlomlo yɛ ɔ ka-a.

⁵ I ti yɛ Asdɔd lɔ'n, lele ndɛ, Dagɔn nyrun jranfuɛ'm be nin be kwlaa nga be wlu Dagɔn sua nun'n, be tia-man anuan nun kun nin-ɔn.

⁶ Anannganman kleli Asdɔdfuɛ'm be yalɛ kpa, ɔ man be wunnin nyrɛnnɛn. Ɔ yoli man putɛputɛ wun-wunnin Asdɔd nin i asa'n sufuɛ mun bé wun.

⁷ Kɛ Asdɔdfuɛ'm be wunnin i sɔ'n, be waan: «Izraɛl Nyanmiɛn'n su kle e nin Dagɔn e yalɛ ngboko, nán i alaka'n tran é wun wa kun.»

⁸ Asdɔdfuɛ'm be yiayiali Filistifuɛ'm be kpɛnngbɛn mun. Kɛ be bali'n, be usali be kɛ: «?E ´yo Izraɛl Nyanmiɛn'n i alaka'n sɛ?» Be tɛli be su kɛ: «Man be fa wɔ Gat.» Yɛ be fali Nyanmiɛn i alaka'n wɔli Gat-ɔ.

⁹ Kɛ be fa ɔli Gat'n, Anannganman kleli Gat klɔ'n sufuɛ'm be yalɛ. Be wun-mɛn i yowlɛ kunngba. Sɛ e ´kwla se'n, Anannganman sunmannin putɛputɛ ɔ wa yoli be, i sran dan o, i sran nga be lɛ-man nyrun o! Ɔ lɛ-man kun.

¹⁰ Yɛ be fali Nyanmiɛn i alaka'n wɔli Ekrɔn-ɔn. Kɛ alaka'n juli Ekrɔn lɔ cɛ'n, lɔfuɛ'm be lɛ kpanlɛ. Be waan: «B'a fa Izraɛl Nyanmiɛn'n i alaka'n b'a ba nan ɔ wa kun ye ngba.»

¹¹ Be sunmannin sran kɛ be ko flɛ Filistifuɛ'm be kpɛnngbɛn'm be ngba. Kɛ be bali'n, be seli be kɛ: «Amun `fa Izraɛlfuɛ'm be Nyanmiɛn'n i alaka'n be sɛ i sin i osu, kɛ ɔ yo nan ɔ'a kun-man e nin e nvlefuɛ mun ti.» Kɛ ɔ ´yo sɔ'n, wuun be wun-mɛn i yowlɛ bɔ kunngba klɔ'n nun, b'a wu be klun sɔ mlɔnmlɔnmlɔn'n, wuun Nyanmiɛn kle-man be yalɛ ngowa.

¹² Be nga be wu-man'n, like'n wun-wun be kɛ putɛputɛ sa. Klɔ'n sufuɛ'm be aunnvuɛ sunlɛ'n fu kɔ nyanmiɛn su lɔ.