1 Samiɛl 31 - NYANMIƐN NDƐ'N 1998

Sail nin i mma'm be kunlɛ

¹ Filistifuɛ'm be nin Izraɛlfuɛ'm be kunnin. Izraɛlfuɛ'm be wanndili be nyrun, be wie'm be wuli Gilboa oka'n su.

² Filistifuɛ'm be suli Sail nin i mma'm bé su nan b'a kun Zonatan, nin Abinadab, ɔ nin Malkisia bɔ be ti famiɛn'n i mma mun'n.

³ Kpɛkuun alɛ'n kunman ɔli Sail su. Be nga be to ta'n be ´nian-an, i yɛ ɔ o yɛ. Be toli i ta, ta mma sɛnnin i tɛ kpa.

⁴ Yɛ Sail seli i alɛ ninnge'n suafuɛ'n kɛ: «Yi ɔ tokofi'n fa kun min, ɔ'a yo-man sɔ-ɔ, sran nga b'a wla-man be klɛn yɛ'n be yɛ be wa kun min sa ngbɛn-ɔn, kpɛkuun be ´yo min finfin,» sanngɛ srɛ'n b'ɔ ´kun i alɛ ninnge suafuɛ'n ti'n ɔ'a di-man su. Yɛ Sail bɔbɔ kplɛnnin i tokofi'n asiɛ wun yɛ ɔ tu tɔli su-ɔ.

⁵ Kɛ i alɛ ninnge suafuɛ'n wunnin kɛ ɔ'a wu'n, i kusu ɔ tu tɔli i tokofi'n liɛ'n su, ɔ nin Sail be wuli.

⁶ Sail nin i wa nsan'n, nin i alɛ ninnge'm be nun trafuɛ'n, ɔ nin i sran'm be kwlaa be wuli likawlɛ.

⁷ Kɛ Izraɛlfuɛ nga be o kongo'n i bue kun lɔ'n, ɔ nin be nga be o Zurdɛn i bue kun lɔ'n be tili i kɛ Izraɛlfuɛ'm be su wanndi'n nan Sail nin i mma'm be wuli'n, be yacili be klɔ'n lɛ be wanndili nan Filistifuɛ'm b'a ko fa b'a tran lɛ.

⁸ Kɛ i aliɛ'n cɛnnin bɔ Filistifuɛ'm be bali be kpɔfuɛ'm bé bo ninnge'n be falɛ'n, be ´nian-an, Sail nin i wa nsan mun yɛ be gua Gilboa oka'n su yɛ.

⁹ Be kpɛli Sail ti'n, be yili i alɛ ninnge mun. Be fali ninnge sɔ'm be sinnin be klɔ'm bé su, yɛ be boli jasin fɛ sɔ'm be amuɛn'm bé sua'n nun, ɔ man Filistifuɛ'm be kwlakwla be tili.

¹⁰ I sin, be sieli ninnge sɔ mun amuɛn nga be flɛ i Astarte'n i sua'n nun. Kpɛkuun be fali Sail i fuɛn'n be boboli i talɛ ng'ɔ sisi Bɛt-Sean klɔ'n wun'n su.

¹¹ Zabɛsfuɛ nga be o Galaad akpasua'n su'n be tili sa nga Filistifuɛ'm be fa yoli Sail'n.

¹² Yɛ be nun yakpafuɛ'm be kwlaa be ɔli Bɛt-Sean kɔnguɛ afiɛn. Be ko yili Sail nin i mma'm be fuɛn'm bɔ be sende-sende be klɔ i talɛ'n wun'n. Be fa bali Zabɛs nan b'a yra be.

¹³ I sin be fali be owie'n be ko sieli be Zabɛs lɔ tamaris waka'n bo lɔ. Nan b'a kpɛ srɛ nun le nso.