1 Samiɛl 30 - NYANMIƐN NDƐ'N 1998

David i Amalɛkfuɛ'm bé su sulɛ

¹ I le nsan su'n, kɛ David nin i sran'm be ´ju Ziklag'n, wuun Amalɛkfuɛ'm b'a ba, be nin Zida nvle i bo ngua lɔfuɛ mun, ɔ nin Ziklag lɔfuɛ mun b'a kun, b'a saci Ziklag klɔ'n, b'a wɔ klɔ'n nun.

² Be trali bla mun ɔ nin klɔ'n su sran ngba be lomuɛn, i bakan o, i kpɛnngbɛn o! B'a kun-man sran fi. Be fali be kwlaa'n kpɛkuun be kɔlɛ nun-ɔn.

³ Kɛ David nin i sran'm be ´ju lɔ'n, klɔ'n yɛ b'a wɔ nun yɛ, bé yi nin be mma yasua mun nin be mma bla mun, b'a tra be lomuɛn b'a ɔ.

⁴ Yɛ David nin i sran'm be tikeli bé ti nan b'a sun lelele, siɛn'n be lɛ-man fanngan sun-man kun.

⁵ Be trali David i yi nnyɔn'm be lomuɛn wie, be yɛlɛ: Asinɔam b'ɔ fin Zizreɛl'n, ɔ nin Abigail b'ɔ ti Nabal b'ɔ fin Karmɛl'n i angboti'n.

⁶ David i wla ɔ boli i wun dan, afin sran'm be su kan kɛ be ´kun i yɛbuɛ nun. Afin sran'm be kwlakwla be fali ya be mma yasua nin be mma bla mun be liɛ'n ti, sanngɛ kɛ David fɛ i wla guɛli Anannganman i Nyanmiɛn'n su'n ti'n, Anannganman kusu wlɛli i fanngan.

⁷ David seli Asimelɛk b'ɔ ti Nyanmiɛn nyrun jranfuɛ'n i wa Abiatar'n kɛ: «Fa Anannganman i ninnge bɔ be fa si i klun'n sa'n bla.» Yɛ Abiatar fali be blɛli i-ɔ.

⁸ David fa usali Anannganman kɛ: «?N su alɛ kunfuɛ sɔ'm bé su? ?Sɛ n kɔ'n n ´to be?» Anannganman waan: «Su bé su, a ´to be yɛ a ´de sran nga be trali be lomuɛn'n.»

⁹ Yɛ David nin i sran ya nsiɛn'm be ´kɔ-ɔ. Be ko toli Bɛzɔr nzue ba'n, be wie'm be kali lɛ.

¹⁰ Sran nga fɛlɛ'n ti b'a kwla kpɛ-man Bɛzɔr nzue ba'n ndɛndɛ'n, be ti sran ya nnyɔn. David nin be ya nnan nga mun be suli Amalɛkfuɛ'm be su.

¹¹ Be ko toli Eziptfuɛ kun blo lɔ nan b'a fɛ i b'a blɛ David. Be mɛnnin i kpaun ɔ dili, be mɛnnin i nzue ɔ nɔnnin.

¹² Be mɛnnin i figie mma i gato bue kun, ɔ nin vinyi mma kee sɔlɛ nnyɔn ɔ dili. Kpɛkuun ɔ nyannin wunmiɛn, afin ɔ'a di cɛn klonglo nsan ɔ di-man like ɔ nɔn-man nzue.

¹³ David usɛli kɛ: «?Wan liɛ yɛlɛ wɔ? ?A fin ye sɛ?» I waan: «N ti Ezipt gbanflɛn, Amalɛk bian kun i kanga yɛlɛ min. Min wunnɛn b'ɔ yo min ya'n ti, min min yacili min wa ɔli i le nsan yɛ.

¹⁴ Ɔ nian cɛ-man ngboko, e ko tɔli Keretfuɛ'm be lika ng'ɔ o ngua lɔ'n, nin Zidafuɛ mun, yɛ Kalɛbfuɛ mun be su. E wɔli Ziklag klo'n nun.»

¹⁵ David seli i kɛ: «Yaci ko kle ye kan alɛ kunfuɛ sɔ'm be o'n.» Yɛ Eziptfuɛ'n seli i kɛ: «Sɛ a ta min nda Nyanmiɛn dunman nun kɛ a su kun-man min'n nan a su fa-man min ko wlɛ-mɛn min min i sa nun'n, n ´ko kle wɔ kan be o'n.»

David i Amalɛkfuɛ'm be kwlalɛ

¹⁶ Yɛ ɔ nin David be ɔli-ɔ. Be ´nian-an, alɛ kunfuɛ sɔ'm be yɛ be tru lika'n nun yɛ, ninnge kpanngban nga be nyɛnnin Filistifuɛ nin Zidafuɛ'm be mɛn'n nun lɔ'n, be su di be ´nɔn'n, wuun be ´si able.

¹⁷ David kunnin be aliɛ njɛnniɛn su lele aliɛ fa cɛnnin fa sannin. Sran fi ɔ'a ka-man, san gbanflɛn ya nnan yɛ be fuli nyɔnngɔnmɛn'm be su be wanndili-ɔ.

¹⁸ Like nga Amalɛkfuɛ'm be fali'n, David deli i ngba bé sa nun. Ɔ deli i yi nnyɔn mun.

¹⁹ Sran fi ɔ'a mlin-man, ba kanngan o, kpɛnngbɛn o, yasua o, bla o! Ninnge nga be fali'n, David deli i kwlakwla sɔ'n bé sa nun.

²⁰ David fali be bua nin be nannin mun. Be nga be kankan nnɛn sɔ'm be ´ba'n, wuun be ´se kɛ: «David i ninnge ng'ɔ nyɛnnin i alɛ nun'n yɛ.»

²¹ David wa toli sran ya nnyɔn nga b'a kwla su-mɛn i su'n bɔ be kali Bɛzɔr nzue ba'n nuan lɛ'n. Be wa kpali David ɔ nin sran nga ɔ nin be ɔli'n be atin. Kɛ David nin be yiali'n, ɔ yoli be like. Ɔ usali be kɛ: «?Amún wun lɔuun?»

²² Kpɛkuun sran nga be nin David ɔli'n be nun sran tɛtɛ bɔ be ti anwɛnfuɛ'n be waan: «Be nga be nin ye b'a ɔ-man'n, be liɛ'n, be su nyan-man ninnge nga e deli e kpɔfuɛ'm bé sa nun'n wie, e ´fa bé yi nin be mma mun e ´man be, wuun ɔ'a wie, kpɛkuun man be wɔ.»

²³ David waan: «Aniaan mun, nán amun yo sɔ. Like nga Anannganman ɔ'a man ye'n ti dan, ɔ'a nian é su, i kunngba'n ɔ'a yi alɛ kunfuɛ nga be bali e kunlɛ'n ɔ'a wla é sa nun.

²⁴ ?Wan yɛ ɔ kwla jran amun sin ndɛ nga nun-ɔn? Sran ng'ɔ kunnin alɛ'n, ɔ nin sran ng'ɔ niannin trɔ'm bé su'n, kun su nyan-man like tra-man kun. Be kwlakwla'n be ´cɛ nun sɛsɛsɛ.»

²⁵ Kɛ ɔ fɛ i le kun sɔ nun'n, David fa kacili mmla Izraɛl lɔ. Kɛ e ´se ndɛ yɛ'n be tɛ di su.

²⁶ Kɛ David juli Ziklag klɔ'n su lɔ'n, ɔ fali ninnge ng'ɔ nyɛnnin i alɛ'n nun'n i wie ko mannin Zida kpɛnngbɛn mun ɔ nin i janvuɛ mun. I waan: «Ninnge nga e nin Anannganman i kpɔfuɛ mun e kunnin bɔ n nyɛnnin i bé sa nun'n, amun liɛ kan yɛ ɔ o yɛ.»

²⁷ Ɔ ko mannin Betɛl, nin Ramɔt Negɛb, nin Zatir,

²⁸ nin Arɔɛr, nin Sifmɔt, nin Ɛstɛmɔa,

²⁹ nin Rakal klɔ'm be kpɛnngbɛn'm be wie. Ɔ ko mannin Zɛrakmeɛl, nin Kenfuɛ'm be klɔklɔ'm be su kpɛnngbɛn mun be wie.

³⁰ Ɔ ko mannin Ɔrma, nin Kɔr-Azan, nin Atak,

³¹ nin Ebrɔn klɔ'm be su kpɛnngbɛn'm be wie, ɔ nin lika kwlaa ng'ɔ nin i sran'm be sinnin be su'n be kpɛnngbɛn'm be wie.