1 Samiɛl 3 - NYANMIƐN NDƐ'N 1998

¹ Samiɛl kan'n wo Eli sa nun, ɔ su Anannganman. I blɛ sɔ nun'n, Anannganman ijɔ-man kplakpla kle-man sran, yɛ kusu ɔ fa-man aolia nun like kle-man sran kplakpla.

Samiɛl i flɛlɛ

² Le kun Eli lɛ i lawlɛ nun, kɛ ɔ ´yo sɔ'n, wuun ɔ wun-man ase kpa kun, be flɛ kɛ i nyinma'n ɔ'a si.

³ Samiɛl la Anannganman sua'n nun kan Nyanmiɛn i alaka'n wo lɛ'n. Kɛ ɔ ´yo sɔ'n, wuun kannin ng'ɔ o Nyanmiɛn i sua nun'n tɛ jue.

⁴ Anannganman flɛli Samiɛl. Yɛ Samiɛl tɛli su kɛ: «Nannaan.»

⁵ Yɛ ɔ ´wanndi kɔ Eli wun lɔ-ɔ. I waan: «Nannan, a flɛli min'n m'an ba.» Eli waan: «M'an flɛ-man wɔ. Sa ɔ́ sin ko la.» Yɛ ɔ ɔli ko lali-ɔ.

⁶ Anannganman flɛli i ekun: «Samiɛl!» Samiɛl jasoli ɔli Eli i wun lɔ. I waan: «Nannan, a flɛli min'n m'an ba.» Eli waan: «Mín wa, m'an flɛ-man wɔ. Sa ɔ́ sin ko la.»

⁷ Kɛ ɔ ´yo sɔ'n, wuun Samiɛl nian si-man Anannganman. Anannganman nin i nian ijɔ-man le.

⁸ Anannganman flɛli i ekun, ɔ'a yo kpɛ nsan. Samiɛl jasoli ko toli Eli, yɛ i waan: «A flɛli min'n m'an ba.» Eli wunnin i kɛ Anannganman yɛ ɔ flɛ ba nin-ɔn.

⁹ Yɛ ɔ seli i kɛ: «Kɔ ko la. Sɛ be flɛ wɔ ekun'n, se kɛ: ‹Anannganman, sɛ ɔ wan a ´kan ndɛ-ɔ, kan, n ti ɔ sufuɛ'n, n su o ɔ́ nuan'n bo.› » Yɛ Samiɛl ɔli ko lali ekun-ɔn.

¹⁰ Anannganman bali wa jrannin lɛ. Ɔ flɛli i kɛ ɔ fa flɛli i klikli'n sa. I waan: «Samiɛl, Samiɛl!» Samiɛl waan: «Sɛ ɔ wan a ´kan ndɛ-ɔ, kan, n ti ɔ sufuɛ, n su o ɔ́ nuan bo.»

¹¹ Anannganman seli Samiɛl kɛ: «Sa nga n wa fa yo Izraɛl nvle'n, sran kwlaa ng'ɔ ti i sɔ sa liɛ'n ɔ ´kpiti.

¹² Le kun sɔ nun nyrɛnnɛn sa nga n fuali kɛ n ´fa yi Eli nin i awlofuɛ'm bé su'n, n ´yo be kwlaa kpan, n su yaci-man ba kun lɛ.

¹³ N seli i kɛ nyrɛnnɛn nga n ´fa yi i awlofuɛ'm bé su'n, be ´ka nun titi, afin kɛ i mma'm be yoli min finfin'n, ɔ tili, sanngɛ ɔ'a tu-man be fɔ.

¹⁴ I sɔ'n ti, n fua kleli i awlofuɛ'm be kɛ fɔnlɛ nga Eli i awlofuɛ'm be fɔnnin min wun'n, kannzɛ man be yi tɛ o, annzɛ man be cɛ min like o, n su yaci cɛ-man be le.»

¹⁵ Samiɛl lali, kɛ aliɛ cɛnnin'n, ɔ tikeli Anannganman i sua'n i anuan'n. Srɛ kun i, ɔ kwla kan-man aolia nun like ng'ɔ wunnin i'n kle-man Eli.

¹⁶ Eli flɛli Samiɛl. Ɔ seli kɛ: «Mín wa Samiɛl» ɔ tɛli su: «Nannaan.»

¹⁷ Eli waan: «?Anannganman seli wɔ sɛ? Ndɛ nga Nyanmiɛn kan kleli wɔ'n, nán fia ba kun sa su. Sɛ a fia wie su'n man Nyanmiɛn wun wɔ.»

¹⁸ Yɛ Samiɛl kannin i kwlaa'n kleli i-ɔ. Ɔ'a fia-man ba kun su. Eli waan: «I yɛ ɔ ti Anannganman nin-ɔn, sa nga b'ɔ nian-an, ɔ ti sa kpa'n, man ɔ yo.»

¹⁹ Samiɛl nyin kɔ i nyrun, yɛ Anannganman nin i o nun. Ndɛ kwlaa nga Samiɛl kan'n, Anannganman yo man i kwlakwla'n i su sa'n yo.

²⁰ Izraɛl mɛn wunmuan nun'n, kɛ ɔ fɛ i Dan lele b'ɔ fa ju Beɛr-Seba'n, sran'm be kwlakwla be si kɛ Samiɛl ti Anannganman i nuan ijɔfuɛ kpa kun b'ɔ di nanwlɛ.

²¹ Anannganman ɔ'a yaci-mɛn i wun nglo yilɛ Silo lɔ, afin Silo lɔ yɛ ɔ yi i wun nglo kle Samiɛl-ɔ. Ɔ kɛn i ndɛ mun kle i.