1 Samiɛl 29 - NYANMIƐN NDƐ'N 1998

Filistifuɛ'm be David i bo kanlɛ

¹ Filistifuɛ'm be yiali be sonja akpasua'm be kwlaa Afɛk lɔ, Izraɛlfuɛ'm be kusu be boli be nanmue'n nzue ti ng'ɔ mantan Zizreɛl'n i wun lɔ.

² Kɛ Filisti akpasua'm be ´nanti kɔ'n, be kɔ sran yaya, sran akpi-akpi, bé su kpɛn'm be dun mmua be nyrun. David kusu nin i sran liɛ mun be nin Akis be su bé su.

³ Yɛ Filisti famiɛn i awlo lɔ sran dandan'm be usa kɛ: «?Nguɛ ti yɛ Ebre nga'm be o wa-a?» Akis seli be kɛ: «?Nán David-ɔ? Ɔ ti Sail b'ɔ ti Izraɛl famiɛn'n i sufuɛ, sanngɛ ɔ nin min o wa ɔ'a di afuɛ kun annzɛ nnyɔn bɔbɔ. Kɛ ɔ fɛ i wun mannin min lele b'ɔ ´fa ju ndɛ'n, n nian wun-man kɛ ɔ'a fɔn le.»

⁴ Yɛ Filisti famiɛn i awlo lɔ sran dandan'm be fa ya Akis wun-ɔn, be waan: «Se i kɛ ɔ ɔ, ɔ `sɛ i sin klɔ nga a fa mɛnnin i'n su. Nán man ɔ nin e ɔ alɛ'n kun. Ɔ cɛ-man nan alɛ nun lɔ'n, ɔ'a kaci a tɔ ye su. ?Afin sɛ ɔ'a kun-man ye wafuɛ wie'n, ɔ ´yo sɛ nan i min'n i klun ɔ'a jɔ i wun?

⁵ Nán David sɔ'n yɛ be ´si able be bo be flɛ i kɛ: ‹?Sail kunnin sran akpi, David kusu kunnin sran akpi blu (10.000) nin-ɔn?› »

⁶ Yɛ Akis flɛli David nan ɔ'a se i kɛ: «N kan Nyanmiɛn, Anannganman bɔbɔ si kɛ n lafi ɔ́ su. N klun klo su sakpa kɛ a nin min wɔ alɛ'n, afin kɛ ɔ fi cɛn bɔ a bali mín wun wa lele b'ɔ fa ju ndɛ'n, m'an wun-man kɛ w'a fɔn le, sanngɛ Filisti sran dandan'm be klo-man ɔ sa.

⁷ I sɔ'n ti, kɛ ɔ ´yo nan w'a kun-man Filistifuɛ mun ti'n, sa ɔ́ sin, ndɛ fi nun-man e afiɛn.»

⁸ David usɛli i kɛ: «?Nannan, kɛ n sɔtɔ ɔ sulɛ lele b'ɔ ´fa ju ndɛ'n, nguɛ sa yɛ n yoli bɔ i ti yɛ e nin ɔ kpɔfuɛ mun e kun-ɔn, ɔ yo-man ye-ɔ?»

⁹ Akis tɛli David su kɛ: «M bɔbɔ min n si kɛ ɔ nzuɛn'n ti kpa kɛ Nyanmiɛn i sunmanfuɛ sa, sanngɛ Filisti famiɛn i awlo lɔ sran dandan'm be waan nán a nin ye wɔ alɛ'n.

¹⁰ I sɔ'n ti, a nin ɔ sufuɛ nga a nin be bali'n amun `jaso nglɛmun ndɛ kpa'n kɛ lika'n ´uke'n muaan nan amun wɔ.»

¹¹ Yɛ David nin i sran'm be tinngeli nglɛmun ndɛ kpa nan b'a sa bé sin Filistifuɛ'm be mɛn'n nun. Kɛ ɔ ´yo sɔ'n, wuun Filistifuɛ'm be kusu be su kɔ Zizreɛl.