1 Samiɛl 28 - NYANMIƐN NDƐ'N 1998

¹ I blɛ sɔ nun'n, Filistifuɛ'm be yiayiali be sonja akpasua fanunfanun'n kwlaa lika kun kɛ be nin Izraɛlfuɛ'm be ko kun. Yɛ Akis seli David kɛ: «A nin ɔ sran'm be `ko uka ye alɛ sɔ'n nun. ?A ti?»

² David seli Akis kɛ: «M'an ti, nannan, a wa wun like nga n wa yo'n.» Akis waan: «N ´fa wɔ n ´sie n ti sasafuɛ tititi.»

Sail i baefuɛ bla kun sin kɔlɛ

³ Kɛ ɔ ´yo sɔ'n, wuun Samiɛl ɔ'a wu, wuun Izraɛlfuɛ'm be kwlaa b'a yo i sɛ'n. Be sieli i i klɔ Rama lɔ. Sail kusu tanninnin kɛ nán sran fi nin wunmiɛn'm be ijɔ, yɛ nán sran fi yi wunnzue Izraɛl mɛn'n nun . Sran ng'ɔ yo sɔ'n be ´kun i.

⁴ Filisti sonja nga be yiali'n be kpɛli be ngblaliɛ Sinɛm. Sail kusu yiali Izraɛl sonja'm be kwlaa, be wa kpɛli be ngblaliɛ liɛ Gilboa.

⁵ Kɛ Sail wunnin Filistifuɛ'm be nanmue'n i klun tili i. Srɛ kunnin i kpa.

⁶ Sail usali Anannganman sa, sanngɛ ɔ'a tɛ-mɛn i su, i laliɛ nun o, annzɛ ninnge nga be fa si Nyanmiɛn bɔbɔ klun sa'n i nun o, ɔ nin i nuan ijɔfuɛ'm be nun o.

⁷ Yɛ Sail seli i sonja kpɛn'm be kɛ: «Amun `kunndɛ bla ng'ɔ nin wunmiɛn'm be ijɔ'n kun man n ko wun i wun.» Yɛ be tɛli i su kɛ: «Kun o An-Dɔr.»

⁸ Yɛ Sail yoli i wun kɛ sran ngbɛn wie sa. Ɔ wlɛli i wun tralɛ kɛ sran kun nga'm be sa, yɛ ɔ nin sran nnyɔn be ɔli-ɔ. Be ko toli bla'n kɔnguɛ yɛ Sail seli i kɛ: «N klo kɛ a usa wunmiɛn kun sa a man min. N ´kle wɔ sran nga a ´usɛ i sa'n nan flɛ i.»

⁹ Bla'n seli i kɛ: «Ɔ bɔbɔ a si kɛ Sail kunnin be nga be nin wunmiɛn'm be ijɔ'n ɔ nin wunnzue yifuɛ mun. ?A klo kɛ a ´sua mín nganzua nan a ´kun min ti-ɔ?»

¹⁰ Yɛ Sail tali i nda Anannganman dunman nun, i waan: «N kan Anannganman, sa fi su ju-man ɔ su.»

¹¹ Yɛ bla'n usɛli i kɛ: «?Wan yɛ n flɛ i-ɔ?» Sail waan: «Flɛ Samiɛl man min.»

¹² Kɛ bla'n wunnin Samiɛl'n, ɔ boli awuyomo, ɔ seli Sail kɛ: «Sail yɛlɛ wɔ! ?Ɔ yo sɛ ti yɛ a lakali min-ɔn?»

¹³ Famiɛn'n waan: «Nán srɛ kun wɔ. Kan like nga a wunnin i'n kle min.» Bla'n seli i kɛ: «N wun wunmiɛn kun bɔ i wafa'n ti kɛ nyanmiɛn su lɔ sran sa, ɔ fin asiɛ'n bo lɔ fiteli.»

¹⁴ Sail usɛli i kɛ: «?Ɔ ti wafa sɛ?» I waan: «Bian oke wie-ɔ, tralɛ dan kun wlɛ i wun.» Sail wunnin kɛ Samiɛl-ɔ. Yɛ ɔ kɛnnin i wun ase, ɔ kotoli utuli i nyin ase-ɔ.

¹⁵ Samiɛl usɛli i kɛ: «?Ɔ yo sɛ ti yɛ man a fa min fiteli bɔ a kle min yalɛ sa-a?» Sail waan: «Min akunndan'n ɔ'a sanngan dan. Filistifuɛ'm be nin mín su kun alɛ, kpɛkuun Nyanmiɛn nin min nun-man nun kun. N usɛ i sa-a, ɔ tɛ-man su. Ɔ fɛ-mɛn i ngaliɛ wlɛ-mɛn i nuan ijɔfuɛ'm bé nuan ɔ man-man min kun, kusu ɔ kan-man ndɛ kle-man min laliɛ kun, i ti yɛ n flɛ wɔ nan a `kan like ng'ɔ fata kɛ n yo'n kle min-ɔn.»

¹⁶ Samiɛl waan: «?Yɛ Anannganman nin wɔ nun-man nun kun bɔ ɔ'a kaci ɔ kpɔfuɛ'n, a ba mín wun wunlɛ nan sɛ?

¹⁷ Ndɛ ng'ɔ fa wlali mín nuan bɔ n kan kleli wɔ'n i su sa'n yɛ ɔ su yo-ɔ. Anannganman deli famiɛn bia'n ɔ́ sa nun ɔ fa mannin sran uflɛ, ɔ fa mannin David .

¹⁸ Kɛ a ti-man Anannganman i aniɛn bɔ a tu-mɛn i klunngbɔ'n Amalɛkfuɛ'm be su'n ti yɛ Anannganman kusu yo wɔ sɔ ndɛ-ɔ.

¹⁹ Anannganman wa yi wɔ nin Izraɛl nvle'n ɔ ´man Filistifuɛ mun. Ainman a nin ɔ mma mun amun ´to min wa. Anannganman wa yi Izraɛl alɛ kunfuɛ mun ´man Filistifuɛ mun.»

²⁰ Kɛ Sail tili ndɛ nga Samiɛl kannin'n cɛ'n, i klun tili i sa kplalala! E ´ijɔwa-a, sran tɛnndɛn sɔ'n ɔ'a tɔ ɔ nannan asiɛ wun, afin ɔ lɛ-man wunmiɛn yɛlɛ kɛ kɛ ɔ fɛ nglɛmun lele bɔ aliɛ'n ´fa san b'ɔ ´fa cɛn, ɔ'a di-man like.

²¹ Bla'n wunngeli Sail wun lɛ, ɔ ´nian-an, ɔ su yi cin, yɛ ɔ seli i kɛ: «Nannan nian, n klɛnnin mín wun mannin wie'n, n yoli like nga a seli min kɛ n yo'n.

²² Ndɛ nga n wa kan kle wɔ yɛ'n, fa su. Man m blɛ wɔ like kan nan ´fa tra wɔ anwlɛn nan w'a nyan wunmiɛn a sa ɔ́ sin.»

²³ Sail waan: «Cɛcɛ, n di-man.» Yɛ i sufuɛ'm be nin bla'n be srɛli i lele nan ɔ'a fa be liɛ'n su. Ɔ jasoli asiɛ wun nan ɔ'a tran bɛ'n su.

²⁴ Yɛ ndɛndɛ yɛ bla'n kpɛli i nannin bɔ ɔ'a kpɛ cro b'ɔ tɛ i i sa nun'n i kɔmin-ɔn. Yɛ ɔ fali ble sanmlɛn, ɔ fɔtɔli nan ɔ'a fa tɔn kpaun bɔ kpaun ayre nun-man nun'n.

²⁵ Ɔ fɛli i kwlaa'n fa jinnin Sail nin i su sufuɛ'm bé bo nan b'a di. Kɔnguɛ sɔ nun'n be srɛli atin nan b'a ɔ.