1 Samiɛl 27 - NYANMIƐN NDƐ'N 1998

David wanndi ko fiali Filistifuɛ'm be nvle nun

¹ David seli i klun lɔ kɛ: «Sɛ n ka nga su'n, Sail ´kun min cɛn kun. I sɔ'n ti, n ´kpɛ i kpo n ´wanndi n ´kɔ Filistifuɛ'm be nvle'n nun. Kɛ ɔ ko yo sɔ'n, wuun Sail ɔ'a yaci min su sulɛ Izraɛl mɛn nun'n, wuun m'an nyan ń ti i sa nun.»

² Yɛ David nin i sa nun sran ya nsiɛn mun be jasoli be ko toli Maɔk i wa Akis b'ɔ ti Gat famiɛn nin-ɔn.

³ David nin i sran'm be o Akis wun Gat lɔ. Be nin be osufuɛ mun yɛ be ɔli-ɔ. David kusu nin i yi nnyɔn'm be yɛlɛ Asinɔam b'ɔ fin Zizreɛl'n ɔ nin Abigail b'ɔ ti Nabal i angboti'n b'ɔ fin Karmɛl'n yɛ be ɔli-ɔ.

⁴ Kɛ Sail tili i kɛ David wanndi ɔli Gat'n, ɔ yacili i su sulɛ.

⁵ Le kun David seli Akis kɛ: «Nannan, sɛ a klo min nzuɛn'n, man min atin man n ko tran klɔ nga'm be nun kun su lɔ, afin ɔ nin i fata-man kɛ e nin wɔ e tran famiɛn klɔ'n su wa.»

⁶ I le kunngba sɔ nun'n, Akis fali Ziklag klɔ'n mɛnnin i. I ti yɛ ndɛ nin ndɛ Ziklag ti Zida famiɛn'm be liɛ nin-ɔn.

⁷ Blɛ nga David dili i Filistifuɛ'm be nvle'n nun lɔ'n ti afuɛ kun anglo nnan.

⁸ David nin i sran'm be ko wlu nvle wie nun be nin be ko kun alɛ, be kɔ be ba be kɔ be ba. Nvle sɔ mun yɛlɛ Gersir, nin Gerzɛr, ɔ nin Amalɛk. Kɛ ɔ fin lalafuɛ nun'n nvle sɔ'm, be tran Sir ndɛnman lele ´fa ju Ezipt mɛn'n i nuan.

⁹ Kɛ David ko kwla be'n, ɔ yaci-man sran fi lɛ, i bla o, i yasua o, ɔ kun be! Ɔ fa bua mun, nin nannin mun, nin aflunmun mun, nin nyɔnngɔnmɛn mun, nin tralɛ mun, ɔ nin tannin mun, kpɛkuun ɔ sɛ i sin wa to Akis.

¹⁰ Yɛ Akis a usɛ i kɛ: «?Ninfan yɛ amun kunnin alɛ'n ndɛ-ɔ?» Cɛn wie David waan: «Zida i ngua lika'n nun-ɔn.» Cɛn wie kusu i waan: «Zɛrakmeɛl i ngua lika'n nun,» annzɛ «Kenfuɛ'm be lika ng'ɔ o ngua lɔ'n.»

¹¹ David yaci-man bla annzɛ yasua bɔ kun sa lɛ nan se kɛ ɔ fa ´ba Gat. Afin ɔ bu i akunndan se kɛ, sɛ n fa be n kɔ'n, be ko yiyi e bo kɛ: «Kɛ David yo sa yo sa.»

¹² Blɛ kwlaa nga David dili i Filistifuɛ'm be nvle'n nun lɔ'n, kɛ ɔ yoli sɔ tititi-ɔ. Akis kusu lafi-mɛn i su ngowa. Ɔ se i klun lɔ kɛ: «David ɔ'a klɔklɔ Izraɛlfuɛ'm bɔ be ti i nvlefuɛ mun'n, nga, ɔ wa yo min akua titi.»