1 Samiɛl 24 - NYANMIƐN NDƐ'N 1998

David i Sail kunlɛ bɔ ɔ'a kun-mɛn i'n

¹ David jasoli lɛ ko trannin An-Gedi akpasua'n su lɔ oka-oka'm be nun.

² Kɛ Sail nin Filistifuɛ'm be kunnin alɛ'n guali'n, ɔ tili i kɛ David o An-Gedi aawlɛ'n nun lɔ.

³ Sail fali Izraɛl sonja kpakpa'm be nun akpi nsan (3.000). Yɛ ɔ nin be ɔli David nin i sran'm be kunndɛlɛ-ɔ. Kɛ ɔ ´yo sɔ'n, wuun be kusu be o blo boli'm be kpangba'n i nyrun ndɛnman su lɔ.

⁴ Sail nin i sran'm be sinnin bua'm be lawlɛ ng'ɔ o atin nuan lɛ'n wun lɛ. Sail wunnin yɛbuɛ buɛ kun kpɛkuun ɔ ɔli atrun lɛ, kannzu David nin i sran'm be o yɛbuɛ buɛ sɔ'n i kɔtɔka'n nun lɔ.

⁵ David i sran'm be tuli i aswre kɛ: «Cɛn nga Anannganman seli ɔ kɛ ɔ ´yi ɔ kpɔfuɛ'n ɔ ´wla ɔ́ sa nun'n nan like kwlaa nga a klo kɛ a ´fa yo i'n, a fa yo i'n, cɛn sɔ'n yɛ ɔ o yɛ.» David ko kpɛli Sail i tralɛ'n i nuan njɔlɛ'n.

⁶ Kɛ ɔ kpɛli Sail i tralɛ i nuan njɔlɛ'n, i klun tili i tri.

⁷ Ɔ seli i sran'm be kɛ: «? Anannganman i sran b'ɔ sieli i'n b'ɔ ti min min'n yɛ m bɔbɔ n ´kun i-ɔ? N sa su kan-man Anannganman i sran'n mlɔnmlɔn .»

⁸ Kɛ David kɛn i kɛ nga sa'n, i ti man b'a kwla kun-man Sail. Yɛ Sail fin yɛbuɛ buɛ'n nun fiteli nan ɔ'a kpɛn atin'n su lɔ.

⁹ I osu'n b'ɔ ´cɛ kaan yɛ David kusu fin yɛbuɛ buɛ'n nun fiteli-ɔ. Yɛ ɔ kpan flɛli Sail kɛ: «Nannan, min min!» Yɛ Sail niannin i sin lɔ-ɔ, kpɛkuun David kotoli, ɔ utuli i nyin ase.

¹⁰ Nan ɔ'a usɛ i kɛ: «Kɛ sran'm be se wɔ kɛ: ‹?David bu ɔ́ wun akunndan tɛ'n› ɔ yo sɛ ti yɛ a fa su nin-ɔn?

¹¹ Ɔ bɔbɔ nian, ndɛkɛn Anannganman fali wɔ wlali mín sa nun yɛbuɛ buɛ nga nun wa. Sran'm be se min kɛ n kun wɔ, sanngɛ n sili wɔ aunnvuɛ, min waan: ‹Cɛcɛ, n kun-man min min'n, afin Anannganman fɛ i sieli famiɛn.›

¹² Nannan, ɔ li nian. Ɔ tralɛ'n i nuan njɔlɛ'n yɛ ɔ o mín sa nun yɛ. N kpɛli ɔ tralɛ nuan njɔlɛ sanngɛ m'an kun-man wɔ. ?Kɛlɛ sɛ m bu ɔ́ wun akunndan tɛ'n, sɛ n waan n ´yo nyin kekle ɔ́ su'n, wuun kɛ n ´yo sɔ-ɔ? M'an yo-man wɔ tɛ. Sanngɛ kpɛkuun kunlɛ cɛ yɛ ɔ waan a ´kun min-ɔn, i ti a su mín su sa cɔcɔcɔ.

¹³ Anannganman bɔbɔ yɛ ɔ ´bu ndɛ sɔ nin-ɔn. Mín wun akunndan tɛ'n bɔ a bu'n ti Anannganman ɔ ´tu mín ti ngondin. M bɔbɔ n su ´yo-man wɔ like fi.

¹⁴ Kpɛnngbɛn'm be bu nyanndra kɛ: ‹Sran b'ɔ ti-man kpa'n yɛ ɔ yo klunwi sa-a.› Ɔ man n yo-man wɔ sa fi.

¹⁵ ?Wan yɛ Izraɛl famiɛn'n nin i be su ko kun yɛ? ?Alua fuɛn kɛ min sa'n, sɔsɔwa kan kɛ min sa'n, min-ɔn?

¹⁶ Anannganman bɔbɔ yɛ ɔ ´siesie ye afiɛn ndɛ sɔ nin-ɔn. I bɔbɔ ɔ ´tu mín ti ngondin, ɔ ´de min ɔ́ sa nun.»

¹⁷ Kɛ David wieli ijɔ'n, Sail seli i kɛ: «?Mín wa, David, wɔ yɛ a kan ndɛ nin-ɔn?» Kpɛkuun ploploploplo Sail su sun.

¹⁸ Sail seli David kɛ: «Ɔ ndɛ'n yo fɛ min wun. A yoli min kpa, n kusu n yoli wɔ wlɛ.

¹⁹ Ndɛkɛn, m'an wun i kɛ a ti klun-ufuefuɛ dan nan a klo min sa sakpa. Anannganman yili min wlali ɔ́ sa nun sanngɛ kpɛkuun w'a kun-man min.

²⁰ ?Wan yɛ ɔ nin i kpɔfuɛ be yia kpɛkuun ɔ yo-mɛn i like fi b'ɔ yaci i nun ɔ kɔ kɛ nga sa-a? Sa nga a yo mannin min ndɛ yɛ'n ti man Anannganman man a nyan muae!

²¹ N si jrɛiin kɛ cɛn wie lele wɔ yɛ a ´yo famiɛn nin-ɔn. Izraɛl famiɛn bia'n ɔ ´ka wɔ awlo'n nun.

²² Nan i ti ta min nda Anannganman i dunman nun kɛ a su nunnun-man min dunman mín si i awlo nun nan a su kun-man min mma nin min anunman mun.»

²³ Yɛ David tali Sail nda-a. Yɛ Sail ɔli i awlo-ɔ. David nin i sran'm be kusu be ɔli be fiawlɛ lɔ.