1 Samiɛl 23 - NYANMIƐN NDƐ'N 1998

¹ David tili i kɛ Filistifuɛ'm b'a fa alɛ b'a wla Kɛilafuɛ mun bé sin nan be su fɛn be fie'm bé su ninnge mun.

² Yɛ David usali Anannganman kɛ: «?E nin Filistifuɛ mun e kɔ kun?» Anannganman tɛli i su kɛ: «A nin be ko kun a wa de Kɛilafuɛ mun.»

³ David i sran'm be waan: «Nian, kɛ e o Zida wa'n, srɛ wan ɔ ´kun ye, yɛ kɛ be ´se kɛ e nin Filisti sonja mun e su ko kun'n, i liɛ'n, wuun ɔ'a sreke nun.»

⁴ Yɛ David usali Anannganman ekun sɛ ɔ wɔ o. Anannganman waan: «Jaso kɔ, n fali Filistifuɛ mun n wlali ɔ́ sa nun.»

⁵ Yɛ David nin i sa nun sran'm be ɔli Kɛila-a. Be nin Filistifuɛ'm be ko kunnin. Be fali be nnɛn mun. Be kwlali be kwlalɛ kpa. Ɔ man David deli Kɛilafuɛ mun.

⁶ Kɛ Asimelɛk i wa Abiatar ´wanndi kɔ David sin'n, ɔ fali like nga be fa si Nyanmiɛn klun sa'n ɔ ɔli Kɛila.

⁷ Kɛ Sail tili kɛ David ɔ'a ɔ Kɛila'n, i waan: «Ɛn-ɛɛn! Anannganman ɔ'a yo i atɛ mín sa nun. Kɛ ɔ'a wlu klɔ nga be to i anuan nun ɔ yo ye nun lɛ'n, nán sran yɛ ɔ yoli-ɔ. I bɔbɔ yɛ ɔ'a wlɛ i wun bisua-a.»

⁸ Yɛ Sail yiali Izraɛl sonja'm be ngba kɛ be ko utu David nin i sa nun sran bɔ be o Kɛila'n lɔ nin-ɔn.

⁹ David wunnin kɛ Sail kunndɛ kɛ ɔ ´kun i, i ti yɛ ɔ yo nin-ɔn, yɛ ɔ seli Abiatar b'ɔ ti Nyanmiɛn nyrun jranfuɛ kɛ ɔ fa like nga be fa si Nyanmiɛn klun sa'n ɔ bla.

¹⁰ David waan: «Anannganman b'ɔ ti Izraɛlfuɛ'm be Nyanmiɛn, n tili kɛ Sail su kunndɛ kɛ ɔ ba Kɛila wa nan ɔ ´nunnun klɔ'n min ti.

¹¹ ?Sɛ ɔ ba'n, Kɛila kpɛnngbɛn'm be ´tra min mɛn i? ?Sail ´ba sakpa kɛ n fa tili'n sa?» Yɛ Anannganman b'ɔ ti Izraɛlfuɛ'm be Nyanmiɛn'n tɛli i sufuɛ'n su-ɔ. I waan: «Ɔ ´ba.»

¹² David usali kɛ: «Kɛila kpɛnngbɛn'm be ´kplin su kɛ Sail tra e nin min sran mun?» Anannganman waan: «Ɛɛn! Be ´kplin su.»

¹³ Yɛ David nin i sran kɔe ya nsiɛn'n be tuli be bo Kɛila lɛ be ɔli kan be waan be ´kɔ nin-ɔn. Kɛ Sail tili i kɛ David fin Kɛila wanndi ɔli'n, ɔ'a ɔ-man alɛ'n su kun.

¹⁴ David ko trannin Zif aawlɛ flɛnnɛn nun lɔ nin oka-oka lika'm be nun ndroliɛ dan wie nun. Sail ɔ'a yaci-mɛn i kunndɛlɛ. Nyanmiɛn kusu ɔ'a fɛ-mɛn i ɔ'a mɛn-mɛn i.

¹⁵ David tili i kɛ Sail nin sonja'm be o i kunndɛlɛ, sanngɛ i kusu ɔ o Zif aawlɛ'n nun lɔ, Ɔrsa lɔ.

¹⁶ Sail i wa Zonatan ɔli David wun wunlɛ Ɔrsa lɔ. Ɔ yoli man David i Nyanmiɛn sulafilɛ'n ɔ wa yoli dan.

¹⁷ I waan: «Nán srɛ kun wɔ. Mín si su nyan-man wɔ. Wɔ yɛ a ´yo Izraɛl famiɛn nin-ɔn. N kusu n ´yo wɔ mantanfuɛ. Mín si Sail bɔbɔ si sɔ.»

¹⁸ Be sran nnyɔn'n be tali nda Anannganman i dunman nun. Yɛ Zonatan ɔli i awlo-ɔ. David kusu kali Ɔrsa lɛ.

Sail i David su sulɛ

¹⁹ Ziffuɛ'm be ko toli Sail Gibea lɔ. Be seli i kɛ: «David yɛ ɔ fia e bue liɛ'n su lɔ oka'm be ndroliɛ lika'n nun lɔ lɛ-ɔ. Ɔ o Ɔrsa lɔ Akila kpɔlɛ'n su aawlɛ flɛnnɛn'n i bo ngua lɔ.

²⁰ Nannan, sɛ a klo'n, bla! E ´trɛ i e ´man wɔ.»

²¹ Sail waan: «Man Anannganman yo amun liɛ ye o. Amun liɛ'n amun koko min.

²² Nan yo, amun `ko usa ekun amun `nian kan ɔ wo'n. Amun `si sran ng'ɔ wunnin i'n. Be blɔ kɛ ɔ si gblɛ-ɔ.

²³ Kɛ amun ko si i fiawlɛ mun nan amun ko sie be kwlaa be nzɔliɛ'n, amun wa se min, kpɛkuun e nin amun e su kɔ. Sɛ ɔ tɛ o lɛ'n, n ´kunndɛ i Zida i kɔtɔkakɔtɔka'n kwlaa nun.»

²⁴ Yɛ be jasoli Sail wun lɛ be ɔli Zif-ɔ. Kɛ ɔ ´yo sɔ'n, wuun David nin i sa nun sran'm be o Maɔn aawlɛ'n nin lika kee'n bé bo ngua lɔ.

²⁵ Yɛ Sail nin i sa nun sran'm be ɔli i kunndɛlɛ-ɔ. Kɛ David tili'n, ɔ ɔli kpangba'n i wun lɔ. Ɔ kali Maɔn aawlɛ'n nun lɛ. Kɛ Sail tili'n, yɛ ɔ ɔli i sin Maɔn aawlɛ'n nun lɔ-ɔ.

²⁶ Kɛ Sail ´sin oka'n i bue kun su'n, wuun David kusu nin i sran'm be ´sin oka'n i bue kun su lɔ. David'm be kunndɛ kɛ be ´wanndi Sail nyrun ndɛndɛ be ´kɔ. Sail nin i sran'm be kusu be waan be ´bo sin yia be nan be ´tra be.

²⁷ Kpɛkuun be sunmannin sran kun ɔ'a to Sail, ɔ seli i kɛ: «Be waan a bla ndɛndɛ, Filistifuɛ'm be nin Izraɛlfuɛ'm b'a ba kunlɛ.»

²⁸ Yɛ Sail yacili David i su sulɛ nan ɔ nin Filistifuɛ'm b'a ɔ kunlɛ. I ti yɛ be flɛli lika sɔ'n kɛ be nun titiwlɛ yɛbuɛ nin-ɔn.