1 Samiɛl 2 - NYANMIƐN NDƐ'N 1998

Ani i Nyanmiɛn asenna'n

¹ Yɛ Ani srɛli Nyanmiɛn-ɔn, ɔ seli kɛ: «Anannganman man n klun ɔ'a jɔ dan. Anannganman man m'an kwla man mín ti'n su. E nin min kpɔfuɛ mun e kan-an, ɔ ´kpɛ siɛn'n. Delɛ ng'ɔ deli min'n ti n klun ɔ'a jɔ.

² Klɔ sran i nzuɛn'n nin Anannganman i liɛ'n ti-man kun. Nyanmiɛn uflɛ nun-mɛn i sin. Like uflɛ nun-man lɛ b'ɔ kwla sasa ye-ɔ.

³ Man be yaci ndɛ dandan'm be kanlɛ beblebe'n! Man be yaci ndɛ tɛtɛ'm be kanlɛ, afin Anannganman ti Nyanmiɛn kun b'ɔ si sa'n ngba, yɛ sɛ n ´kwla se'n, ɔ sunnzun sa'n kwlaa i toe'n su.

⁴ Be bɔ be kwla'n be ta'n ɔ'a kpɔ, sanngɛ be nga be ti fakafaka laa'n, b'a nyan wunmiɛn.

⁵ Be nga be ku yili laa'n, be su kunndɛ junman nan b'a nyan aliɛ, sanngɛ be nga awe kunnin be laa'n, be su de wunmiɛn. B'a yaci junman dilɛ. Ɔliɛ bla klun kpanfuɛ'n ɔ'a wu ba kpɛ nso, sanngɛ bla ng'ɔ lɛ ba kaka laa'n, ɔ kwla wu-man ba kun.

⁶ Anannganman man sran wu, i kunngba'n man sran nyan nguan. I kunngba'n ɔ fa sran kɔ blɔlɔ, i kunngba'n ɔ yi sran blɔlɔ lɔ fite.

⁷ Anannganman man sran di yalɛ, i kunngba'n man sran ɔ nyɛn i wun. I kunngba'n ɔ man sran su, i kunngba'n ɔ kan sran ase.

⁸ Nyrɛnnɛnfuɛ ng'ɔ la ndutre nun'n, ɔ nin yalɛfuɛ ng'ɔ o kan be gua wla lɛ'n, ɔ kuku be lɛ, kpɛkuun ɔ man be nin sran dandan'm be tran likawlɛ bia kpakpa'm be su. Afin sɛ n kwla ´se'n, asiɛ'n i ja'm be ti Anannganman'n liɛ. I yɛ ɔ fali mɛn'n takali su-ɔ.

⁹ Ɔ sasa be bɔ bé nyin yi i mun'n, sanngɛ sran tɛfuɛ'm be wu aosin nun. Afin kɛ a wun kɛ sran kun ´nyan kwlalɛ lɛ'n, wuun nɛ́n i bɔbɔ fanngan nun-ɔn.

¹⁰ Anannganman o nglo lɔ yɛ ɔ man nyanmiɛn'n ɔ kpan kplannan kplannan yɛ ɔ fa sɛnngɛn i kpɔfuɛ'm be nun-ɔn. Afin i yɛ ɔ sie mɛn wunmuan nin-ɔn, ɔ fa kwlalɛ mɛn i nvle'n i su famiɛn'n. I yɛ ɔ man sran ng'ɔ kpɛli i'n i kwlalɛ'n yo dan tra su-ɔ .»

¹¹ Kɛ ɔ yoli sɔ'n, Ɛlkana sɛli i sin ɔli Rama. Samiɛl b'ɔ tɛ yo bakan'n ɔ kali Silo lɔ. Ɔ suli Anannganman, Eli b'ɔ ti Nyanmiɛn nyrun jranfuɛ'n i wun lɔ.

Eli i mma'm be aeliɛ tɛtɛ'n

¹² Eli i mma'm be ti finfinfuɛ. Be bu-man Anannganman like fi.

¹³ Nyanmiɛn nyrun jranfuɛ sɔ'm bé sa nga be yo sran mun yɛ. Sɛ sran wie yi tɛ'n, kɛ b'a jin nnɛn'n i sin'n su'n Nyanmiɛn nyrun jranfuɛ'n i sufuɛ'n ´ba'n, atiɛ kun b'ɔ lɛ je nsan'n wo i sa nun,

¹⁴ ɔ fa wla blalɛ sɛ'n, annzɛ sɛ wafa uflɛ'n, annzɛ kasrɔ'n nun. Kɛ ɔ ´yi'n, nnɛn kwlaa ng'ɔ sran atiɛ'n su'n ti Nyanmiɛn nyrun jranfuɛ'n i liɛ. Izraɛlfuɛ kwlaa nga be ba Silo'n, kɛ Eli i mma'm be nin be yo sɔ-ɔ.

¹⁵ Wie liɛ'n, kwlaa nan b'a yra nnɛn lui'n, Nyanmiɛn nyrun jranfuɛ'n i sufuɛ'n ɔ ba, ɔ wa se sran ng'ɔ yi tɛ'n kɛ: «Fa Nyanmiɛn nyrun jranfuɛ'n i nnɛn liɛ ng'ɔ ko nyintɔn'n fa man min.» I waan: «Sɛ a mɛn i nnɛn bewa'n ɔ fa-man, san nnɛn mɔnnɛn yɛ ɔ ´fa-a.»

¹⁶ Sɛ sran'n i waan: «Man be yra nnɛn lui'n ka nan nga a klo i'n, wuun ɔ'a fa'n», ɔ tɛ i su kɛ: «Fa man min bikisa, sɛ ɔ'a yo-man sɔ-ɔ, n ´fɛ i kekle su!»

¹⁷ Eli i mma'm be aeliɛ tɛtɛ nga be yo i Anannganman i nyrun'n yɛ ɔ o lɛ-ɔ. Ɔ ti-man kpa mlɔnmlɔn, afin be yo ninnge nga be fa man Anannganman'n i finfin.

¹⁸ Kɛ ɔ ´yo sɔ'n, wuun Samiɛl kan'n kusu ´di i junman'n Anannganman i nyrun, i lɛn tannin'n ci i bo.

Samiɛl i awlo'n

¹⁹ Afuɛ nuan kwlakwla kɛ i nin nin i si be ´kɔ be afuɛ nuan tɛ'n i yilɛ'n, i nin wu tralɛ kun ko mɛn i.

²⁰ Eli yrali Ɛlkana nin i yi be nguan, ɔ seli kɛ: «Anannganman `man a nin bla nga be wu ba ekun, nan be `sin nga a fa cɛli i'n i osu.» Yɛ be ɔli be klɔ-ɔ.

²¹ Kpɛkuun Anannganman wunnin Ani i aunnvuɛ, nan ɔ'a wu ba yasua nsan nin ba bla nnyɔn ekun. Kɛ Samiɛl ɔ ´di Anannganman i junman kɔ'n, wuun ɔ ´nyin kɔ.

Eli i mma'm be ijɔlɛ b'ɔ ijɔli be'n

²² Eli ɔ'a yo oke. Ɔ tili sa nga i mma'm be fa yo Izraɛlfuɛ mun'n, yɛ ɔ ti i ekun kɛ be nin bla nga be di junman tannin sua nga Anannganman yi i wun nglo nun'n, i anuan nun'n, be la.

²³ Ɔ seli be kɛ: «?Aeliɛ tɛtɛ nga amun yo bɔ sran'm be kan bɔ n ti'n i bo ti sɛ?

²⁴ Min mma mun, sa nga bɔ amun yo bɔ Nyanmiɛn i nvle nunfuɛ'm be kan sin'n, ɔ ti-man kpa mlɔnmlɔn. Nán amun yo sɔ kun.

²⁵ Sɛ sran kun yo i wiengu tɛ'n, Nyanmiɛn nin i be kan. ?Yɛ sɛ sran kun yo Anannganman i sa tɛ'n, wan yɛ ɔ ´kpɛtɛ i-ɔ?» Ba'm b'a fa-man bé su b'a sie-man ndɛ nga bé si kannin'n i bo, afin Anannganman waan be wu ti-ɔ.

²⁶ Samiɛl kan'n kusu ɔ nyin kɔ i nyrun. I wun yo Anannganman ɔ nin sran'm be fɛ.

Eli mma'm bé sa tɛ'n i akatua'n

²⁷ Nyanmiɛn nuan ijɔfuɛ kun wa toli Eli. Ɔ kannin ndɛ nga Anannganman kan kleli i, i waan: «?Blɛ ng'ɔ nannan'm be o Ezipt lɔ famiɛn i awlo lɔ'n, nán min yɛ n yili mín wun nglo n kleli be nin-ɔn?

²⁸ N kpali ɔ nannan Aarɔn Izraɛl akpasua'm be kwlakwla be nun kɛ ɔ yo min nyrun jranfuɛ nan ɔ `kan mín nuan su ndɛ'n kle sran mun, nan ɔ `fu min sɔwlɛ'n su'n, ɔ `yra ansans. N fali Izraɛlfuɛ'm bé tɛ nga be yrɛ i nnɛn'n kɔlikɔli'n n fa mannin i nin i osu nunfuɛ mun.

²⁹ ?Tɛ nga be yi be man min nin like nga be fa cɛ min bɔ n kɛnnin i ndɛ'n, ɔ yo sɛ ti yɛ amun bu be kɛ wla sa nin-ɔn? ?Ɔ yo sɛ ti yɛ a bu ɔ mma'm be sran tra min nin-ɔn? ?Ɔ yo sɛ ti yɛ amun fa nnɛn nga Izraɛlfuɛ'm bɔ be ti min nvlefuɛ'n be man min'n be lika kpakpa mun be di nin-ɔn?

³⁰ I sɔ'n ti, min Anannganman bɔ n ti Izraɛlfuɛ'm be Nyanmiɛn'n, min waan: ‹Laa n seli kɛ wɔ awlo'n, ɔ nin wɔ akpasua'n be ´jran min nyrun be ´yi tɛ tititi.› Sanngɛ siɛn'n, min Anannganman, min waan: ‹Ɔ su yo-man sɔ kun, afin be nga be bu min sran'n, m ´bu be sran. Sanngɛ be nga be yo min finfin'n, be ´wun nyannzuɛn.

³¹ Nian, blɛ kun wa ju bɔ n ´nunnun wɔ awlo, ɔ nin wɔ akpasua'n su sran nga be tɛ yo kpinndin-kpinndin'm be kwlaa. Ɔ man sran oke su tran-man wɔ awlo'n nun kun.

³² Sran kun ´sin ɔ osu Nyanmiɛn sua'n nun. Nyanmiɛn wa man Izraɛl nvle'n i muae, sanngɛ wɔ awlo liɛ'n sran oke su tran-man nun kun le.

³³ Sanngɛ n ´yaci wɔ awlo'n nun sran kun min sɔwlɛ'n i wun lɛ, kɛ ɔ ´yo nan konvi'n, nin awlaboɛ'n ɔ'a wiewie i'n ti. Wɔ awlo nun sran kun nga'm be kwlaa be ´wu be gbanflɛn nun .

³⁴ Sa ng'ɔ wa ju Ɔfni nin Fine bɔ be ti ɔ mma nnyɔn'n bé su'n, ɔ ti min ndɛ nga n ´kɛn yɛ'n i nzɔliɛ. Ba nnyɔn sɔ'm be ´wu le kunngba .

³⁵ I sin, n wa kpa min nyrun jranfuɛ kun b'ɔ ´yo nanwlɛfuɛ, b'ɔ ´yo min klun sa. N ´yo man i osu'n ´taka kpa, ɔ nin famiɛn nga n ko sie'n be ´nanti.

³⁶ Wɔ awlo nun sran ng'ɔ ka lɛ'n, ɔ wa koto i bo, ɔ ´srɛ i sika mma kan nin kpaun sin kan. Ɔ ´se i kɛ tɛ yilɛ i nun junman ng'ɔ o lɛ'n, ɔ mɛn i wie man ɔ di nan ɔ nyɛn i nuan nun like di.› »