1 Samiɛl 17 - NYANMIƐN NDƐ'N 1998

David i Goliat kunlɛ

¹ Filistifuɛ'm be yiali be sonja mun kɛ be ´ko kun alɛ. Be yiali Zida i lika nga be flɛ i kɛ Soko'n nun lɔ. Kpɛkuun be boli be nanmue'n Efɛs-Damim b'ɔ o Soko nin Azeka be afiɛn'n.

² Sail nin Izraɛlfuɛ'm be kusu be yiali be liɛ, be boli be nanmue'n Terebɛnt i kongo'n nun. Yɛ be jranjrannin kɛ be nin Filistifuɛ'm be ´kun.

³ Filistifuɛ'm be o oka'n kun su. Izraɛlfuɛ'm be kusu be o oka'n kun su, kongo'n wo be afiɛn.

⁴ Yɛ sonja'n kun fin Filistifuɛ'm be afiɛn fiteli-ɔ, ɔ ko sin jrannin sonja akpasua nnyɔn'm be afiɛn'n nun. Be flɛ i kɛ Goliat, ɔ fin klɔ nga be flɛ i kɛ Gat'n su. I tɛnndɛn'n fuanfuan mɛtri nsan.

⁵ Aaba kle wo i ti. I blalɛ ng'ɔ fa kɛtɛ i wue su'n ti kilo ablesiɛn.

⁶ I ja be wun katalɛ like'n, ɔ nin i cua'n b'ɔ o i sa nun'n be ti aaba.

⁷ I cua'n i waka'n i dan su ti kɛ tannin wufuɛ'm be kondo'n sa. I cua'n i blalɛ'n i nɔnnin'n tra kilo nso. I nyrɛn nun trafuɛ'n dun mmua i nyrun.

⁸ Ɔ ko sin jrannin, kpɛkuun ɔ se Izraɛl sonja'm be kɛ yoo: «?Ɔ yo sɛ ti yɛ amu'an jranjran sɛsɛ kɛ amun nin sran be su wa kun yɛ? N ti Filistifuɛ, amun kusu amun ti Sail i kanga mun. Amun `yi sran kun man ɔ nin min bo su.

⁹ Sɛ e nin i bla nun nan ɔ kwla min nan ɔ kun min'n, e ´yo amun kanga. Sɛ kusu min yɛ n kwlɛ i nan n kun i'n, amun ´yo e kanga.

¹⁰ Izraɛl sonja mun, m'an wɔ amun safle ndɛkɛn. I sɔ'n ti amun `yi sran kun man e bla nun.»

¹¹ Kɛ Sail nin Izraɛlfuɛ'm be kwlaa be tili Filistifuɛ'n i ndɛ'n, kɛ be usu sa, b'a wie wu mlɔnmlɔnmlɔn.

^12-13 Efrata bian kun tran Bɛtleɛm b'ɔ o Zida akpasua'n su. Be flɛ i kɛ Izai. Sail blɛ su'n, wuun ɔ'a yo oke. Izai lɛ ba yasua mɔcuɛ. I wa'n kun yɛlɛ David. I mma'm be nun kaklaakla nsan be nin Sail be ɔli alɛ kunlɛ. I mma sɔ mun be yɛlɛ: Eliab, Abinadab, yɛ Sama.

¹⁴ David yɛ ɔ ti be kasiɛn nin-ɔn. Kɛ bɔ ba kaklaakla nsan'm be nin Sail ɔli'n,

¹⁵ David kusu jasoli Sail awlo lɔ ɔ ɔli Bɛtleɛm i si i bua'm bé su nianlɛ.

¹⁶ Filisti bian'n yi i wun nglo kle Izraɛlfuɛ mun nglɛmun nin nnɔsua sɔ lele cɛn ba kunngun ablanan.

¹⁷ Cɛn kun Izai seli David kɛ: «Fa ɔrz mma kɛɛnwa bajɛ kun nga, ɔ nin kpaun blu nga fa kɔ ndɛndɛ ko man ɔ niaan mun.

¹⁸ Fromaz blu kusu yɛ, fa ko man be sonja akpi i su kpɛn'n. Nian ɔ niaan'm be osu, sɛ be ti juejue o! Sɛ a ´ba'n, fa bé sa nun like kun bla wa kle min nan n si kɛ lɔ ti kpa.

¹⁹ Be nin Izraɛlfuɛ'm be ngba be o Terebɛnt i kongo'n nun lɔ be nin Filistifuɛ'm be su kun.»

²⁰ Nglɛmun ndɛ kpa'n, David jasoli nan ɔ'a ko yaci bua mun sran kun sa nun kɛ ɔ nian bé su. Kpɛkuun yɛ ɔ suɛli i trɔ'n ɔli ngaliɛ nga i si mɛnnin i'n i kanlɛ-ɔ. Kɛ ɔ ´ju Izraɛlfuɛ'm be nanmue nun lɔ'n, wuun alɛ kunfuɛ'm be su ko jranjran'n, wuun be su bo be sro.

²¹ Izraɛlfuɛ'm be jranjrannin bue kun, Filistifuɛ'm be kusu be o bue kun, bé nyin'n wɔ su.

²² David yacili i trɔ'n trɔ su nianfuɛ'n i sa nun. Ɔ wanndi ɔli alɛ kunwlɛ lɔ. Kɛ ɔ juli lɔ'n, ɔ usɛli i niaan'm be kɛ: «?Amún wun ti kpa?»

²³ Kɛ bɔ David nin be ´koko yalɛ'n, kpɛkuun Goliat b'ɔ ti Filisti bian'n b'ɔ fin Gat'n, ɔ jasoli be nga'm be nun lɔ, ɔ wa jrannin be nyrun wa, kpɛkuun i safle ng'ɔ wɔ i titi'n, ɔ su wɔ i ekun. David tili.

²⁴ Kɛ Izraɛlfuɛ'm be wunnin i'n, be kwlakwla be lɛ wanndilɛ, b'a wie wu mlɔnmlɔnmlɔn.

²⁵ Be waan: «?Amun wun sran ng'ɔ ´ba lɛ'n? E klɔklɔlɛ ti yɛlɛ nga b'ɔ ´tiatia ba lɛ'n. Sran ng'ɔ kun i'n, famiɛn'n ´man ɔ nyɛn i wun, ɔ ´fɛ i wa bla'n mɛn i kɛ ɔ jɛ i. Yɛ kusu i osufuɛ'm be ´nyan bé ti lapo tualɛ'n nun.»

²⁶ David usali sran ng'ɔ nin be jin lɛ'n kɛ: «?Amun waan sran ng'ɔ kun Filistifuɛ sɔ'n nan ɔ yi nzowa ng'ɔ kpɛli Izraɛl'n mɛn i'n, be ´mɛn i nguɛ? ?Nzu sran yɛlɛ Filistifuɛ bɔ b'a wlɛ-mɛn i klɛn'n b'ɔ jaso kpɛ Nyanmiɛn Kpli b'ɔ lafi-man'n i alɛ kunfuɛ'm be nzowa sɔ-ɔ?»

²⁷ Like nga be waan be ´man sran ng'ɔ ´kun i sɔ sran liɛ'n, be kan kleli i.

²⁸ Kɛ David ´usa sa'n, i nyrun kpɛnngbɛn yasua'n bɔ be flɛ i Eliab'n, ɔ tili nan ɔ'a fɛ i wun ya. Ɔ usɛli i kɛ: «?A ba nzu yolɛ wa? ?Wan sa nun yɛ a yacili ɔ bua mun aawlɛ'n nun lɔ-ɔ? Man kɛ ɔli a sro-man sa, ɔ gblɛ ba! Alɛ'n i nianlɛ cɛ ti yɛ a bali-ɔ.»

²⁹ David waan: «?Sa ngbɛn bɔ n usali nin, nguɛ yɛ n yoli-ɔ?»

³⁰ Kpɛkuun David jasoli i wun lɛ, ɔ ɔli sran uflɛ wun lɔ. Ɔ usali sa kunngba'n. Be kusu ndɛ nga be kan kleli i klikli nun'n, yɛ be kan kleli i-ɔ.

³¹ David liɛ ng'ɔ kannin'n, sran'm be tili. Be ko kan kleli Sail, nan Sail ɔ'a yi sran b'a ko flɛ David.

³² David seli Sail kɛ: «Nannan, ɔ ka Filistifuɛ ng'ɔ o lɛ'n ti'n, nán amun klun ti amun. M bɔbɔ min e nin i e ´ko kun.»

³³ Sail tɛli David su kɛ yoo: «Ii, cɛcɛ! A nin Filistifuɛ ng'ɔ o lɛ'n be kwla kun-man. A tɛ yo gbanflɛn kan, i kusu i liɛ'n, ɔ nin i alɛ kunlɛ'n fin-man ndɛ, ɔ nin fin i kaan nun.»

³⁴ David seli Sail kɛ: «Nannan, kɛ n ´nian mín si i bua'm bé su'n, sɛ asɔmɔli o, wie kusu nnɛn ngble bɔ be flɛ i urs nin o, sɛ wie fa bua'm be nun kun'n,

³⁵ n fuɛn n ko fin i like, kpɛkuun n de bua'n i nuan nun. Sɛ i waan ɔ ´yo min like'n, n sɔ i kɔmin nun ndrɛ'n, m bo i lele n kun i.

³⁶ Kɛ n fa kunnin asɔmɔli mun nin urs mun'n yɛ n ´fa kun Filistifuɛ bɔ b'a wlɛ-mɛn i klɛn'n nga-a. Kɛ b'ɔ kpɛli Nyanmiɛn b'ɔ lafi-man'n i alɛ kunfuɛ'm be nzowa'n ti,

³⁷ Anannganman b'ɔ deli min asɔmɔli mun nin urs'm bé sa nun'n, i bɔbɔ ɔ ´de min Filistifuɛ'n i sa nun.» Kɛ David kannin sɔ'n, Sail seli i kɛ: «Kɔ, man Anannganman ko sunman wɔ!»

³⁸ Sail fɛli i alɛ tralɛ'n wlali David i wun. Ɔ fɛli i aaba kle'n wlɛli i ti, yɛ ɔ fɛli i wue'n su katalɛ like'n wlɛli i-ɔ.

³⁹ Ɔ fɛli i tokofi'n sannin blalɛ ng'ɔ kɛtɛ i wue'n su'n nun. I waan ɔ ´nanti, sanngɛ kɛ ɔ yo-mɛn sɔ titi'n ti'n, ɔ nanti-ɔ, ɔ yo-man ye, afin ɔ nian wlɛ-mɛn i sɔ like'n wie le. Nan ɔ'a se Sail kɛ: «N ´fa nga n nanti-ɔ, ɔ yo-man ye, afin n nian wlɛ-mɛn i sɔ like'n wie le.» Yɛ David yiyili be-ɔ.

⁴⁰ David fɛli i kpɔnman'n, kpɛkuun ɔ ɔli nzue ba'n i nuan lɔ. Ɔ ko fali yɛbuɛ treketreke nnun. Ɔ fa wlɛli i pata ng'ɔ fa kɔ nnɛn kankanlɛ'n, b'ɔ srɛ i wun'n nun, kpɛkuun ɔ tili Goliat ndɛnman ɔli. I kpafloko'n wo i sa nun.

⁴¹ Yɛ Goliat kusu ´ti nyanman lɔ ´ba-a. I nyrɛn nun trafuɛ'n dun mmua i nyrun.

⁴² Kɛ Filisti bian'n wunnin David'n, ɔ'a bu-mɛn like fi, afin David tɛ yo gbanflɛn kan, ɔ ti kpinndin-kpinndin, i nyrun klanman kan.

⁴³ Filisti bian'n seli David kɛ: «?A bu min alua ti yɛ a nin min ´ba kunlɛ-ɔ, a fa waka-a?» Yɛ ɔ fɛli i amuɛn'n wuɛli i-ɔ. Kpɛkuun ɔ seli i ekun kɛ:

⁴⁴ «Bla wa man n kun wɔ nan n `fa ɔ fuɛn'n m man anunman nin blo nnɛn mun.»

⁴⁵ David kusu tɛli i su kɛ: «A nin min ´ba kunlɛ-ɔ, tokofi nin cua, ɔ nin ta yɛ a fa ba-a. N liɛ'n, Anannganman b'ɔ sie mɛn wunmuan'n, i dunman'n yɛ n fa ba-a. Anannganman b'ɔ ti Izraɛl'n i ti alɛ kunfuɛ'n bɔ a kpɛli i nzowa'n, i dunman'n yɛ n fa ba-a.

⁴⁶ Ndɛ aliɛ ba liɛ'n nun'n, Anannganman ´fa wɔ wla min sa nun, n ´kun wɔ, n ´kpɛ ɔ́ ti'n. N ´fa Filisti sonja'm be fuɛn'n m ´man anunman nin blo nnɛn mun ndɛ aliɛ ba liɛ'n nun. Ɔ man mɛn wunmuan'n ´si kɛ, Nyanmiɛn jin Izraɛlfuɛ'm be sin sakpa.

⁴⁷ Yɛ kusu, sran nga b'a yia kukuku yɛ'n be ´si kɛ nán tokofi, annzɛ kusu cua yɛ Anannganman fa de sran-an, afin Anannganman yɛ ɔ kwla-a. Ɔ ´fa amun wlɛ é sa nun.»

⁴⁸ Kɛ e ´ijɔ wa-a, wuun Goliat ɔ'a tin i wun ase ekun, ɔ su tiatia kɔ David wun lɔ.

⁴⁹ Yɛ David kusu ´fa wanndilɛ'n ɔ ´kɔ i atin kpalɛ-ɔ. Kɛ ɔ ´wanndi kɔ'n, ɔ wlɛli i sa i pata'n nun, ɔ yili yɛbuɛ kun nan ɔ'a fa wlɛ i kpafloko'n nun, kpɛkuun flala! Yɛ ɔ toli-ɔ, kpɛkuun kpo! Yɛbuɛ'n ɔ'a ko fin Goliat i ngban kpa'n su, kpɛkuun yɛ pɔɔn yɛ ɔ wluli i ti nun-ɔn! Kpɛkuun gblu! Yɛ ɔ tɔli-ɔ. I nyin'n utuli ase kplu!

⁵⁰ Kɛ David fa kwlali Goliat yɛ kɛ ɔ kunnin i kɛ nga sa. Ɔ ´kun i'n, ɔ'a fa-man tokofi. Kpafloko nin yɛbuɛ kun yɛ ɔ fa kunnin i-ɔ.

⁵¹ Yɛ David wanndi ko jrɛnnin i su-ɔ, yɛ ɔ cuɛnnin Goliat bɔbɔ i tokofi ng'ɔ o i bo i bua'n nun, yɛ kpo, yɛ ɔ ´fa kpɛ i ti nin-ɔn. Kɛ Filistifuɛ'm be ´nian bɔ be safunyrɛn'n ɔ'a wu'n, kpɛkuun be su wanndi. Kɛ be ´wanndi be ´kɔ'n,

⁵² yɛ Izraɛlfuɛ nin Zidafuɛ'm be jasoli yɛ be kpannin-ɔn. Be bo sroli. Nan b'a su bé su lele b'a ko guɛ i Gat nin Ekrɔn nuan lɔ. Filistifuɛ'm be fuɛn sanndi Saaraim atin'n nun lele fa ju Gat nin Ekrɔn lɔ.

⁵³ Izraɛlfuɛ'm be yacili Filistifuɛ'm bé su sulɛ, nan b'a sa bé sin Filistifuɛ'm be nanmue'n nun wa. Be wa isali bé bo ninnge mun.

⁵⁴ David fali Filisti bian'n i ti'n wɔli Zerizalɛm, sanngɛ ɔ fɛli i alɛ ninnge mun fa siesieli i bɔbɔ i sua liɛ'n nun.

Zonatan nin David be janvuɛ tralɛ

⁵⁵ Kɛ David nin Filisti bian'n be ´kɔ tulɛ bɔ Sail wunnin i'n, ɔ usali sonja'm bé su kpɛn bɔ be flɛ i Abnɛr'n i kɛ: «?Wan li wa yɛlɛ gbanflɛn sɔ'n?» Abnɛr waan: «Sɛ n se kɛ n si i'n, wuun m'an bua ato.»

⁵⁶ Yɛ famiɛn'n seli i kɛ: «Usa man be kle wɔ sran nga i wa yɛlɛ gbanflɛn sɔ'n.»

⁵⁷ Kɛ David ko kunnin Filisti bian'n bali'n, Abnɛr fɛli i ɔli Sail wun lɔ. Kɛ ɔ ´yo sɔ'n, wuun Goliat i ti'n tɛ o David i sa nun.

⁵⁸ Yɛ Sail usɛli i kɛ: «?Gbanflɛn, wan wa yɛlɛ wɔ?» David seli i kɛ: «Ɔ sufuɛ bɔ be flɛ i Izai'n, b'ɔ o Bɛtleɛm'n i wa yɛlɛ min.»