1 Samiɛl 16 - NYANMIƐN NDƐ'N 1998

David i famiɛn sielɛ

¹ Anannganman seli Samiɛl kɛ: «?Sail ti a su yaci-man kokolɛ'n? N yili i ase wieli. Ɔ su yo-man Izraɛl famiɛn kun. Fa ɔ nnɛn wɛ'n, gua nun ngo nan kɔ Izai ng'ɔ o Bɛtleɛm i wun lɔ. I wa'm be nun kun yɛ m'an fɛ i kɛ ɔ wa yo famiɛn nin-ɔn.»

² Samiɛl waan: «?N ´yo sɛ nan m'an wɔ? Sɛ Sail ti'n, ɔ ´kun min.» Anannganman waan: «Fa nannin nga b'a kpɛ cro'n kun nan se kɛ: ‹N wa yi tɛ m ´man Anannganman.›

³ Kpɛkuun flɛ Izai tɛ sɔ'n i yilɛ bo. Like nga a ko yo'n n ´kle wɔ. Sran nga n kle wɔ kɛ a guɛ i ti su ngo'n yɛ guɛ i ti su ngo-ɔ.»

⁴ Yɛ Samiɛl yoli like nga Anannganman seli i kɛ ɔ yo nin-ɔn. Ɔ ɔli Bɛtleɛm. Bɛtleɛm klɔ'n su kpɛnngbɛn'm be lɛ usulɛ, yɛ be wa toli i-ɔ. Be usɛli i kɛ: «?E wun wunlɛ wɛtɛɛ-ɔ?»

⁵ I waan: «Ɛɛn! M bali kɛ n wa yi tɛ m man Anannganman. Ɔ mɛn i ti amun `siesie amun nin Nyanmiɛn amun afiɛn nan amun `bla tɛ yilɛ'n bo.» Samiɛl siesieli Izai nin i mma'm be nin Nyanmiɛn be afiɛn nan ɔ'a flɛ be tɛ'n i yilɛ bo.

⁶ Kɛ be juli lɛ bɔ Samiɛl wunnin Eliab cɛ'n, ɔ seli i klun lɔ kɛ: «Ɛn-ɛɛn! Anannganman i sran ng'ɔ kɛn i ndɛ'n yɛ ɔ o yɛ.»

⁷ Sanngɛ Anannganman seli Samiɛl kɛ: «Nán niɛn i nyrun waka'n ti, ɔ nin i tɛnndɛn b'ɔ ti'n ti, nɛ́n i yɛ n kɛn i ndɛ nin-ɔn. Min akunndan nin sran'm be liɛ'n ti-man kun, afin sran'm be nian nga be nyinma wun i'n, sanngɛ min liɛ'n, n nian lele ju anwlɛn'n i bo lɔ.»

⁸ Yɛ Izai flɛli Abinadab kɛ ɔ ko jran Samiɛl i nyrun lɛ. Samiɛl waan: «Nɛ́n i yɛ Anannganman fɛli i-ɔ.»

⁹ Yɛ Izai man Sama bali-ɔ. Samiɛl waan: «Nɛ́n i yɛ Anannganman fɛli i-ɔ.»

¹⁰ Izai man i mma yasua nso'm be wa fa bé wun kleli Samiɛl. Samiɛl seli i kɛ: «Anannganman ɔ'a fa-man be nun wie fi.»

¹¹ I sin ɔ usali Izai kɛ: «?Ɔ mma yasua'm be ngba yɛ?» I waan: «Be nun kaan'n yɛ ɔ ka-a, i yɛ ɔ nian bua'm bé su-ɔ.» Samiɛl seli Izai kɛ: «Man be ko flɛ i. Sɛ ɔ nian ba-man'n, e nian yi-man tɛ'n.»

¹² Yɛ Izai man be ko flɛli i-ɔ. Gbanflɛn sɔ'n ti kpinndin-kpinndin, i nyinma'm be ti cɛnjɛiin, i nyrun'n ti saun kpa, yɛ Anannganman seli Samiɛl kɛ: «Jaso guɛ i ti su ngo, i-ɔ.»

¹³ Samiɛl fɛli i nnɛn wɛ'n nan ɔ'a guɛ i ti su ngo i niaan'm be nyrun lɛ. Kɛ ɔ fɛ i lɛ'n, Anannganman i Wawɛ'n jrali David su. Samiɛl kusu jasoli nan ɔ'a ɔ Rama.

¹⁴ Kɛ ɔ ´yo sɔ'n, wuun Anannganman i Wawɛ'n ɔ'a jaso Sail su. Anannganman sunmannin wawɛ tɛ kun, yɛ wawɛ tɛ sɔ'n ɔ kleli i yalɛ.

¹⁵ Sail i sufuɛ'm be seli i kɛ: «Nyanmiɛn yɛ ɔ'a sunman wawɛ tɛ kun yɛ ɔ kle wɔ yalɛ yɛ.

¹⁶ Nannan, e ti ɔ sran, sɛ a klo'n, man e ko kunndɛ sran kun b'ɔ si jru bo'n. I liɛ'n, kɛ wawɛ tɛ'n ɔ ba'n, ɔ ´bo jru kpɛkuun ɔ ´yaci wɔ yalɛ klelɛ.»

¹⁷ Sail tɛli i sufuɛ'm be su kɛ: «Yoo, n tili! Amun `ko kunndɛ ngowa kanfuɛ sɔ'n nan amun `fɛ i bla.»

¹⁸ Sail i sufuɛ kun waan: «M bɔbɔ n si gbanflɛn kun. Izai ng'ɔ o Bɛtleɛm'n i wa-a. Ɔ si ngowa sɔ'n kan kpa. Kusu ɔ ti sran kpa. Ɔ ti yakpafuɛ, ɔ si ijɔ, ɔ ti klanman, yɛ Anannganman nin i o nun.»

¹⁹ Yɛ Sail sunmannin sran Izai sin, kɛ ɔ ko se i kɛ ɔ fɛ i wa bɔ be flɛ i David'n ng'ɔ niɛn i bua'm be su'n blɛ i.

²⁰ Yɛ Izai fali kpaun, ɔ nin nzan kplo kun, ɔ nin boli nga b'a kpɛ cro'n kun ɔ fa sieli aflunmun kun su, yɛ ɔ fa be mannin David kɛ ɔ fa man Sail.

²¹ Kɛ David juli Sail wun lɔ b'ɔ wunnin i'n, Sail kloli i kpa. Ɔ fɛli i fa yoli i alɛ ninnge suafuɛ.

²² Sail ko mannin Izai i ngaliɛ kɛ: «David i wun yo min fɛ. I ti n klo kɛ ɔ tran mín wun wa di min junman.»

²³ Kɛ wawɛ tɛ'n bɔ Nyanmiɛn sunmɛnnin i'n ɔ ko tɔ Sail su'n, David fɛ i jru'n ɔ bo, kpɛkuun wawɛ sɔ'n ɔ jaso i su. Ɔ kle-mɛn i yalɛ kun.