1 Samiɛl 15 - NYANMIƐN NDƐ'N 1998

Nyanmiɛn i Sail i ase yilɛ

¹ Samiɛl seli Sail kɛ: «Anannganman yɛ ɔ sunmannin min kɛ n fa wɔ n sie i nvle'n i su famiɛn-ɔn. I sɔ'n ti, tie Anannganman i nuan ndɛ'n.

² Anannganman b'ɔ sie mɛn wunmuan'n waan: ‹Kɛ bɔ Izraɛlfuɛ'm be fin Ezipt ´ba bɔ Amalɛkfuɛ'm be buli be nyrun atin'n nun bɔ be waan nán be sin'n ti'n, e nin be y'a nyɛn.

³ I ti kɔ ko kun Amalɛkfuɛ mun, nunnun Amalɛkfuɛ'm bé sa nun ninnge'n kwlaa. Nán kun sa ka lɛ. Kun sran'm be kwlaa, i bla o, i yasua o, i ba kanngan o, i ba nɔnman o! Kun nnɛn'm be kwlaa, i nannin o, i bua o, i nyɔnngɔnmɛn o, i aflunmun o!› »

⁴ Yɛ Sail flɛli Izraɛlfuɛ mun-ɔn. Ɔ kali be Tɛlaim lɔ. Be ti sonja akpi-akpi-ya-nnyɔn (200.000), Zida sran'm be ti akpi blu (10.000).

⁵ Kɛ Sail juli Amalɛkfuɛ'm be klɔ'n wun lɛ'n, ɔ ko bu sali kongo'n nun.

⁶ Yɛ ɔ seli Kenfuɛ'm be kɛ: «Amun `jaso Amalɛkfuɛ'm bé wun wa wɔ mmua. Sɛ ɔ'a yo-man sɔ-ɔ, ɔ cɛ-man nan m'an kun amun wie. Amun liɛ'n, kɛ Izraɛlfuɛ'm be fin Ezipt ´ba'n, amun yoli be kpa.» Yɛ Kenfuɛ'm be cuɛnnin bé wun-ɔn.

⁷ Nan Sail ɔ'a kwla Amalɛkfuɛ mun kɛ ɔ fɛ i Avila lele fa ju Sir aawlɛ'n nun lɔ, Ezipt lika ng'ɔ kpɛ wia afiliɛ lɔ'n.

⁸ Ɔ trali Agag b'ɔ ti Amalɛk famiɛn'n, ɔ'a kun-mɛn i, sanngɛ ɔ kunnin sran'm be kwlaa.

⁹ Sail nin i sa nun sran'm be yacili Agag lɛ. Nannin kpakpa mun, nin bua kpakpa mun, nin nnɛn nin nannin ba nga b'a lo mun, nin ninnge nga be ti kpa mun be yacili be lɛ, b'a saci-man be. San nga bɔ be bɔn-man like fi'n, bɔ be fa-a, ɔ fa-man'n, yɛ be nunnunnin be-ɔ.

¹⁰ Yɛ Anannganman seli Samiɛl kɛ:

¹¹ «Sail i famiɛn sielɛ nga n fɛ i sieli yɛ'n, ɔ yo min ya kpa. Sail nin min nun-man nun kun, ɔ fa-man min ndɛ'n su kun.» Ndɛ sɔ'n yoli Samiɛl ya kpa. Kɔnguɛ wunmuan'n nun'n, ɔ sun flɛli Anannganman.

¹² Nglɛmun ndɛ kpa'n, ɔ jaso ɔli Sail wun wunlɛ. Yɛ be seli i kɛ: «Sail ɔli kɛ ɔ ko ´kplan nzɔliɛ like kun Karmɛl lɔ, kpɛkuun ɔ fɛli i lɛ ɔli Gilgal.»

¹³ Kɛ Samiɛl juli Sail wun lɛ'n, Sail seli i kɛ: «Man Anannganman yo ɔ liɛ ye! N niannin like nga Anannganman waan n yo su'n n yoli!»

¹⁴ Yɛ Samiɛl usɛli i kɛ: «Yɛ onin yɛlɛ bua nin nannin nga n ti be kpanlɛ lɛ'n?»

¹⁵ Sail waan: «Sonja mun yɛ be fali be Amalɛk lɔ bali-ɔ. Be waan be ´yaci bua nin nannin kpakpa'm be lɛ nan be ´fa yi tɛ man Anannganman b'ɔ ti ɔ Nyanmiɛn'n. E nunnunnin i onga'n kwlaa kpan.»

¹⁶ Samiɛl waan: «Muan ɔ́ nuan lɛ man n kan ndɛ nga Anannganman kan kleli min ndɛ kɔnguɛ'n n kle wɔ.» Sail waan: «Kan.»

¹⁷ Samiɛl waan: «Laa'n, a bu-man ɔ́ wun sran dan, sanngɛ ndɛ wɔ yɛ a ti Izraɛl akpasua'm bé su kpɛn nin-ɔn. ?Nán Anannganman bɔbɔ yɛ ɔ sieli wɔ kɛ a yo Izraɛl famiɛn nin-ɔn?

¹⁸ Yɛ Anannganman sunmannin wɔ b'ɔ seli wɔ kɛ: ‹Kɔ ko nunnun Amalɛkfuɛ'm bɔ be ti sa tɛ yofuɛ'n, nan a nin be `kun lele man be nunnun'n.›

¹⁹ ?Ɔ yo sɛ ti yɛ a ti-man Anannganman i nuan ndɛ'n bɔ a fali bé bo ninnge'n wie-ɔ? ?Ɔ yo sɛ ti yɛ a fɔn Anannganman i mmla nin-ɔn?»

²⁰ Sail tɛli Samiɛl su kɛ: «N tieli Anannganman nuan ndɛ'n. N fali ndɛ ng'ɔ kan kleli min'n su. N fali Agag b'ɔ ti Amalɛk famiɛn'n m bali. Kusu n kunnin Amalɛkfuɛ kun nga'm be ngba.

²¹ Sonja'm be fali bua nin nannin nga be ko nunnun be'n i nun kpakpa mun, be fa be bali kɛ be wa fa yi tɛ ´man Anannganman b'ɔ ti ɔ Nyanmiɛn'n Gilgal lɔ.»

²² Yɛ Samiɛl waan: «?Tɛ'm be yilɛ'n li yɛ Anannganman kunndɛ-ɔ, annzɛ i ndɛ'm be su falɛ nin-ɔn? Nian, ainyiɛ'n flunman tra tɛ yilɛ'n, yɛ i ndɛ'm be su falɛ'n flunman tra bua'm be lui'n.

²³ Nyin kekle nin wunnzue yilɛ'n be sɛ. Bé wun bɔ be kɛn-mɛn i ase'n kusu nin amuɛn sɔlɛ'n be sɛ. Kɛ bɔ a yili Anannganman i ndɛ'n i blo'n, i ti i kusu ɔ'a yi wɔ blo wie. Ɔ man a su yo-mɛn i nvle'n i su famiɛn kun.»

²⁴ Sail tɛli Samiɛl su kɛ: «M'an yo sa tɛ, m'an fa-man Anannganman nin wɔ amún nuan ndɛ'n su. Srɛ kunnin min sran'm bé wun yɛ man n yoli nga be seli min nin-ɔn.

²⁵ Nan i ti yaci mín sa tɛ'n cɛ min, nán yi min ase, man n ko koto Anannganman bo.»

²⁶ Samiɛl tɛli Sail su kɛ: «Min nin wɔ e su san-man nun e kɔ-man. A yili Anannganman i nuan ndɛ'n i blo. Anannganman kusu ɔ'a yi wɔ blo. Ɔ man a su yo-man Izraɛl famiɛn'n kun.»

²⁷ Kɛ Samiɛl waan ɔ ´kpɛ i wun nan ɔ ´kɔ'n, Sail trɛli i tralɛ'n i nuan njɔlɛ'n, kpɛkuun cuaa ɔ'a ti.

²⁸ Yɛ Samiɛl seli kɛ: «Izraɛl'n i su famiɛn b'ɔ a ti'n ɔ ti kɛ tralɛ sa yɛ ɔ wla ɔ́ wun-ɔn, Anannganman ɔ'a ti nun ndɛ, ɔ'a de ɔ sa nun ɔ'a fa man ɔ wiengu uflɛ bɔ i kpa tra wɔ.

²⁹ Anannganman bɔ i yɛ man Izraɛl nyrun ba nyan'n, ɔ ti-man sran kɛ e sa nan se kɛ ɔ ´kan ndɛ kun kpɛkuun ɔ ´sɛ i sin ´se kɛ nɛ́n i-ɔ.»

³⁰ Sail waan: «M'an yo sa tɛ, sanngɛ ɔli nán gua mín nyin ase Izraɛl kpɛnngbɛn nin Izraɛlfuɛ'm be nyrun. Sa ɔ́ sin bla man n ko koto Anannganman b'ɔ ti ɔ Nyanmiɛn'n i bo.»

³¹ Yɛ Samiɛl suli Sail su nan Sail ɔ'a ko koto Anannganman bo.

³² Kpɛkuun Samiɛl waan: «Amun `fa Agag b'ɔ ti Amalɛk famiɛn'n be bla.» Yɛ Agag bali-ɔ. Kɛ ɔ ´ba'n, wuun ɔ ´srisri, ɔ bu i kɛ be su kun-mɛn i kun.

³³ Yɛ Samiɛl seli i kɛ: «Kɛ a kunnin sran mun bɔ be fili bé nin'm be sa'n, i kunngba nin-ɔn, a wa fi ɔ nin liɛ'n i sa kusu.» Yɛ Samiɛl jɔjɔli i nun Nyanmiɛn sua ng'ɔ o Gilgal lɛ'n nun-ɔn.

³⁴ Samiɛl ɔli Rama, Sail kusu ɔli i awlo Gibea lɔ.

³⁵ Samiɛl ɔ'a wun-man Sail kun le nan ɔ'a wu, afin Anannganman waan Sail i famiɛn nga i bɔbɔ Anannganman sieli i Izraɛl nvle'n su'n yoli i ya kpa. Sail ti Samiɛl kokoli kpa.