1 Samiɛl 14 - NYANMIƐN NDƐ'N 1998

Zonatan ɔli kɛ ɔ nin Filistifuɛ'm be akpasua kun be ko ´kun

¹ Le kun Sail i wa Zonatan seli i gbanflɛn ng'ɔ suɛ i alɛ ninnge'n kɛ: «Bla e wɔ Filistifuɛ'm be akpasua nga be o e nyrun ndɛnman su lɔ'n bé wun lɔ.» Kɛ Zonatan ´yo sɔ'n, ɔ'a bo-man su a kle-mɛn i si.

² Kɛ ɔ ´yo sɔ'n, wuun Sail ti Gibea awɛ'n su, Migrɔn lɔ waka nga be flɛ grenadie i bo. I sa nun sran kɔe ya nsiɛn be o i wun lɛ.

³ Asitib i wa Asiza yɛ ɔ ti Nyanmiɛn nyrun jranfuɛ ng'ɔ nin be o lɛ nin-ɔn. I sa nun yɛ ninnge nga be fa si Nyanmiɛn i klun sa'n be wo-ɔ. (Eli ng'ɔ ti Anannganman nyrun jranfuɛ Silo lɔ laa'n i wa Fine'n i klun ba liɛ I-kabɔd i niaan yɛlɛ Asitib). Sran'm be si-man kɛ Zonatan ɔ'a ɔ lika.

⁴ Kan i waan ɔ ´sin nan ɔ nin Filistifuɛ'm b'a kun'n o yɛbuɛ piembie nnyɔn be afiɛn. Kun suan Bozɛz, yɛ kun suan Sene.

⁵ Yɛbuɛ sɔ'n kun wo nglo lɔ Mikmas ndɛnman, yɛ kun wo ngua lɔ Gɛba ndɛnman.

⁶ Zonatan seli i gbanflɛn ng'ɔ suɛ i alɛ ninnge'n kɛ: «Bla e wɔ Filistifuɛ nga b'a wla-man be klɛn'm bɔ be nyin yi-man Nyanmiɛn bé wun lɔ. Sɛ Anannganman ´uka ye o! Afin i liɛ'n, sɛ ɔ klo kɛ ɔ ´man sran kwlalɛ'n, ɔ lɛ-man kɛ amun ti kaan, annzɛ amun sɔnnin.»

⁷ I gbanflɛn'n waan: «I kwlaa ng'ɔ o ɔ klun kɛ a ´yo'n, yo. E wɔ, kɛ a kɔ lɛ'n e nin wɔ-ɔ.»

⁸ Zonatan waan: «E wɔ bé wun lɔ nan be wun ye.

⁹ Sɛ be se e kɛ: ‹Amun `jran lɛ man e to amun lɔ'n, e jran yɛ e su kɔ-man bé wun lɔ kun.›

¹⁰ Sɛ kusu be se e kɛ: ‹Amun `fu be to e wa'n,› wuun e ´to be lɔ afin i sɔ'n kle kɛ Anannganman ´yi be wla é sa nun.»

¹¹ Yɛ be fali bé wun kleli Filistifuɛ mun-ɔn. Filistifuɛ'm be waan: «Ebre'm be su fin buɛ nga be fiali nun'n be nun ´fite.»

¹² Kpɛkuun be seli Zonatan nin i alɛ ninnge suafuɛ'n be kɛ: «Amun `bla man e kan ndɛ kun e kle amun.» Zonatan seli i alɛ ninnge suafuɛ'n kɛ: «Su mín su! Anannganman ɔ'a yi be ɔ'a wla e Izraɛlfuɛ mun e sa nun.»

¹³ Kɛ Zonatan ´kɔ'n, ɔ fɛ i sa nin i ja mun yɛ ɔ fu kɔ-ɔ, i gbanflɛn'n su i su. Kɛ Zonatan ɔ ´bla be like'n, wuun alɛ ninnge suafuɛ'n ɔ ´wiewie be su i su.

¹⁴ Zonatan nin alɛ ninnge suafuɛ'm be kwlali be klikli sɔ nun. Be kunnin sran kɔe ablaɔn lika kluklu kaan sa'n nun.

¹⁵ Siɛn'n, srɛ dan kpa kunnin Filistifuɛ nga be o lɛ'n ɔ nin Filistifuɛ'm be ngba. Srɛ kunnin be sonja nga be sasa lika'n nin be safunyrɛn mun. Yɛ kusu asiɛ'n kejeli, ɔ man sannganlɛ'n yoli dan.

¹⁶ Lika sasafuɛ nga Sail sieli be Gibea bɔ be ti Bɛnzamɛn akpasua'n sufuɛ'n be ´nian-an, Filistifuɛ mun yɛ b'a bo b'a sanndi yɛ. Wie'm be kɔ wa wie'm be kɔ wa.

¹⁷ Sail seli sran nga be o i wun lɛ'm be kɛ: «Amun `flɛflɛ sran mun be nian man é wun sran ng'ɔ nun-man wa'n». Be flɛflɛli sran mun kpɛkuun be ´nian-an, Zonatan nin i alɛ ninnge suafuɛ'n be nun-man lɛ.

¹⁸ Yɛ Sail seli Asiza kɛ: «Fa Nyanmiɛn i alaka'n bla.» Le kun sɔ nun'n, wuun Nyanmiɛn i alaka'n wo Izraɛlfuɛ'm bé sa nun.

¹⁹ Kɛ Sail ´kan ndɛ kle Nyanmiɛn nyrun jranfuɛ'n, wuun Filistifuɛ'm be nanmue nun lɔ nganniɛn'n ´yo dan kɔ, yɛ Sail seli i kɛ: «Nán bo wɛ usa Nyanmiɛn sa kun»

²⁰ Yɛ Sail flɛflɛli sran nga be o i sa nun mun'n yɛ be bali alɛ kunwlɛ lɛ-ɔ, be ´nian-an, sannganlɛ'n ɔ'a yo dan, Filistifuɛ'm be su kun be wiengu.

²¹ Ebre wie'm be su Filistifuɛ mun laa, yɛ be nin be kɔ alɛ kunlɛ. Be sɔfuɛ'm be sali bé sin be bali Izraɛlfuɛ nga be o Sail nin Zonatan bé wun wa'n bé sin.

²² Izraɛlfuɛ nga be fiali Efraim oka-oka nun lɔ'n, kɛ be tili kɛ Filistifuɛ'm be su wanndi'n, be suli bé su, yɛ be nin be kunnin.

²³ Kɛ Anannganman man Izraɛlfuɛ'm be kwlali le kun sɔ'n nun sa. Be kunnin alɛ'n lele be kpɛli Bɛt-Avɛn klɔ'n.

Izraɛl sonja'm be Zonatan delɛ

²⁴ Le kun sɔ nun'n, kɛ Izraɛlfuɛ'm be ko fɛ'n yɛ be fɛli-ɔ. Afin Sail tali nda ɔ seli kɛ: «Sran ng'ɔ di like kwlaa nan aliɛ'n ɔ'a san'n, sran ng'ɔ di like kwlaa nan m'an tu min klunngbɔ min kpɔfuɛ'm bé su'n, man nyrɛnnɛn tɔ i su.» I sɔ'n ti, man sran fi nuan ɔ'a kan-man like.

²⁵ Be ko juli bo'n nun, lika sɔ'n nun awɛma nzue'n wo asiɛ wun.

²⁶ Kɛ be wluli bo'n nun'n, be ´nian-an, awɛma nzue yɛ ɔ ´sonji yɛ, sanngɛ be wie fi ɔ'a fa kɛn-mɛn i nuan. Nda bɔ Sail tali'n ti, srɛ kunnin be.

²⁷ Zonatan kusu, kɛ i si man sran'm be ´ta nda sɔ'n, ɔ'a wun-man nun, ɔ man ɔ fali waka b'ɔ o i sa nun'n i bue nuan'n fa kplannin awɛma'm be sua'n nun nan ɔ'a fa kɛn i nuan, kpɛkuun i nyinma su ɔ'a klo.

²⁸ Sran'm be nun kun seli i kɛ: «Ɔ si man e tali nda kɛ sran ng'ɔ di like ndɛ'n man nyrɛnnɛn tɔ i su. I ti yɛ sran'm b'a fɛ yɛ.»

²⁹ Zonatan waan: «Mín si yoli e mɛn'n i tɛ. Amun bɔbɔ amun `nian kɛ min nyinma su ɔ'a klo-ɔ, awɛma nzue kan bɔ n dili'n ti.

³⁰ ?Sɛ ɔ ti kɛ ndɛ sran'm be dili e kpɔfuɛ'm bé bo ninnge nga be nyɛnnin'n i wie'n, wuun y'a kwla-man Filistifuɛ mun a tra-man su?»

³¹ Le kun sɔ nun'n kɛ ɔ fɛ i Mikmas lele fa ju Azalɔn lɔ'n, be kwlali Filistifuɛ mun. Be fɛli dan kpa.

³² I ti be fɛnnin be kpɔfuɛ'm be bo ninnge mun. Be trali bua, nin nannin dandan mun, ɔ nin nga b'a kpɛ cro mun. Be kpɛli be kɔmin asiɛ wun lɛ, be jrannin mmoja'n nun lɛ be dili like.

³³ Be ko seli Sail kɛ: «Sran mun yɛ be su fɔn Anannganman wun lɔ lɛ. Kan nnɛn mmoja'n wo lɛ'n, lɛ yɛ be tran be di like nin-ɔn .» Famiɛn'n waan: «Cuekee! ?Nguɛ sa tɛ yɛ amun yoli i sɔ-ɔ? Amun `kondo yɛbuɛ dan kun bla mín wun wa nan n fa yo Nyanmiɛn sɔwlɛ.

³⁴ Nan amun `sinsin sran'm be su be `se be kɛ: ‹Sran'm be kwlaa be `fa be nannin annzɛ be bua mun `bla, be wa kpɛ be kɔmin wa nan b'a di. Kɛ ɔ ko yo sɔ'n, be su jran-man kan mmoja'n guali lɛ'n be su di-man like kun. Be su fɔnndɔn-man Anannganman kun.› » Kɔnguɛ sɔ'n, sran'm be kwlaa be fali be nannin'm be bali lɛ nan b'a kpɛ be kɔmin.

³⁵ Sail i Nyanmiɛn sɔwlɛ klikli'n b'ɔ ´kplan man Anannganman'n yɛ ɔ o lɛ-ɔ.

³⁶ Sail waan: «E `ko kun Filistifuɛ mun kɔnguɛ nga. E `ko fɛn bé bo ninnge'n lele man aliɛ'n cɛn, nán e yaci sran bɔ kun lɔ.» Be tɛli i su kɛ: «Like kwlaa nga a nian nan a wun i kɛ ɔ ti kpa'n, yo.» Yɛ Nyanmiɛn nyrun jranfuɛ'n waan: «Man e wun Anannganman wun ka.»

³⁷ Yɛ Sail usali Nyanmiɛn kɛ: «?N `su Filistifuɛ'm bé su? ?Sɛ n su bé su'n, a ´fa be wla Izraɛlfuɛ'm bé sa nun?» Sanngɛ le kun sɔ'n, Nyanmiɛn ɔ'a tɛ-mɛn i su.

³⁸ Sail flɛflɛli nvle i su kpɛn mun i wun lɔ nan ɔ'a se be kɛ: «Amun `bu i akunndan kpa be nian sɛ sran wie yoli sa wie o.

³⁹ Anannganman Nyanmiɛn b'ɔ lafi-man, bɔ i yɛ ɔ deli Izraɛlfuɛ mun'n, n ´fa i dunman n ta nda kɛ sɛ kannzɛ mín wa Zonatan yɛ ɔ yoli sa tɛ sɔ'n, san wulɛ yɛ ɔ ´wu-ɔ.» Sran fi ɔ'a tɛ-man su,

⁴⁰ Sail waan: «Man Izraɛlfuɛ'm be kwlaa be sin bue kun nan e nin mín wa Zonatan e sin bue kun.» Izraɛlfuɛ'm be tɛli i su kɛ: «Like nga a nian nan a wun kɛ ɔ ti kpa'n, yo.»

⁴¹ Yɛ Sail seli Anannganman kɛ: «Izraɛlfuɛ'm be Nyanmiɛn, tɛ é su, man e wun ndɛ ng'ɔ ti nanwlɛ'n.» Kpɛkuun ɔ'a kle Zonatan nin Sail. Izraɛlfuɛ'm b'a nyan bé ti.

⁴² Sail waan: «Amun `tu e nin mín wa Zonatan e wun fɔtɔ. Yɛ fɔtɔ'n tɔli Zonatan su-ɔ.»

⁴³ Sail seli Zonatan kɛ: «Kan sa nga a yoli'n kle min.» Yɛ Zonatan kan kleli i-ɔ. I waan: «N fa min kpɔnman'n m boli awɛma nzue kan nun n tafili. Man be kun min, n lɛ-man ndɛ.»

⁴⁴ Sail waan: «Zonatan, sɛ w'a wu-man cɛ'n, man Anannganman wun min.»

⁴⁵ Sran'm be seli Sail kɛ: «?Zonatan bɔ ɔ'a de Izraɛlfuɛ'm be dan kɛ nga sa'n, ɔ wu sɛ? ?Nguɛ tete sa liɛ yɛlɛ nga? E kan Anannganman ti, sran kun lɛ-man atin b'ɔ ´tu Zonatan i ti ndrɛ bɔ kun sa.» Kɛ be deli Zonatan sa.

⁴⁶ Sail yacili Filistifuɛ'm bé su sulɛ nan b'a ɔ be tranwlɛ.

Kwlalɛ nga Sail kwlali i kpɔfuɛ mun'n

⁴⁷ Kɛ Sail yoli Izraɛlfuɛ'm be su famiɛn'n ɔ nin i kpɔfuɛ nga be sin yiɛ'n be kunnin alɛ: ɔ nin Moabfuɛ mun, nin Amɔnfuɛ mun, nin Edɔmfuɛ mun, nin Sɔba'm be famiɛn'n, ɔ nin Filistifuɛ mun be kunnin. Be kwlaa ng'ɔ nin be kunnin'n, ɔ kwlali be.

⁴⁸ Le kun nga be wunnin i yakpa nun dan'n yɛlɛ cɛn ng'ɔ kwlali Amalɛkfuɛ mun'n. Ɔ deli Izraɛlfuɛ mun bé bo ninnge fɛnfuɛ'm bé sa nun.

Sail i awlo nunfuɛ mun

⁴⁹ Sail i mma yasua mun yɛlɛ Zonatan, Zisvi, ɔ nin Malkisia. I mma mmla'm be ti nnyɔn. Klikli'n, be flɛ i kɛ Merab, kaan fuɛ'n be flɛ i kɛ Mikal.

⁵⁰ Be flɛ i yi'n kɛ Asinɔam, Asimaaz i wa-a. I alɛ kunfuɛ'm bé su kpɛnngbɛn'n yɛlɛ Abnɛr, Sail i si niaan bian Nɛr i wa-a.

⁵¹ Afin Sail i si Kis, ɔ nin Abnɛr i si Nɛr be nnyɔn'n be ti Abiɛl i mma mun.

⁵² Blɛ nga bɔ Sail sie Izraɛlfuɛ mun'n, ɔ nin Filistifuɛ mun b'a yaci-man alɛ kunlɛ le. I sɔ'n ti, kɛ ɔ wun kɛ sran kun lɛ anwlɛn nin wunmiɛn'n, ɔ fɛ i wlɛ i sonja'm be nun.