1 Samiɛl 12 - NYANMIƐN NDƐ'N 1998

Samiɛl i ndɛ ng'ɔ kan kleli Izraɛlfuɛ mun'n

¹ Yɛ Samiɛl seli Izraɛlfuɛ'm be kɛ: «Like nga amun srɛli'n, n yoli i kwlakwla m mannin amun. M'an sie amún su famiɛn kun.

² Ɔ man siɛn'n, famiɛn'n yɛ ɔ ´sie amun-ɔn. M'an yo kpɛnngbɛn. N ti'n ɔ'a bo je. Min mma'm b'a yo kaklaakla kɛ amun sa. Kɛ n ´sie amun'n, wuun n ti gbanflɛn kan lele yɛ ɔ'a fa ju ndɛ yɛ.

³ Min yɛ n wo yɛ, Anannganman ɔ nin famiɛn b'ɔ sieli'n be ti min lalofuɛ. Amun `kan sa nga n yoli'n, sɛ n fali sran wie nannin-ɔn, ɔ `kan. Sɛ n fali sran wie i aflunmun-ɔn, ɔ `kan. Sran nga n dili i lufle-ɔ, ɔ `kan. Sran nga n yoli i sa b'ɔ ti-man su-ɔ, ɔ `kan. Sran ng'ɔ mannin min like kɛ n fa nan sɛ ɔ yo sa tɛ-ɔ, n yo kɛ n wun-mɛn i sa'n, sɛ i sɔfuɛ o wa'n man ɔ kan. Like nga n fali'n b'ɔ ti-mɛn i su'n, amun `kan man n yi man amun.»

⁴ Be tɛli i su kɛ: «W'a di-man e lufle. W'a yo-man e sa b'ɔ ti-mɛn i su-ɔ. W'a de-man like fi sran sa nun.»

⁵ Yɛ Samiɛl waan: «?Nán Anannganman ɔ nin famiɛn'n b'ɔ sieli'n be nyrun yɛ amun waan m'an yo-man amun sa fi yɛ?» Be waan: «Ɛɛn be nyrun-ɔn.»

⁶ Samiɛl waan: «Anannganman i nyrun-ɔn. I b'ɔ fali Moiz nin Aarɔn kɛ be fa amun nannan mun Ezipt lɔ bla'n, i nyrun-ɔn.

⁷ Ɔ man amun `bla Anannganman i ja su man n kan sa kpakpa ng'ɔ yoli mannin amun nin amun nannan mun'n, bé nun ndɛ weiin-weiin n kle amun.

⁸ Kɛ Zakɔb ɔ nin i osufuɛ'm be ɔli Ezipt, bɔ be ´kle be nun'n, be sun flɛli Anannganman kɛ ɔ de be. Anannganman kusu sunmannin Moiz nin Aarɔn kɛ be ko fa be Ezipt lɔ bla, nan ɔ'a fa be ɔ'a sie mɛn nga nun wa.

⁹ Kpɛkuun bé wla fili Anannganman b'ɔ ti be Nyanmiɛn'n. I kusu ɔ yoli be atɛ Sizɛra b'ɔ ti Azɔr alɛ kunfuɛ'm bé su kpɛn'n ɔ nin Filistifuɛ mun, ɔ nin Moabfuɛ'm bé sa nun. Be nin Izraɛlfuɛ'm be kunnin.

¹⁰ Be kpan flɛli Anannganman ekun, be waan: ‹Y'a yo tɛ. E yacili Anannganman lɛ e ko sɔli Baal nin Astarte mun. De ye e kpɔfuɛ'm bé sa nun nan e ´su wɔ.›

¹¹ Yɛ Anannganman sunmannin Zedeɔn, nin Bɛdan, nin Zɛfte, ɔ nin m bɔbɔ Samiɛl kɛ e de amun, kpɔfuɛ nga be sin yia amun'n bé sa nun. Amun trannin fɔuun!

¹² Sanngɛ kɛ amun wunnin kɛ Nasas b'ɔ ti Amɔnfuɛ'm be famiɛn'n ɔ nin amun bali alɛ kunlɛ'n, kpɛkuun amun waan: ‹Man e famiɛn kun man ɔ sie ye.› Kusu wuun Anannganman bɔbɔ ti amun famiɛn.

¹³ Ɔ man famiɛn nga amun srɛli'n yɛ ɔ o lɛ-ɔ. Anannganman mannin amun famiɛn'n.

¹⁴ Sɛ amún nyin yi Anannganman nan amun su i'n, sɛ amun tie i aniɛn nan amu'an yi-man ndɛ ng'ɔ kannin'n i blo'n, i liɛ'n, amun nin amun famiɛn ng'ɔ sie amun'n, Nyanmiɛn ´sie amun.

¹⁵ Sanngɛ sɛ amu'an tie-man Anannganman i aniɛn, sɛ amun yi i nuan ndɛ'n blo'n, ɔ ´kle amun nyrɛnnɛn kɛ ɔ fa kleli amun nannan'm be yalɛ'n sa.

¹⁶ Amun `tran wa be nian abonuan sa nga Anannganman ɔ wa yo kle amun'n.

¹⁷ ?Kɛ e o yɛ, e nun-man ble kpɛlɛ blɛ bɔ nzue tɔ-man'n i nun? Sanngɛ n wa kpan flɛ Anannganman. Nzue'n wa bo nun. Ɔ wa tɔ nan amu'an wun kɛ famiɛn nga bɔ amun usali'n ɔ ti sa tɛ dan kpa kun yɛ amun yoli Anannganman-an.»

¹⁸ Samiɛl kpan flɛli Anannganman, kpɛkuun Anannganman man nzue'n boli nun. Nzue'n tɔli cɛn sɔ'n nun. Izraɛlfuɛ'm be kwlaa be sroli Anannganman ɔ nin Samiɛl.

¹⁹ Be kwlakwla be seli Samiɛl kɛ: «Nannan, srɛ Anannganman ɔ Nyanmiɛn'n man ye nan y'a wu-man, afin y'a fa famiɛn kunndɛlɛ'n y'a uka é tɛ beblebe'm bé su.»

²⁰ Samiɛl seli be kɛ: «Nán srɛ kun amun. N si kɛ amu'an yo sa tɛ dan, sanngɛ nán amun kaci amún sin si Anannganman. Amun `nian nun `su i kɛ ɔ fata'n sa.

²¹ Nán amun kpaci ko su ninnge finfin'm bé su, afin ninnge sɔ'm be bɔn-man like fi, be de sran-an, ɔ yo-man ye, yɛlɛ kɛ be ti finfin like.

²² Anannganman su yi-mɛn i nvle'n i blo, yɛlɛ kɛ i dunman'n ti dan, afin i bɔbɔ yɛ ɔ guguli kɛ ɔ ´fa amun yo i nvle-ɔ.

²³ N kusu n kwla se-man kɛ n srɛ-man Nyanmiɛn m man-man amun kun. Sɛ n se sɔ-ɔ, wuun m'an fɔn Anannganman wun. N ´srɛ m ´man amun, n ´kle amun atin ng'ɔ ti kpa'n, b'ɔ ti seiin'n.

²⁴ Amun kusu amun nyin `yi Anannganman, amun nian nun be su i nanwlɛ su. An `bu sa dandan ng'ɔ yoli mannin amun'n be akunndan.

²⁵ Sɛ amun yo sa tɛ-ɔ, o ´nunnun amun nin amun famiɛn'n.»