1 Samiɛl 11 - NYANMIƐN NDƐ'N 1998

Sail i Amɔnfuɛ'm be kwlalɛ

¹ Nasas b'ɔ ti Amɔnfuɛ'm be famiɛn'n ɔ wa boli i nanmue Galaad klɔ nga be flɛ i Zabɛs'n i wun lɛ. Yɛ Zabɛsfuɛ'm be kwlakwla be seli i kɛ: «Man e tra aenguɛ. Sɛ e nin wɔ e tra aenguɛ'n, e ´su wɔ.»

² Amɔn famiɛn'n waan: «N tili, sanngɛ m ´bobo amun kwlaa amun nyinma fama'n nan y'a tra aenguɛ sɔ'n. N ´yo i sɔ n fa gua Izraɛl nvle nunfuɛ'm be kwlaa be nyin ase.»

³ Zabɛs kpɛnngbɛn'm be tɛli i su kɛ: «Man e cɛn nso, man e sunman sran Izraɛl nvle wunmuan'n nun. Sɛ y'a nyan-man defuɛ'n, wuun y'a fa é wun y'a man wɔ.»

⁴ Be nga be sunmannin be'n be juli Gibea b'ɔ ti Sail i klɔ'n nun lɔ. Be kannin ndɛ sɔ'n. Kɛ klɔ'n sufuɛ'm be tili'n, be tikeli be ti be sunnin.

⁵ Kɛ ɔ ´yo sɔ'n, wuun Sail fin i fie su lɔ su ba. Ɔ ´ba'n, wuun ɔ ´kɛnkɛn i nannin mun, yɛ ɔ usali kɛ: «?Ɔ yo sɛ ti yɛ sran'm be sun sɔ-ɔ?» Yɛ be kannin Zabɛsfuɛ'm be jasin'n kleli i-ɔ.

⁶ Kɛ ɔ tili jasin'n, wuun Nyanmiɛn i Wawɛ'n ɔ'a jrɛ i su, ɔ fali ya dan kpa.

⁷ Ɔ trali nannin nnyɔn yɛ ɔ kpɛkpɛli be nun-ɔn, nan ɔ'a fa sunman sran kɛ be ko kan kle Izraɛlfuɛ'm be kwlakwla kɛ: «Sran kwlaa nga ɔ'a su-man Sail nin Samiɛl bé su'n, kɛ be ´yo i nannin liɛ'm be sa.» Anannganman man srɛ dan kpa kunnin Izraɛlfuɛ mun. Ɔ man be yiali ndɛndɛ kpa kɛ sran kunngba yɛ b'a flɛ i sa.

⁸ Sail kali be Bezɛk lɔ: Izraɛlfuɛ'm be ti sran akpi-akpi ya nsan (300.000) yɛ Zidafuɛ'm be ti sran akpi-akpi ablasan (30.000).

⁹ Be seli be nga be sunmannin be'n be kɛ be ko se Zabɛsfuɛ'm be kɛ: «Ainman deiin kɛ wia'n ´ju bé ti afiɛn'n, wuun y'a de amun a wie.» Kɛ be nga be sunmannin be'n be ko kan kleli Zabɛsfuɛ mun, be klun jɔli.

¹⁰ Kpɛkuun be ko seli Amɔnfuɛ'm be kɛ: «Ainman e ´fa é wun e ´man amun. Like kwlaa nga amun klo kɛ amun ´fa yo ye'n, amun `fa yo ye.»

¹¹ Kɛ i aliɛ cɛnnin'n, Sail bubuli sran'm be nun akpasua nsan. Be wluli Amɔnfuɛ'm be nanmue'n nun aliɛ njɛnniɛn su. Be kunnin be lele fa juli wia jran. Be nga be nyannin bé ti'n be bo sanndili. Sran nnyɔn sa b'a tran-man likawlɛ kun.

¹² Izraɛlfuɛ'm be seli Samiɛl kɛ: «?Be nga be se kɛ: ‹Nan kɛ ɔ o yɛ'n, Sail yɛ ɔ wa sie ye-ɔ,› be sɔfuɛ'm be onin?»

¹³ Yɛ Sail waan: «Delɛ dan nga Anannganman ɔ'a de Izraɛlfuɛ mun ndɛ yɛ'n ti, be su kun-man sran fi wa andɛ.»

¹⁴ Yɛ Samiɛl seli Izraɛlfuɛ'm be kɛ: «Amun man e wɔ Gilgal e kɔ guagua Sail i famiɛn sielɛ'n i bo.»

¹⁵ Izraɛlfuɛ'm be kwlakwla be sua bé wun ɔli Gilgal, nan b'a fa Sail b'a sie famiɛn Anannganman sua'n nun, kpɛkuun be yili bo kun yolɛ i su tɛ mannin Anannganman. Sail nin Izraɛlfuɛ'm be kwlaa be dili cɛn dan kpa.