1 Samiɛl 10 - NYANMIƐN NDƐ'N 1998

¹ Samiɛl fali ngo buteli ba kaan kun nun guɛli i Sail ti'n su nan ɔ'a tɔ i nun, yɛ ɔ seli i kɛ: «Anannganman ɔ'a fa wɔ kɛ a sie i nvle'n.

² Kɛ a ´fɛ i mín wun wa ´kɔ yɛ'n, a wa wun sran nnyɔn Sɛlsa lɔ Rasɛl i asieliɛ'n wun lɛ Bɛnzamɛn i lika'n i nuan su. Be ´se wɔ kɛ: ‹Be wunnin aflunmun bla nga a bali be kunndɛlɛ'n. Ɔ man ɔ́ si ɔ'a yaci aflunmun'm be ndɛ, i akunndan ɔ'a sanngan amun ti. ?Ɔ usɛ i wun kɛ n ´yo sɛ nan m'an wun ń wa'n?›

³ Kɛ a fɛ i lɛ ´kɔ ɔ nyrun bɔ a ´ju Tabɔr lɔ sɛni waka dan'n i wun lɛ'n, a nin sran nsan bɔ be su kɔ Nyanmiɛn wun wunlɛ Betɛl lɔ'n amun ´yia. Boli bɔ b'a kpɛ cro'n sɔ nsan o kun sa nun, kpaun nsan o kun sa nun, yɛ nzan sɛ jin kun ti su.

⁴ Be ´yo wɔ like, be ´man wɔ kpaun nnyɔn, sɔ nun.

⁵ Kpɛkuun kɔ Gibea-Elɔim kan Filisti siefuɛ'm be o lɔ'n. Kɛ a ju klɔ'n i wun lɛ'n, a nin Nyanmiɛn nuan ijɔfuɛ akpasua kun bɔ be fin Nyanmiɛn sɔwlɛ lɔ ´jra ba'n be ´yia. Jru bofuɛ mun, nin klɛn bofuɛ mun, nin blo bofuɛ mun, ɔ nin aluku bofuɛ'm be dun mmua be nyrun. Kɛ Nyanmiɛn nuan ijɔfuɛ'm be ´ba'n, wuun be ´kan Nyanmiɛn nuan ndɛ'n.

⁶ Kpɛkuun Anannganman Wawɛ'n ´jra ɔ́ su, a nin be amun ´kan Nyanmiɛn nuan ndɛ'n. A ´kaci sran uflɛ.

⁷ Kɛ nzɔliɛ sɔ'n kwlaa i nuan ko yia'n, si kɛ Nyanmiɛn nin wɔ o nun. Yɛ like ng'ɔ fata kɛ a yo'n, yo.

⁸ I sin, dun mmua min nyrun Gilgal lɔ, n wa to wɔ lɔ. N ´yi tɛ nga be yra be nnɛn'n kɔlikɔli'n ɔ nin bo kun yolɛ i su tɛ mun. Minndɛ min le nso man n kan like ng'ɔ fata kɛ a yo'n n kle wɔ.»

⁹ Kɛ Sail fɛ Samiɛl wun lɛ ɔli cɛ'n, Nyanmiɛn kacili i mlɔnmlɔnmlɔn, ɔ yoli sran uflɛ, kpɛkuun ndɛ nga Samiɛl kannin'n, ɔ kpɛnnin su sɛsɛsɛ le kun sɔ'n nun.

¹⁰ Kɛ be juli Gibea'n, be nin Nyanmiɛn nuan ijɔfuɛ akpasua kun yiali. Nyanmiɛn i Wawɛ'n jrɛli i su nan ɔ nin be b'a kan Nyanmiɛn nuan ndɛ mun.

¹¹ Kɛ be nga be si i laa'n be wunnin kɛ ɔ nin Nyanmiɛn nuan ijɔfuɛ'm be su kan Nyanmiɛn nuan ndɛ'n, be usa kɛ: «?Nguɛ yɛ ɔ yo Kis i wa nin-ɔn? ?Sail o Nyanmiɛn nuan ijɔfuɛ'm be nun wie?»

¹² Sran kun usali kɛ: «?Yɛ be nga'm be li, wan yɛ ɔ ti bé min nin-ɔn?» I ti yɛ be kan ndɛ-ɔ, be se kɛ: «?Sail o Nyanmiɛn nuan ijɔfuɛ'm be nun wie?»

¹³ Kɛ Sail yacili Nyanmiɛn nuan ndɛ'n i kanlɛ'n, ɔ ɔli sraka yiwlɛ lika sɔ'n su lɔ.

¹⁴ Sail i si i niaan bian'n usali Sail nin i gbanflɛn'n be kɛ: «?Ninfan yɛ amun ɔli-ɔ?» Sail tɛli su kɛ: «E ɔli aflunmun bla'm be kunndɛlɛ, sanngɛ y'a wun-man be. Ɔ man e ɔli Samiɛl wun wunlɛ.»

¹⁵ Sail i si i niaan bian'n usɛli i kɛ: «Ndɛ nga Samiɛl kannin'n kan kle min.»

¹⁶ Sail tɛli i su kɛ: «Ɔ kan kleli e weiin kpa kɛ be wunnin aflunmun bla mun.» Sail ɔ'a kan-man famiɛn dilɛ ndɛ nga Samiɛl kan kleli i'n.

Sail i famiɛn sielɛ

¹⁷ Samiɛl yiali Izraɛlfuɛ mun Mizpa lɔ Anannganman sua'n nun lɔ.

¹⁸ Ɔ seli be kɛ: «Anannganman b'ɔ ti Izraɛl Nyanmiɛn'n i waan: ‹N fali Izraɛl nvle'n Ezipt lɔ m bali. N deli amun Eziptfuɛ nin nvle nga be kleli amun yalɛ'n be kwlakwla bé sa nun.›

¹⁹ I sɔ'n kpɛkuun-ɔn, ndɛ amu'an kaci amun sin amu'an si Nyanmiɛn. I b'ɔ deli amun blɛ kekle nin nyrɛnnɛn blɛ nun'n, amu'an kaci amun sin amu'an si i. Amun seli i kɛ: ‹Sie é su famiɛn kun.› Amun bla Anannganman nyrun akpasua-akpasua, i sin'n, amun `bla awlobo-awlobo.»

²⁰ Samiɛl man Izraɛl akpasua'm be bali kunngun, kpɛkuun ɔ tuli fɔtɔ nan ɔ'a tɔ Bɛnzamɛn akpasua liɛ'n su.

²¹ Samiɛl man Bɛnzamɛn i awlobo-awlobo'm be bali kunngun, kpɛkuun ɔ tuli fɔtɔ'n nan ɔ'a tɔ Matri awlo liɛ'n su. I sin'n, fɔtɔ'n tɔli Kis i wa Sail su. Be kunndɛ i-ɔ, be wun-mɛn i.

²² Yɛ be usali Anannganman ekun kɛ: «?Sran sɔ'n, ɔ bali wa?» Yɛ Anannganman waan: «Amun `nian trɔ'm be nun lɔ, ɔ fia lɔ.»

²³ Yɛ be wanndi ɔli be ko fɛ i lɔ bali-ɔ. Kɛ ɔ wa jrannin nzrafuɛ'm be afiɛn'n, i ti'n tra sran'm be kwlaa bé su.

²⁴ Samiɛl seli Izraɛlfuɛ'm be kɛ: «Amun `nian, sran nga Anannganman fɛli i'n yɛ. Izraɛlfuɛ fi nin i sɛ-man.» Nzrafuɛ'm be kwlakwla be kpannin kɛ: «Man wie wla fi famiɛn su o!»

²⁵ Samiɛl kannin famiɛn sielɛ'n i su mmla'n kleli Izraɛlfuɛ mun. Ɔ klɛli i fluwa kun nun ɔ fa sieli i Anannganman nyrun, kpɛkuun Samiɛl man Izraɛlfuɛ'm be ɔli be klɔ kunngun'm bé su.

²⁶ Sail kusu ɔli i awlo Gibea lɔ. Kɛ ɔ ´kɔ'n, Nyanmiɛn suli sran akpasua kun bo kɛ be ko sunmɛn i.

²⁷ Sran finfinfuɛ'm be liɛ nga be se'n yɛlɛ kɛ: «?Nga li i ɔ ´yo sɛ yɛ ɔ ´de ye-ɔ?» Be yoli i finfin, b'a cɛ-mɛn i like, sanngɛ Sail yoli kɛ ɔ'a wun-mɛn i sa.