1 Samiɛl 1 - NYANMIƐN NDƐ'N 1998

Ani i aunnvuɛ sunlɛ

¹ Bian kun fin Zif'm be klɔ nga be flɛ i Rama'n su Efraim oka-oka lika'n nun lɔ. Be flɛ i kɛ Ɛlkana. Bian sɔ'n i si'n yɛlɛ Zɛrɔam, Zɛrɔam i si liɛ'n yɛlɛ Elii, Elii kusu i liɛ'n yɛlɛ Tɔi, yɛ Tɔi liɛ'n yɛlɛ Zif, Zif'n ti Efraimfuɛ.

² Ɛlkana lɛ bla nnyɔn. Be flɛ kun Ani, yɛ be flɛ kun ekun Pɛnina. Pɛnina lɛ ba, Ani kusu lɛ-man wie.

³ Afuɛ nuan kwlaa bian sɔ'n fɛ i i klɔ lɛ kɔ Silo ko koto Anannganman b'ɔ sie mɛn wunmuan'n i bo. Ɔ sɔ i. Kɛ ɔ ´yo sɔ'n, wuun Anannganman i nyrun jranfuɛ nga be o lɛ'n yɛlɛ Eli i wa yasua nnyɔn mun: Ɔfni nin Fine.

⁴ Cɛn nga Ɛlkana yi i tɛ'n, ɔ kpɛ tɛ sɔ'n i nnɛn'n wie mɛn i yi Pɛnina, ɔ nin i mma yasua nin i mma mmla mun be kwlaa.

⁵ Sanngɛ ng'ɔ man Ani'n ɔ tra kun'n i liɛ'n kpɛ nnyɔn, afin ɔ klo Ani bɔ Anannganman man ɔ'a wu-man ba'n i dan!

⁶ Kɛ ɔ ´yo sɔ'n, wuun i wla'n ´di i asanse, ɔ kunndɛ kɛ ɔ guɛ i nyin ase ba bɔ Anannganman man ɔ'a wu-mɛn'n ti.

⁷ Afuɛ nuan kwlakwla kɛ ɔ ti sɔ-ɔ. Afuɛ kwlakwla'n sɛ Ani jaso kɛ ɔ ´kɔ Anannganman sua'n nun lɔ'n, san Pɛnina kputu i. Afuɛ kun wa juli, kɛ ɔ ´sun b'ɔ di-man like'n,

⁸ i wun Ɛlkana usɛli i kɛ: «?Ani, nguɛ ti yɛ a sun bɔ a di-man like yɛ? ?Ɔ yo sɛ ti yɛ ɔ klun jɔ-man nin-ɔn? ?Sɛ kannzɛ a ´wu ba yasua blu bɔbɔ-ɔ, ɔ nin min ´sɛ?»

⁹ Kɛ be dili like bɔ be nɔnnin nzan wieli'n, Ani jaso ɔli. Kɛ ɔ ´yo sɔ'n, wuun Nyanmiɛn nyrun jranfuɛ bɔ be flɛ i Eli'n ɔ ti i bia'n su Nyanmiɛn sua'n i anuan'n nun.

¹⁰ Ani klun'n ɔ'a kpɔtɔ saa! Kɛ ɔ ´srɛ Anannganman'n, wuun ɔ ´sun. Ɔ sunnin kpa.

¹¹ Ɔ fua kleli Anannganman kɛ: «Ee! Anannganman b'ɔ sie mɛn wunmuan'n, nian afɛ dan b'ɔ o n su-ɔ. E Min, nán ɔ́ wla fi min su. Sɛ ɔ́ wla kpɛn mín su nan a man min ba yasua kun'n, n ´fa man wɔ, ɔ ´yo ɔ liɛ mlɔnmlɔn. Be su yi-mɛn i ti'n le .»

¹² Ani srɛli Anannganman cɛli kpa, Eli niɛn i nuan'n siin,

¹³ afin Ani srɛ i klun lɔ, i nuan bui'n yɛ ɔ keje-ɔ, be ti-man ndɛ ng'ɔ kan'n. Ɔ man Eli bu i kɛ nzan'n yɛ ɔ'a kun i-ɔ.

¹⁴ Yɛ ɔ seli i kɛ: «?Cɛn onin ko yɛ nzan'n titi ɔ́ nyin su-ɔ? Fa ɔ nzanboɛ sɔ'n kɔ ɔ nyrun.»

¹⁵ Ani tɛli su kɛ: «Baba nan, nán nzan-an. N wo afɛ nun. Sa ng'ɔ o mín su'n yɛ n fa sie i Anannganman nyrun-ɔn.

¹⁶ Nán bu i kɛ n ti bla finfinfuɛ, afɛ dan b'ɔ o mín su'n ɔ nin klunngbɔ'n ti yɛ m'an ijɔ lele ɔ'a fa ju yɛ nin-ɔn.»

¹⁷ Yɛ Eli seli i kɛ: «Gua ɔ́ wla ase nan kɔ! Man Izraɛl Nyanmiɛn'n ɔ man wɔ like nga a srɛli i'n.»

¹⁸ Ani tɛli i su kɛ: «Ɔ kusu suan mín bo sa titi.» Kɛ bla sɔ'n wɔli'n, ɔ ko dili like siɛn'n, yɛ i nyrun b'ɔ ti mlanwa'n ɔ titili.

¹⁹ Kɛ i aliɛ cɛnnin'n, nglɛmun ndɛ kpa'n, Ɛlkana nin i awlofuɛ'm be ko kotoli Anannganman i bo nan b'a sa bé sin b'a ɔ be klɔ Rama lɔ. Ɛlkana nin i yi Ani be sili sua nan Anannganman ɔ'a mɛn i srɛwa'n i nuan like.

Samiɛl i awuliɛ'n

²⁰ Afuɛ kunngba'n nun Ani wunnzɛli, ɔ wuli ba yasua. Ɔ tɔnnin i dunman kɛ Samiɛl . Ɔ seli kɛ: «Kɛ bɔ n srɛli i Anannganman sa nun ti, n ´tɔn i dunman kɛ Samiɛl.»

²¹ Kɛ ɔ yoli sɔ'n, Ɛlkana nin i awlofuɛ'm be kwlaa be ɔli Silo ekun afuɛ nuan kun tɛ'n i yilɛ ɔ nin tɛ kun ng'ɔ tali Nyanmiɛn nda kɛ ɔ yi mɛn i'n i yilɛ.

²² Le kun sɔ'n Ani ɔ'a ɔ-man wie, ɔ seli i wun kɛ: «Sɛ n kpɛ ba'n i nyɔnflɛn'n yɛ n ´fɛ n ´ko kle Anannganman-an. I liɛ'n ɔ ´ka lɔ kpɛkun.»

²³ Ɛlkana tɛli i su kɛ: «Sɛ a yo i sɔ-ɔ, ɔ ti kpa. Kpɛ i nyɔnflɛn ka. Min nuan nga n yra yɛlɛ kɛ man Anannganman bɔbɔ ɔ yiɛ i ndɛ'n i nuan.» Yɛ Ani kali Rama lɔ ɔ mɛnnin i wa'n i nyɔnflɛn-ɔn.

²⁴ Kɛ ɔ kpɛli i nyɔnflɛn wieli'n, ɔ nin i ɔli Silo lɔ Anannganman sua'n nun lɔ. Kɛ ɔ ´yo sɔ'n, wuun ba'n ti kaan kpa. Be ´kɔ'n, be fali nannin tola kun bɔ ɔ'a di afuɛ nsan, ɔ nin sanmlɛn bajɛ kun, ɔ nin nzan kplo kun.

²⁵ Be kpɛli nannin tola'n i kɔmin, be fa yili tɛ'n, kpɛkuun be fa bakan'n ko kleli Eli.

²⁶ Ani seli Eli kɛ: «Baba nan, bla wie b'ɔ bali le kun ɔ wa srɛli Anannganman ɔ nyrun wa'n, yɛlɛ min.

²⁷ Ba nga n srɛli i Anannganman sa nun'n yɛ. Ɔ tɛli min srɛwa sɔ'n su.

²⁸ Ɔ man n kusu n waan n ´fɛ i man Anannganman. Ɔ ´yo i liɛ lele ɔ ´fa ju i wie cɛn.» Kɛ ɔ yoli sɔ'n, yɛ Ɛlkana i awlofuɛ'm be kwlaa be kotoli Anannganman i bo-ɔ.