1 Piɛr 5 - NYANMIƐN NDƐ'N 1998

Nyanmiɛn bua'm be lika nianlɛ

¹ I sɔ'n ti, m ma srɛ amun bɔ an ti asɔnun kpɛnngbɛn'n amun like kun. M bɔbɔ n ti asɔnun kpɛnngbɛn kɛ amun sa, n kan Krist i nyrɛnnɛn b'ɔ wunnin i'n i ndɛ, yɛ anyrunnyan like nga Nyanmiɛn wa yi i nglo'n, n dunman'n ´tɛ nun wie. N ´srɛ amun,

² an `nian Nyanmiɛn i bua fa b'ɔ fa be mannin amun'n be lika. Nán an yo i mianlɛ su, an `yo i kɛ Nyanmiɛn klo kɛ an yo'n sa. Nán an yo i kɛ amun wa nyan like ti, sanngɛ an `tu amun klun yo .

³ Nán an tin be nga be fa be mannin amun kɛ an nian bé su'n bé su, sanngɛ an `yo sa ng'ɔ ti kpa'n man be nian su.

⁴ Yɛ cɛn nga Bua Tafuɛ Dan'n ba'n, ɔ ´yo amun mo, dunman nga amun ´nyɛn i'n, ɔ su wie-man mlɔnmlɔn.

⁵ Gbanflɛn mun, amun kusu an `bu kpɛnngbɛn'm be sran. Amun kwlaa an `yo amún wun kɛ kanga sa, yɛ an `uka amun wun, afin be klɛli i Nyanmiɛn Ndɛ'n nun kɛ: «Nyanmiɛn nin be nga be tu bé wun mun be lɛ i, sanngɛ ɔ yo aenvuɛfuɛ'm be ye .»

⁶ I sɔ'n ti, an `yo amún wun aenvuɛfuɛ'm Nyanmiɛn b'ɔ kwla sa kwlaa yo'n i nyrun nan sɛ cɛn ng'ɔ sieli'n ju'n ɔ'a man amun su .

⁷ An `koko sa ng'ɔ o amun su'n i kwlaa kle i, afin i yɛ ɔ nian amun lika-a .

⁸ An `sasa amun wun, an `nian-nian! Afin mmusu'm bé si Satan b'ɔ ti amun kpɔfuɛ'n, ɔ ti kɛ asɔmɔli b'ɔ wlan-wlan ɔ kpan kunndɛ nnɛn'n sa.

⁹ Nán an lo amún wun mɛn i, an `jran kekle Nyanmiɛn su bɔ an lafi'n ti. Afin an si kɛ amun niaan nga be o mɛn'n nun'n be kwlaa, be wun nyrɛnnɛn kunngba sɔ'n wie.

¹⁰ Kɛ an wun nyrɛnnɛn le nnyɔn kun'n, Nyanmiɛn aklunyefuɛ kpli'n, b'ɔ flɛli amun kɛ an `nyan nyrun titi'n sran wunmuan bɔ an nin Krist amu'an kaci'n ti'n, i bɔbɔ man amun ´yo sran kpa mlɔnmlɔn. Ɔ ´yo man amun ´jran kekle, ɔ ´wla amun fanngan, ɔ man amun wun su usu-man amun.

¹¹ I yɛ ɔ kwla tititi-ɔ. Man ɔ yo sɔ!

Be like yolɛ

¹² E niaan Silvɛn bɔ n wunnin kɛ e kwla fa é wla guɛ i su'n, i yɛ ɔ uka min e klɛli ndɛ kaan nga n klɛ blɛ amun yɛ nin-ɔn. Min waan n ´wla amun fanngan yɛ n ´kan kle amun kɛ ye nga Nyanmiɛn yo ye'n, i yɛ ɔ ti ye kpafuɛ nin-ɔn. I ti, an `jran kekle.

¹³ Kristfuɛ nga be o Babilɔni bɔ Nyanmiɛn flɛli be kɛ amun sa'n, be nin n wa Mark be ´yo amun like.

¹⁴ Amun `yo amun wiengu like be man min. Amun tɔ amun wun nun gbuduu. Nyanmiɛn man amun kwlaa bɔ an ti Krist liɛ'n, amún wun jɔ amun fɔuun!