1 Piɛr 4 - NYANMIƐN NDƐ'N 1998

Be nga be nzuɛn'n ɔ'a kaci'n

¹ Kɛ Krist wunnin nyrɛnnɛn'n ti, amun kusu an `bu akunndan kunngba ng'ɔ buli'n wie, an `tra amun anwlɛn.

² Afin Kristfuɛ ng'ɔ wun nyrɛnnɛn'n, wuun ɔ nin sa tɛ'n b'a bu. Ɔ man cɛn nga an tɛ di i asiɛ'n su wa'n, an `fa yo Nyanmiɛn klun sa, nán an yo klɔ sran klun sa kun.

³ Afin an yoli amun klun sa'n cɛli kɛ be nga be ti-man Kristfuɛ'n be yo'n sa. An boli wlaka, amún nyin bloli ninnge'm bé su, an nɔnnin nzan boli, an yoli sa finfin mun, an yia nɔnnin nzan lelele, yɛ an sɔli amuɛn.

⁴ Kɛ be nga be ti-man Kristfuɛ'n be wun kɛ amun nin be san-man nun yo-man sa tɛtɛ sɔ'm be kun'n, ɔ bo bé nuan, yɛ be kpɛ amun nzowa.

⁵ Sanngɛ be wa kan sa nga be yoli'n kle Nyanmiɛn b'ɔ wa di be nga bé nyin o su'n, nin be nga be wuli'n be jɔlɛ'n.

⁶ I sɔ'n ti yɛ be kan jasin fɛ'n kleli be nga be wuli'n be kusu nin-ɔn. Be kɛn i sɔ kleli be nan be nga be buli be fɔ kɛ be fa bu sran'm be kwlaa be fɔ sa'n, be wawɛ'n ´ka lɛ kɛ Nyanmiɛn o lɛ'n sa.

⁷ Like'n kwlaa be awieliɛ'n ɔ'a mantan. I sɔ'n ti, an `bu akunndan, yɛ an `nian amún wun su nan amu'an kwla koko yalɛ a kle Nyanmiɛn.

⁸ Sa ng'ɔ ti dan trɛ i ngba'n yɛlɛ kɛ an `klo amún wun, afin sran ng'ɔ klo sran'n, ɔ yaci sa tɛ kpanngban nga be yo i cɛ .

⁹ Sran ng'ɔ to amun'n, an `sike i, nán an ijɔ amun konviabo.

¹⁰ Kɛ bɔ Nyanmiɛn mannin amun ninnge wafa-wafa nga sran yo'n i wie'n, man sran kun fɛ i liɛ nga Nyanmiɛn mɛnnin i'n ukɛ i wiengu.

¹¹ Sran ng'ɔ kan Nyanmiɛn ndɛ'n, man ɔ kan ndɛ nga Nyanmiɛn kleli i'n, yɛ nga kusu b'ɔ nian asɔnunfuɛ'm be lika'n, man ɔ fa wunmiɛn ng'ɔ mɛnnin i'n, di junman sɔ'n, nan sa'n kwlaa nun Jésus-Krist b'ɔ lɛ nyrun'n, b'ɔ kwla like kwlaa yo'n, i ti man Nyanmiɛn nyan nyrun tititi. Man ɔ yo sɔ!

Kristfuɛ'n i nyrɛnnɛn wunlɛ

¹² N sran kpa mun, nán man sa ng'ɔ tɔ amún su amun sa nianlɛ'n ti'n, ɔ bo amún nuan. Nán an bu i kɛ ɔ ti sa tɛ.

¹³ Sanngɛ kɛ an wun nyrɛnnɛn kunngba nga Krist wunnin i'n wie'n, man amun klun jɔ nan cɛn nga be ´yi i sran wafa ng'ɔ ti'n i nglo'n, amun klun a jɔ kpa.

¹⁴ Sɛ be kpɛ amun nzowa Krist dunman b'ɔ o amun su'n ti'n, amun liɛ su ti ye, afin Nyanmiɛn Wawɛ'n b'ɔ lɛ nyrun'n ɔ nin amun wo nun !

¹⁵ Nyrɛnnɛn nga an wun i'n, nán man ɔ yo kɛ amu'an kun sran yɛ amu'an wua, nán man ɔ yo kɛ amu'an yo sa tɛ wie yɛ amu'an fa amún nuan a wlɛwlɛ sran wie'm be ndɛ nun.

¹⁶ Sanngɛ sɛ an wun nyrɛnnɛn Kristfuɛ bɔ an ti'n ti'n, nán man nyannzuɛn kun amun, sanngɛ an `la Nyanmiɛn ase dunman sɔ'n b'ɔ o amun su'n ti.

¹⁷ Cɛn nga be ´bo jɔlɛ dilɛ'n bo'n ɔ'a ju, be ´bo i bo Nyanmiɛn bɔbɔ i awlo'n nun. ?Sɛ e su yɛ be ´bo i bo'n, be nga be fa-man Nyanmiɛn jasin fɛ'n su'n, be liɛ'n ´yo sɛ?

¹⁸ ?Sɛ be nga be ti kpa'n bé ti nyanlɛ'n ti kekle'n, be nga be sro-man Nyanmiɛn bɔ be yo sa tɛtɛ'n, be liɛ'n ´yo sɛ ?

¹⁹ I sɔ'n ti, be nga be nyrɛnnɛn wunlɛ'n ɔ ti Nyanmiɛn klun su'n, man be fa bé wun man Nyanmiɛn b'ɔ yili be'n, bɔ be kwla fa bé wla guɛ i su'n. Man be yo sa ng'ɔ ti kpa'n tititi.