1 Piɛr 3 - NYANMIƐN NDƐ'N 1998

Yasua nin i yi be tranlɛ

^1-2 Mmo mun, amun kusu an `bu amún wun'm be sran, nán an fa amún nyin wlawla be. I liɛ'n sɛ be nun wie'm be fa-man Nyanmiɛn ndɛ'n su'n, kɛ be wun amun nzuɛn kpa'n nin sran bɔ an bu be'n, an su kan-man ndɛ fi nan b'a yaci .

³ Kɛ amun ´siesie amun wun'n, nán man ɔ yo be wunnɛn su like kɛ bé ti yolɛ, nin sika wlalɛ, ɔ nin tralɛ klanman wlalɛ sa.

⁴ Sanngɛ man be wun amun klanman'n amun nzuɛn'n, nin amun anwlɛn wɛtɛɛ'n, ɔ nin diin bɔ an ti'n nun. Klanman sɔ'n wie-man, ɔ ti kpa Nyanmiɛn nyrun.

⁵ Laa bla nga be sro Nyanmiɛn'n, bɔ be wla o i su'n, kɛ be siesie bé wun sɔ-ɔ, yɛ be bu be wun'm be sran.

⁶ Kɛ Sara kusu yoli sɔ-ɔ, i nyin yili Abraam, ɔ man ɔ flɛli i kɛ i min. Sɛ an yo sa ng'ɔ ti kpa'n, bɔ srɛ kun-man amun sa fi nun'n, an ti i mma mun.

⁷ Nja mun, kɛ bɔ an si kɛ amún yi'm be wunmiɛn'n ju-man amun liɛ nun'n, amun nin be tran kpa. An `bu be sran, afin ye nga Nyanmiɛn yoli amun b'ɔ man amun ´nyan nguan'n, ɔ yoli be wie. Sɛ an yo-man sɔ'n, amun nin Nyanmiɛn su kwla koko-man yalɛ wafa ng'ɔ ti su'n.

Nyrɛnnɛn nga be wun i sa kpa yolɛ'n ti'n

⁸ Min ndɛ'n i atabo'n yɛ, man amun akunndan'n yo kun, man amun nuan `sɛ, an `klo amun wiengu kɛ amun niaan sa, an `si i aunnvuɛ, yɛ an `yo amún wun aenvuɛ.

⁹ Sɛ sran yo amun tɛ'n, nán an yo i wie, sɛ be kpɛ amun nzowa'n, nán an yi man be, sanngɛ an `yra be nguan, afin kɛ Nyanmiɛn flɛli amun'n, ɔ seli kɛ ɔ ´yra amun nguan. Be klɛli i Nyanmiɛn Ndɛ'n nun kɛ:

¹⁰ «Sran ng'ɔ klo kɛ ɔ ´di alaje nan i klun `jɔ titi'n, nán man ɔ ijɔ tɛtɛ kun. Man ɔ yaci ato bualɛ'n.

¹¹ Man ɔ wla sa tɛtɛ'n i ase, yɛ ɔ yo sa kpa, man ɔ nin sran'm be kwlaa bé nuan sɛ, yɛ man sran'm be afiɛn siesielɛ'n kaci i junman,

¹² Afin e Min i nyin wo i sufuɛ nanwlɛfuɛ'm bé su. Yɛ i su o yalɛ nga be koko kle i'n su, sanngɛ ɔ nin be nga be yo sa tɛ'n be kun .»

¹³ ?Sɛ an tu amun klun yo sa ng'ɔ ti kpa'n, wan yɛ ɔ kwla yo amun tɛ-ɔ?

¹⁴ Sɛ bɔ an yo sa kpa nan i sɔ'n ti an wun nyrɛnnɛn'n, amun liɛ su ti ye! Nán an sro sran mun, nán amun akunndan sanngan.

¹⁵ Sanngɛ an `bu Krist sran, yɛ an `bu i amun Min. An `bu sa ti yɛ amún wla o Krist su'n i akunndan sie nan sɛ be usa amun i su sa'n amu'an kwla tɛ su .

¹⁶ Sanngɛ an `tɛ be su amanniɛn su, man be wun kɛ an sro Nyanmiɛn. Kɛ amun ´yo sɔ'n, nán an yo sa nga b'ɔ man amun ´koko i sin'n nan be nga be saci amun dunman'n, bɔ be kan sa kpa nga Krist ti an yo be'm be ndɛ'n, be wun nyannzuɛn.

¹⁷ Sɛ sa kpa nga an yo be'n ti an wun nyrɛnnɛn b'ɔ ti Nyanmiɛn klun su'n, ɔ ti kpa tra kɛ amu'an yo sa tɛ nan amu'an wun nyrɛnnɛn'n.

¹⁸ Amún ti tɛ yɛ Krist fɛ i wun yili-ɔ. Ɔ yoli i kpɛ kunngba. Ɔ su yo-mɛn i kun. I b'ɔ ti sran kpa'n, sa tɛ yofuɛ'm be ti ɔ wuli nan ɔ ´fa amun man Nyanmiɛn. Be kunnin i, sanngɛ Nyanmiɛn Wawɛ'n cɛnnin i.

¹⁹ Wawɛ sɔ'n i fanngan nun yɛ ɔ ko kan ndɛ kleli wawɛ nga be wlali be bisua nin-ɔn.

²⁰ Be nga laa kɛ Noe ´bobo mmeli'n be yoli nyin kekle Nyanmiɛn su'n, b'ɔ trɛli i anwlɛn bé wun'n, be wawɛ mun-ɔn. Sran mɔcuɛ cɛ yɛ be fuli mmeli sɔ'n nun be trannin nzue'n i nyin su lele be nyannin be ti-ɔ .

²¹ Nzue sɔ'n ti batɛm b'ɔ man amu'an nyan amún ti ndɛ'n i nzɔliɛ. Nán kɛ ɔ wunnzin amun wunnɛn'n su fiɛn-ɔn, sanngɛ ɔ man e srɛ Nyanmiɛn kɛ nán man e klun titi ye kun. Jésus-Krist i cɛnlɛ'n ti yɛ e nyannin é ti-ɔ.

²² Ɔ ɔli nyanmiɛn su lɔ, ɔ o Nyanmiɛn i sa fama su, ɔ sie anz mun, nin lɔ kpɛnngbɛn mun, ɔ nin be ngblewa-ngblewa mun.