1 Piɛr 2 - NYANMIƐN NDƐ'N 1998

Krist ti kɛ yɛbuɛ sa. Nyanmiɛn i sran mun

¹ I sɔ'n ti, an `wla klunwi'n kwlaa, nin gblɛ'n kwlaa, nin dunman kunndɛlɛ'n, nin amún nyin bɔ an fa ci sran'n, ɔ nin sran wun ndɛ tɛ kanlɛ'n kwlaa be ase.

² Kɛ ba nɔnman kunndɛ nyɔnflɛn'n, amun kusu an `kunndɛ Nyanmiɛn ndɛ b'ɔ ti kɛ nɔnnɔn bɔ b'a gua-man nun like'n sa. Sɛ amun nɔn'n, amun ´yo sran yɛ amun ´nyan amún ti.

³ Afin an wunnin kɛ e Min'n ti kpa .

⁴ An `fa amun wun mɛntɛn i, afin ɔ o lɛ tititi. I yɛ ɔ ti yɛbuɛ bɔ sran'm be yili i blo bɔ sanngɛ Nyanmiɛn wunnin kɛ ɔ ti kpa b'ɔ fali nin-ɔn .

⁵ Amun kusu an ti kɛ yɛbuɛ b'ɔ o lɛ tititi'n sa, man be fa amun wla Nyanmiɛn sua bɔ i Wawɛ'n kplan'n nun wie, yɛ amun ´kaci Nyanmiɛn nyrun jranfuɛ mun bɔ i Wawɛ'n man amun ´sɔ i wafa uflɛ su. Jésus-Krist ti, i sɔlɛ sɔ'n ɔ ´jɔ i klun.

⁶ Afin be klɛli i Nyanmiɛn Ndɛ'n nun kɛ: «An `nian, n fali yɛbuɛ kpa kun bɔ n ´sie i Siɔn lɔ kɛ yɛbuɛ kpa b'ɔ tra sua'n i cɔnjɔ'n i ase'n sa, sran ng'ɔ lafi i su'n, i nyin su gua-man ase .»

⁷ Amun bɔ an lafi yɛbuɛ sɔ'n su'n, ɔ ti amun like kpa. Sanngɛ ɔ seli be nga be lafi-mɛn i su'm be kɛ: «Yɛbuɛ bɔ sua kplanfuɛ'm be yili i blo'n, i yɛ ɔ'a kaci yɛbuɛ kpa b'ɔ tra sua'n i cɔnjɔ'n i ase nin-ɔn .

⁸ Ɔ ti yɛbuɛ b'ɔ kpla sran'm bé ja, ɔ ti yɛbuɛ dan kun bɔ sran'm be fin ase su.» Bé ja'n kplɛli i yɛlɛ kɛ b'a fa-man Nyanmiɛn ndɛ'n su, afin kɛ Nyanmiɛn'n sieli be liɛ'n sɔ-ɔ .

⁹ Sanngɛ amun liɛ'n, an ti sran bɔ Nyanmiɛn fali amun, an ti Famiɛn Nyanmiɛn'n i nyrun jranfuɛ mun, an ti Nyanmiɛn i nvle'n nun sran mun, yɛ an ti i liɛ mlɔnmlɔn. Ɔ fali amun kɛ an yi i b'ɔ flɛli amun kɛ an jao aosin nun, an bla lika ng'ɔ kpaja kpa nun'n i ayɛ .

¹⁰ Laa an ti-man Nyanmiɛn sran mun, sanngɛ siɛn'n, amu'an kaci i sran mun. Laa Nyanmiɛn a si-man amun aunnvuɛ, sanngɛ siɛn'n, ɔ'a si amun aunnvuɛ .

Sa nga Nyanmiɛn sran'm be yo'n

¹¹ N sran kpa mun, an ti aofuɛ nin wlan-wlanfuɛ asiɛ'n su, ɔ man n ´srɛ amun kɛ an `wla amun konvi b'ɔ man amún nyin blo ninnge'm be su'n i ase, afin konvi sɔ'n kwla kun ye.

¹² An `yo sa ng'ɔ ti kpa'n be nga be ti-man Kristfuɛ'n be nyrun nan sɛ be saci amun dunman kɛ an ti sa tɛ yofuɛ mun'n, be wun sa kpa nga an yo be'n nan cɛn nga Nyanmiɛn ´ba'n, be `mɛnmɛn i.

¹³ E Min'n ti, man amún nyin yi kpɛnngbɛn nga be sieli be'n be kwlaa: famiɛn ng'ɔ ti dan nin o,

¹⁴ sɛ i sran ng'ɔ sie be b'ɔ sunman be kɛ be tu be nga be yo sa tɛ'n be fɔ nan be yo be nga be yo sa kpa'n be mo mun o.

¹⁵ Sa nga Nyanmiɛn klo'n yɛlɛ kɛ an yo sa ng'ɔ ti kpa'n. I sɔ'n nun sinnglinfuɛ bɔ be wun-man sa wlɛ'n, be su kwla kan-man ndɛ fi.

¹⁶ Amu'an nyan amún ti, i sɔ'n ti, an `yo sa ng'ɔ ti kpa'n. Nán amún ti nyanlɛ sɔ'n kaci sa tɛ, sanngɛ man be wun kɛ an ti Nyanmiɛn i sran mun.

¹⁷ An `bu sran'm be kwlaa be sran, an `klo amun niaan Kristfuɛ mun, man amún nyin yi Nyanmiɛn, an `bu famiɛn'n i sran.

Man nyrɛnnɛn'n sɔn amun nun kɛ Krist liɛ'n sa

¹⁸ Kanga mun, man amún nyin yi amun min mun kpa, an `bu be sran. Nán be nga be ti kpa bɔ be ti wɛtɛɛ'n be ngunmin yɛ an `yo be sɔ-ɔ, sanngɛ man amún nyin yi be nga be yo wlɛ'n.

¹⁹ Afin sɛ be kle amun nyrɛnnɛn b'ɔ ti-mɛn i su'n, b'ɔ sɔn amun nun Nyanmiɛn srolɛ bɔ an sro i ti'n, ɔ ti kpa.

²⁰ ?Sanngɛ sɛ an yo sa'n, bɔ an tra amun anwlɛn an jran lɛ be bo amun'n, nzu mo yɛ be ´yo amun-ɔn? Sanngɛ sɛ an yo kpa bɔ be blu su be kle amun nyrɛnnɛn'n, b'ɔ nyrɛnnɛn sɔ'n ɔ sɔn amun nun'n, i sɔ'n yɛ ɔ yo Nyanmiɛn fɛ-ɔ.

²¹ I sɔ yolɛ ti yɛ Nyanmiɛn flɛli amun-ɔn, afin amun ti, Krist bɔbɔ wunnin nyrɛnnɛn. Ɔ yoli sɔ kɛ an nian su nan an nanti i ajalɛ liɛ'n su.

²² Ɔ'a yo-man sa tɛ le, b'a ti-man gblɛ ndɛ fi i nuan nun le .

²³ Be kpɛli i nzowa, ɔ'a yi-man a man-man be, be kleli i nyrɛnnɛn, ɔ'a fua-man be ti, sanngɛ ɔ fɛ i ndɛ liɛ'n wlali Nyanmiɛn b'ɔ di ndɛ nanwlɛ'n i sa nun .

²⁴ Krist bɔbɔ jrannin é sa tɛ'n i nuan be boboli i waka'n su nan e nin sa tɛ'n e `bu, yɛ e `yo sa ng'ɔ ti kpa'n. I wunnɛn susuwa'n ti yɛ man y'a yo juejue-ɔ.

²⁵ Laa an ti kɛ bua bɔ b'a bo nzanndri'n sa, sanngɛ siɛn'n amu'an sa amún sin amun Tafuɛ b'ɔ ti amun Sunianfuɛ'n i sin .