1 Jean 5 - NYANMIƐN NDƐ'N 1998

Mɛn'n nun ninnge nga be ti kɛ e kpɔfuɛ sa bɔ e kwla be'n

¹ Sran kwlaa ng'ɔ lafi su kɛ Jésus ti Krist'n, wuun ɔ ti Nyanmiɛn wa. Sran nga be klo i'n, be klo i nin i wa'n.

² Sɛ e klo Nyanmiɛn bɔ e fɛ i ndɛ'n su'n, yɛ e ´si kɛ e klo i mma mun-ɔn.

³ Nyanmiɛn i klolɛ'n yɛlɛ kɛ e fɛ i ndɛ'n su, i ndɛ sɔ'n i su falɛ'n yo-man ya .

⁴ Mɛn'n nun ninnge kwlaa be ti kɛ e kpɔfuɛ sa, be kwlaa nga be ti Nyanmiɛn wa'n, be kwla ninnge sɔ mun. Nyanmiɛn su bɔ e lafi'n ti yɛ man e kwla mɛn'n nun ninnge sɔ'm be kwlaa bɔ be ti kɛ e kpɔfuɛ sa mun-ɔn.

⁵ ?Wan yɛ ɔ kwla mɛn'n nun ninnge'm be kwlaa bɔ be ti kɛ e kpɔfuɛ sa nin-ɔn? ?Nán sran ng'ɔ lafi su kɛ Jésus ti Nyanmiɛn Wa nin-ɔn?

Jésus-Krist i ndɛ bɔ be kan'n

⁶ Sran ng'ɔ bali'n yɛlɛ Jésus-Krist. Kɛ ɔ bali'n, nzue nin mmoja yɛ man be sili i-ɔ. Nán nzue ngunmin yɛ man be sili i-ɔ, sanngɛ be nnyɔn nin-ɔn. Yɛ Nyanmiɛn Wawɛ'n seli kɛ ndɛ sɔ'n ti nanwlɛ, afin Wawɛ'n bɔbɔ ti nanwlɛfuɛ.

⁷ Lalofuɛ'm be ti nsan,

⁸ Nyanmiɛn Wawɛ'n, nin nzue'n, ɔ nin mmoja'n. Be nsan'n be ndɛ'n ti kun.

⁹ Sɛ e fa ndɛ nga sran'm be wun nun bɔ be kan'n su'n, Nyanmiɛn liɛ ng'ɔ kan'n i nanwlɛ'n tra be liɛ'n, afin ndɛ nga Nyanmiɛn kan'n yɛlɛ i Wa'n i ndɛ'n.

¹⁰ Sran ng'ɔ lafi Nyanmiɛn Wa'n su'n, ɔ si ndɛ sɔ'n weiin, sanngɛ sran ng'ɔ lafi-man Nyanmiɛn su'n, ɔ bu i atofuɛ yɛlɛ kɛ ɔ lafi-man Nyanmiɛn Wa'n i wun ndɛ b'ɔ kannin'n su.

¹¹ An `nian, ndɛ sɔ'n yɛ: Nyanmiɛn mannin ye anannganman nguan, i Wa'n ti yɛ man e nyannin nguan sɔ nin-ɔn.

¹² Sran ng'ɔ nin Nyanmiɛn Wa'n ti sran wunmuan'n, ɔ lɛ anannganman nguan, sran ng'ɔ nin ti ti-man sran wunmuan'n, ɔ lɛ-man anannganman nguan.

Anannganman nguan'n

¹³ N klɛ ndɛ sɔ'n blɛli amun nan amun bɔ an lafi Nyanmiɛn Wa'n su'n, an si kɛ an lɛ anannganman nguan.

¹⁴ An `nian, sa nga ti yɛ é wla'n wo Nyanmiɛn su dan'n yɛ: e si kɛ like kwlaa nga e srɛ i'n, b'ɔ ti i klun su'n, ɔ ´man ye.

¹⁵ Sɛ e si kɛ like nga e srɛ i'n ɔ ´man ye'n, like kwlaa nga e srɛ i'n, sɛ ɔ ti sɛ ɔ ti sɛ o, e si kɛ y'a nyɛn i.

¹⁶ Sɛ sran wie wun i niaan kun b'ɔ su yo sa tɛ b'ɔ ti-mɛn i wie liɛ'n, man ɔ srɛ Nyanmiɛn kɛ ɔ man sran sɔ'n i nguan, yɛ ɔ ´mɛn i. Be nga be yo sa tɛ b'ɔ ti-man be wie liɛ'n, be ndɛ yɛ n kan-an. Sa tɛ'n wie o lɛ be yo-ɔ ɔ ti be wie liɛ, nɛ́n i sɔ sa liɛ'n ti yɛ n se kɛ be srɛ Nyanmiɛn nin-ɔn.

¹⁷ Sa kwlaa nga be yo b'ɔ kɔ-man atin su'n ti sa tɛ. Sa tɛ'n wie o lɛ ɔ ti-man be wie liɛ.

¹⁸ Sran kwlaa ng'ɔ ti Nyanmiɛn wa'n, e si kɛ ɔ ka-man sa tɛ yolɛ'n su, afin Nyanmiɛn Wa'n sɛsɛ i, ɔ man Klunwifuɛ'n kwla yo-mɛn i sa fi.

¹⁹ E si kɛ e ti Nyanmiɛn liɛ yɛ Klunwifuɛ'n sie mɛn wunmuan'n.

²⁰ E si kusu kɛ Nyanmiɛn Wa'n bali yɛ ɔ kle ye ngwlɛlɛ nan e si Nanwlɛfuɛ'n. E nin Nanwlɛfuɛ sɔ'n y'a yo kun i wa Jésus-Krist ti. I yɛ ɔ ti Nyanmiɛn nin-ɔn, i yɛ be flɛ i nguan nin-ɔn.

²¹ M mma mun, an `nian amún wun amuɛn'm be lika.