1 Jean 4 - NYANMIƐN NDƐ'N 1998

Nyanmiɛn Wawɛ'n nin Krist i Kpɔfuɛ'n

¹ N sran kpa mun, be nga be se kɛ be ijɔ Nyanmiɛn Wawɛ'n nuan'n, nán an lafi be ngba su. An `sa be nian, sɛ be ijɔ Nyanmiɛn nuan sakpa o, annzɛ sɛ like wie yɛ be ijɔ i nuan o. Afin be nga be tɔn bé wun suɛn kɛ be ti Nyanmiɛn nuan ijɔfuɛ'n, be kpanngban kpa b'a ba mɛn'n nun.

² An `nian, sa wafa nga amun fa si sran ng'ɔ ijɔ Nyanmiɛn Wawɛ'n nuan'n yɛ: sran kwlaa ng'ɔ se kɛ Jésus-Krist kacili sran ɔ bali'n, i sɔfuɛ'n yɛ ɔ ijɔ Nyanmiɛn Wawɛ'n nuan-an.

³ Sanngɛ sran ng'ɔ lafi-man su kɛ Jésus kacili sran'n, nán Nyanmiɛn Wawɛ'n nuan yɛ ɔ ijɔ-ɔ, Krist i Kpɔfuɛ'n bɔ an tili i kɛ ɔ ´ba'n, bɔ kɛ e ´se yɛ'n ɔ o mɛn nun'n i nuan yɛ ɔ ijɔ-ɔ.

⁴ M mma mun, amun liɛ'n, an ti Nyanmiɛn liɛ, ɔ man an kwlali be, afin Nyanmiɛn Wawɛ ng'ɔ o amun nun'n ɔ lɛ kwlalɛ tra Krist i kpɔfuɛ'n b'ɔ o mɛn'n nunfuɛ'm bé sin'n.

⁵ Be nga'm be liɛ'n, be ti mɛn'n nunfuɛ, ɔ man be ndɛ nga be kan'n ti mɛn'n nun ndɛ, yɛ man mɛn'n nunfuɛ'm be sie bé su be ndɛ'n su nin-ɔn.

⁶ E liɛ'n, e ti Nyanmiɛn liɛ, ɔ man sran ng'ɔ si Nyanmiɛn'n, ɔ sie i su e ndɛ'n su, sanngɛ sran ng'ɔ ti-mɛn i liɛ'n, ɔ sie-mɛn i su e ndɛ'n su. I sɔ'n nun yɛ e ´si Nyanmiɛn Wawɛ'n i ndɛ'n b'ɔ ti nanwlɛ'n, ɔ nin ndɛ ng'ɔ ti-man nanwlɛ nin-ɔn.

Nyanmiɛn yɛ ɔ ti sran klofuɛ nin-ɔn

⁷ N sran kpa mun, man e klo e wun, afin sran klolɛ'n fin Nyanmiɛn. Sran kwlaa ng'ɔ klo sran'n, ɔ ti Nyanmiɛn wa, yɛ ɔ si Nyanmiɛn.

⁸ Sran ng'ɔ klo-man sran'n, wuun ɔ si-man Nyanmiɛn, afin Nyanmiɛn'n yɛ ɔ ti sran klofuɛ nin-ɔn.

⁹ An `nian kɛ klolɛ nga Nyanmiɛn fa klo ye'n i nyin fiteli dan-an: ɔ sunmɛnnin i Wa kunngba'n mɛn'n nun nan e `nyan nguan.

¹⁰ Klolɛ sɔ'n, nán e yɛ e kloli Nyanmiɛn-ɔn, i yɛ ɔ kloli ye-ɔ nan ɔ'a sunmɛn i Wa kunngba'n kɛ ɔ fɛ i wun yi é ti tɛ.

¹¹ N sran kpa mun, sɛ Nyanmiɛn klo ye dan kɛ nga sa'n, man e kusu e klo e wun sɔ.

¹² Sran fi nian wun-man Nyanmiɛn le. Sɛ e klo e wun'n, wuun e nin Nyanmiɛn e ti kun, yɛ klolɛ ng'ɔ man e fa klo sran'n i nyin'n ´fite weiin.

¹³ Sa nga b'ɔ man e si kɛ e nin Nyanmiɛn y'a kaci sran wunmuan nan e nin i e tran'n yɛlɛ kɛ ɔ fɛ i Wawɛ'n mannin ye.

¹⁴ E wun kɛ e Si sunmɛnnin i Wa'n mɛn'n nun kɛ ɔ wa de sran mun yɛ man e kan-an.

¹⁵ Sran ng'ɔ se kɛ Jésus ti Nyanmiɛn Wa'n, wuun ɔ nin Nyanmiɛn b'a kaci sran wunmuan, yɛ ɔ nin i be tran.

¹⁶ E si kɛ Nyanmiɛn klo ye, ɔ man e lafi i su. Nyanmiɛn yɛ ɔ ti sran klofuɛ nin-ɔn, ɔ man sran ng'ɔ klo sran'n, wuun ɔ nin Nyanmiɛn b'a kaci sran wunmuan, yɛ ɔ nin i be tran.

¹⁷ Kɛ e klolɛ nga e fa klo Nyanmiɛn'n i nyin fiteli weiin'n, ɔ man e si kɛ jɔlɛ dilɛ cɛn'n nun é wla'n ´gua ase. Afin kɛ ɔ fa ti'n, kɛ e kusu e ti sɔ mɛn'n nun-ɔn.

¹⁸ Srɛ kun-man be sran nga be klo i'n i wun, sɛ be klo i sakpa'n, srɛ kwla kun-man be i wun. I sɔ'n ti, sran nga srɛ tɛ kun i'n, wuun ɔ klo-man Nyanmiɛn kpa, afin fɔ tulɛ'n ti yɛ srɛ kun sran nin-ɔn.

¹⁹ E liɛ'n, e klo Nyanmiɛn, afin ɔ dun mmua kloli ye.

²⁰ Sɛ sran kun se kɛ ɔ klo Nyanmiɛn sanngɛ ɔ kpɔ i niaan'n, wuun ato yɛ ɔ bua-a. ?Afin sɛ ɔ klo-mɛn i niaan'n b'ɔ wun i'n, ɔ ´yo sɛ yɛ ɔ kwla klo Nyanmiɛn b'ɔ wun-mɛn nin-ɔn?

²¹ An `nian, mmla nga Krist fa mannin ye'n yɛ: i waan sran ng'ɔ klo Nyanmiɛn'n man ɔ klo i niaan kusu.