1 Jean 3 - NYANMIƐN NDƐ'N 1998

Nyanmiɛn mma mun

¹ An `nian klolɛ nga e Si Nyanmiɛn fa klo ye-ɔ! Klolɛ dan sɔ'n ti yɛ be flɛ e i mma mun nin-ɔn. Yɛ e ti i mma mun sakpa. An `nian, sa nga ti yɛ mɛn'n nunfuɛ'm be si-man ye'n yɛlɛ kɛ be si-man Nyanmiɛn .

² N sran kpa mun, siɛn'n e ti Nyanmiɛn i mma mun, sanngɛ wafa nga e ´kaci ju'n, e nian wun-mɛn i ka, sanngɛ e si kɛ, kɛ Krist wa yi i wun nglo'n, e ´kaci kɛ i sa, afin e ´wun kɛ ɔ fa ti'n.

³ Sran kwlaa nga i wla o su sɔ'n, ɔ yo man sa tɛ kaan sa trɛn-mɛn i wun, afin sa fi nun-man Krist wun.

⁴ Sran kwlaa ng'ɔ yo sa tɛ'n, wuun ɔ'a tɔn Nyanmiɛn mmla'n, afin sa tɛ'n yɛ ɔ ti mmla'n i tɔnlɛ nin-ɔn.

⁵ Afin an si kɛ Krist bali sa tɛ'n i nuan nnya bulɛ, yɛ sa tɛ kaan sa bɔn-mɛn i wun.

⁶ Sran kwlaa ng'ɔ nin i be ti sran wunmuan'n, ɔ yo-man sa tɛ, sanngɛ sran kwlaa ng'ɔ yo sa tɛ'n, wuun ɔ'a wun-man i min sɔ'n yɛ ɔ'a si-mɛn i.

⁷ M mma mun, nán an fa amun wun man sran fi man ɔ laka amun. Sran ng'ɔ yo sa b'ɔ kɔ atin su'n, ɔ ti sran kpa kɛ Krist ti sran kpa'n sa.

⁸ Sran ng'ɔ yo sa tɛ'n, ɔ ti mmusu'm bé si Satan'n i liɛ, afin kɛ ɔ fin i bo bolɛ nun'n, mmusu'm bé si Satan'n ti sa tɛ yofuɛ. Nyanmiɛn Wa'n bali sa nga mmusu'm bé si Satan yo'n i nuan nnya bulɛ.

⁹ Sran ng'ɔ ti Nyanmiɛn wa'n, ɔ ka-man sa tɛ yolɛ'n su, afin Nyanmiɛn i nzuɛn'n ɔ'a kɛ i nun, yɛ ɔ kwla yo-man sa tɛ, afin ɔ ti Nyanmiɛn wa.

¹⁰ I sɔ'n nun yɛ be fa si be nga be ti Nyanmiɛn wa, nin be nga be ti mmusu'm bé si Satan'n i wa nin-ɔn, afin sran kwlaa ng'ɔ yo sa ng'ɔ ti-man kpa'n, b'ɔ kpɔ i niaan'n, ɔ ti-man Nyanmiɛn wa.

Bé wun klolɛ

¹¹ An `nian, ndɛ nga kɛ ɔ fin i bo bolɛ nun'n an tili'n yɛ: yɛlɛ kɛ e `klo e wun.

¹² Nán man e yo kɛ Kaɛn bɔ kɛ ɔ ti Klunwifuɛ'n i liɛ'n ti ɔ kunnin i niaan bian'n sa. ?Nzu ti yɛ ɔ kunnin i-ɔ? Yɛlɛ kɛ sa nga i bɔbɔ yo be'n be kɔ-man atin su, sanngɛ i niaan bian liɛ'n kɔ atin su .

¹³ Aniaan mun, sɛ mɛn'n nunfuɛ'm be kpɔ amun'n, nán man ɔ bo amún nuan.

¹⁴ E si kɛ y'a nyan é ti wie'n sa nun, yɛ y'a nyan nguan, yɛlɛ kɛ e klo e niaan mun. Sran ng'ɔ klo-man sran'n, wuun ɔ tɛ o wie'n sa nun.

¹⁵ Sran kwlaa ng'ɔ kpɔ i niaan'n, wuun ɔ ti sran kunfuɛ, yɛ an si kɛ sran kunfuɛ'n ɔ lɛ-man anannganman nguan.

¹⁶ An `nian, sa nga b'ɔ man e si like nga be flɛ i sran klolɛ'n yɛlɛ kɛ e ti Krist fɛ i wun mannin. E kusu e niaan'm be ti man e fa é wun man.

¹⁷ ?Sɛ sran kun ti anyanbeunfuɛ b'ɔ wun i niaan wie bɔ i sa a mian'n, b'ɔ ti-mɛn i wun nyanman nun'n, nzu yɛ ɔ kle kɛ ɔ klo Nyanmiɛn nin-ɔn?

¹⁸ M mma mun, nán man amun sran klolɛ'n yo amún nuan bui su, nin nuan nun fɛ su, sanngɛ man be wun i sakpa like nga amun yo'n nun.

E wla b'ɔ gua ase Nyanmiɛn nyrun'n

¹⁹ Sɛ e yo sɔ'n, yɛ e ´si kɛ e ti nanwlɛfuɛ-ɔ, yɛ é wla'n ´kwla gua ase Nyanmiɛn nyrun-ɔn.

²⁰ Afin sɛ e klun akunndan'n man e bu e wun fɔ'n, man e si kɛ Nyanmiɛn ti dan tra e klun akunndan'n, yɛ ɔ si sa'n kwlaa-a.

²¹ N sran kpa mun, sɛ e si e klun lɔ kɛ y'a yo-man sa tɛ'n, e wla'n kwla gua ase Nyanmiɛn nyrun.

²² Like kwlaa nga e srɛ i'n, ɔ ´fa man e yɛlɛ kɛ e fɛ i ndɛ'n su, yɛ e yo sa ng'ɔ jɔ i klun'n.

²³ An `nian mmla nga ɔ fa man ye'n yɛ: i waan e `lafi i Wa Jésus-Krist su, yɛ e klo e wun kɛ Krist kan kleli ye kɛ e klo e wun'n sa .

²⁴ Sran ng'ɔ fa Nyanmiɛn ndɛ'n su'n, wuun ɔ nin i b'a kaci sran wunmuan, yɛ ɔ nin i be tran. Sa ti bɔ e si sɔ'n, yɛlɛ i Wawɛ'n b'ɔ fa mannin ye'n.