1 Jean 2 - NYANMIƐN NDƐ'N 1998

Krist ti e ti ndɛ kanfuɛ

¹ M mma mun, kɛ ɔ ko yo nan amu'an yo-man sa tɛ'n ti, n ´klɛ ndɛ nga blɛ amun. Sanngɛ sɛ sran wie yo sa tɛ'n, e lɛ é ti ndɛ kanfuɛ, ɔ o e Si Nyanmiɛn wun lɔ, yɛlɛ Jésus-Krist b'ɔ ti sran kpa'n.

² Afin i bɔbɔ fɛ i wun yili é ti tɛ nan Nyanmiɛn yaci sa nga e yoli i'n cɛ ye. Nán e ngunmin é ti tɛ yɛ ɔ yili-ɔ, sran'm be kwlaa be liɛ-ɔ.

³ Sɛ e fa Nyanmiɛn ndɛ'n su'n, i sɔ'n nun yɛ e ´si kɛ e si i sakpa-a.

⁴ Sran ng'ɔ se kɛ ɔ si i sanngɛ ɔ fɛ-mɛn i ndɛ'n su'n, ɔ ti atofuɛ yɛ ɔ di-man nanwlɛ mlɔnmlɔn.

⁵ Sanngɛ sran ng'ɔ fa i ndɛ'n su'n, i sɔfuɛ'n yɛ ɔ klo i kpa sakpa-a. Sa nga e ´yo nan y'a si weiin kɛ e nin i y'a yo kun'n yɛ:

⁶ sran ng'ɔ se kɛ ɔ nin i b'a yo kun'n, man ɔ yo sa nga Jésus yoli be'n wie.

Mmla uflɛ

⁷ N sran kpa mun, nán mmla uflɛ yɛ n ´klɛ blɛ amun-ɔn, sanngɛ mmla laa liɛ kunngba nga be fa mannin amun i bo bolɛ nun nin-ɔn. Mmla laa sɔ'n yɛlɛ ndɛ nga an tili'n .

⁸ Sanngɛ ɔ nin i sɔ'n ngba'n, ɔ ti kɛ mmla uflɛ yɛ n su fa man amun sa, yɛ kɛ be wun Krist bɔ be wun amun'n, be wun kɛ mmla sɔ'n ti nanwlɛ. Afin aliɛ'n su cɛn, ɔ'a cɛn weiin bɔbɔ.

⁹ Sran ng'ɔ se kɛ ɔ o weiin'n nun bɔ sanngɛ ɔ tɛ kpɔ i niaan'n, wuun ɔ tɛ o aosin'n nun.

¹⁰ Sanngɛ sran ng'ɔ klo i niaan'n, wuun ɔ o weiin'n nun, ɔ yo-man sa ng'ɔ saci i niaan wie ti nun'n.

¹¹ Sanngɛ sran ng'ɔ kpɔ i niaan'n, ɔ o aosin'n nun, ɔ man kɛ ɔ ´nanti'n, ɔ si-man lika ng'ɔ kɔ'n, afin ɔ ti kɛ anyansifuɛ sa.

¹² M mma mun, n ´klɛ fluwa nga m ´blɛ amun yɛlɛ kɛ Krist ti, Nyanmiɛn a yaci sa nga an yoli i'n ɔ'a cɛ amun.

¹³ N si mun, n ´klɛ fluwa nga m blɛ amun yɛlɛ kɛ an si sran ng'ɔ o lɛ i bo bolɛ nun'n. Gbanflɛn mun, n ´klɛ fluwa nga m blɛ amun yɛlɛ kɛ an kwlali Klunwifuɛ'n.

¹⁴ Ba kanngan mun, n ´klɛ fluwa nga m ´blɛ amun yɛlɛ kɛ an si e Si'n. N si mun, n ´klɛ fluwa sɔ'n m blɛ amun yɛlɛ kɛ an si sran ng'ɔ o lɛ i bo bolɛ nun'n. Gbanflɛn mun, n ´klɛ fluwa sɔ'n m ´blɛ amun yɛlɛ kɛ an jran kekle, an fa Nyanmiɛn ndɛ'n su, yɛ an kwlali Klunwifuɛ'n.

¹⁵ Nán an klo mɛn dilɛ'n, nán an klo ninnge nga be o mɛn'n nun'n. Sran ng'ɔ klo mɛn dilɛ'n, wuun ɔ klo-man e Si'n.

¹⁶ Like nga be yo be mɛn'n nun'n i kwlaa'n: bé nyin b'ɔ blo ninnge'm bé su'n, nin akunndan nga be bu fa gua ninnge nga be wun be'n bé su'n, ɔ nin be wun tulɛ'n, i kwlaa sɔ'n i wie fi fin-man e Si'n, sanngɛ be ti mɛn'n nun nzuɛn.

¹⁷ Mɛn'n nin i nun ninnge kwlaa bɔ sran nyin blo su'n, be ´wie, sanngɛ sran ng'ɔ yo Nyanmiɛn klun sa'n, ɔ ´ka lɛ tititi.

Krist i kpɔfuɛ'n

¹⁸ Ba kanngan mun, y'a ju mɛn'n i bue nuan. An tili i kɛ Krist i Kpɔfuɛ'n ɔ ´ba. Krist i kpɔfuɛ kpanngban b'a ba, ɔ man e si kɛ y'a ju mɛn'n i bue nuan.

¹⁹ Sran sɔ mun'n, kɛ bɔ be ti-man e fuɛ sakpa'n, i sɔ'n ti yɛ be yaci ye ɔli nin-ɔn. Sɛ be ti e fuɛ'n, wuun be kali e wun wa. Sanngɛ be yili bé wun sɔ nan sran'm be si weiin kɛ be nun wie fi ti-man e fuɛ.

²⁰ Amun liɛ'n, Nyanmiɛn fɛ i Wawɛ'n mannin amun, ɔ man amun kwlaa an wun sa wlɛ.

²¹ Nán kɛ an si-man ndɛ nanwlɛ'n ti yɛ n klɛ fluwa sɔ'n m blɛ amun-ɔn, sanngɛ i silɛ bɔ an si i'n ti-ɔ, yɛ an si kɛ ato'n nin nanwlɛ'n be san-man nun.

²² ?Wan yɛ ɔ ti atofuɛ nin-ɔn? ?Nán sran nga i waan Jésus ti-man Krist nin-ɔn? Sran sɔ'n yɛ ɔ ti Krist i kpɔfuɛ nin-ɔn, afin ɔ bu-man e Si'n nin i Wa'n be like fi.

²³ Sran ng'ɔ sɔ-man Nyanmiɛn Wa'n nun'n, wuun ɔ'a sɔ-mɛn i bɔbɔ nun. Sran ng'ɔ sɔ i nun'n, wuun ɔ'a sɔ i Si'n nun.

²⁴ I sɔ'n ti, ndɛ nga kɛ ɔ fin i bo bolɛ nun'n an tili'n, an `fa sie amun klun kpa. Sɛ ɔ tran amun klun kpa'n, wuun amun nin e Si'n nin i Wa'n an ti kun tititi.

²⁵ An `nian, like nga Krist waan ɔ ´fa man ye'n yɛlɛ anannganman nguan'n.

²⁶ Be nga be klo kɛ be ´laka amun'n, bé wun ndɛ yɛ n klɛ blɛli amun-ɔn.

²⁷ Amun liɛ'n, Krist fɛ i Wawɛ'n mannin amun. Kɛ i Wawɛ sɔ'n nin amun tɛ o lɛ'n, an bo-man wɛ kunndɛ-man sran kɛ ɔ kle amun like. Afin ɔ kle amun like'n kwlaa, like ng'ɔ kle amun'n ti nanwlɛ, ɔ ti-man ato. I sɔ'n ti, amun nin i `tran titi kɛ ɔ kan kleli amun'n sa.

²⁸ M mma mun, amun nin i `tran titi nan cɛn nga ɔ ´ba'n, bɔ ɔ ´yi i wun nglo'n é wla'n ɔ'a gua ase nan b'a kan-man e bo, yɛ y'a wun-man nyannzuɛn.

²⁹ An si kɛ Krist ti sran kpa, i sɔ'n ti, sran kwlaa ng'ɔ yo sa ng'ɔ ti i nuan su'n, ɔ ti Nyanmiɛn wa.