1 Jean 1 - NYANMIƐN NDƐ'N 1998

Nguan'n i wun ndɛ

¹ Nguan Ndɛ b'ɔ o lɛ anannganman'n i ndɛ yɛ e ´klɛ blɛ amun yɛ nin-ɔn. E tili, e bɔbɔ e wunnin i nin e nyinma, e niɛnnin i, e kɛnnin i.

² Kɛ i bɔ be flɛ i Nguan'n ɔ yili i wun nglo'n, e wunnin i, ɔ man e kɛn i ndɛ, yɛ i bɔ be flɛ i Anannganman Nguan sɔ'n, b'ɔ wo e Si'n i wun lɔ'n, b'ɔ yi i wun nglo kleli ye'n, e kɛn i ndɛ kle amun.

³ Nga bɔ e wunnin i'n, bɔ e tili'n, e kan kle amun kusu, nan e nin amun e di anuansɛ kunngba nga e nin e Si'n nin i Wa Jésus-Krist e di'n wie.

⁴ E ´klɛ i sɔ nan e klun jɔ kpa.

Nyanmiɛn ti nyannyannyan

⁵ Ndɛ nga i Wa'n kan kleli ye'n, bɔ e ´kan kle amun'n yɛ: «Nyanmiɛn ti nyannyannyan, aosin'n kwla mɛntɛn-mɛn i mlɔnmlɔn.»

⁶ Sɛ e se kɛ e nin i e di anuansɛ sanngɛ e yo sa kɛ e tɛ o aosin'n nun sa'n, wuun e su bua ato e di-man nanwlɛ.

⁷ Sɛ sa nga e yo'n e yo i weinwein kɛ i bɔbɔ yo sa weinwein sa'n, e nin amun di anuansɛ, yɛ i Wa Jésus i mmoja'n man é wun sa tɛ kwlaa ´wie.

⁸ Sɛ e se kɛ sa tɛ nun-man é wun'n, wuun e su laka e wun, e di-man nanwlɛ.

⁹ Sanngɛ sɛ e di sa tɛ nga e yoli'n i nanwlɛ kle Nyanmiɛn'n, e kwla fa é wla'n guɛ i su, afin ɔ yo sa i nuan su, ɔ ´yaci cɛ ye, yɛ ɔ man é wun sa'n kwlaa ´wie.

¹⁰ Sɛ e se kɛ y'a yo-man sa tɛ'n, wuun e bu i atofuɛ yɛ e fɛ-mɛn i ndɛ'n su.