2 ቆሮንቶሳ 12 - አማቶ ኦኡሱብጳዉሎሳ ካዴሮ ራጋ 1 ማምሲና ዳታኖ ላኦ ጎዋታንተና፥ ዳታኖ ጎዶትሰ ጎታኮ ካአታዬሮ ራጋና ሙቴኑን ዳይናራ። 2 ጌሲ ቶሞንኮ አፋርኮ ሆረነ ዳሩሪ ታሴድ ታ ጌሮን ካአታመሮ እባዶት ኮ ክርስቶሳ ካሶዋ፥ ካአታመራና ሶነ ዎታ ሌረ ሶ ካሊ ሌረ አን ላካሶ፤ ዋ አደ ካሶዋ። 3 ሂክ እባዶት ሶነ ዎታ ሌረ ሶ ካሊ ሌረ አን ላካሶ፥ ዋ አደ ካሶዋ፤ 4 ኡሱ ጋናተ ቶስ አታማኖ፥ ሃፉራ ካእባዶይ ሙቲና እባዶ አዬስን ካዳንዴኖን አየስ ማለ። 5 ሂካ ኣንክክ እባዶትን ዳታራ፥ እስኦቴዉን አደ ላፉማቴዉን ኳሬ ላኮዳታሮ። 6 ሀያ፥ አን ሩም ማንኮአዬሳሮ ማራን ዳይን ጎዶትሰ ጎዋ ላኮልናሮ፤ አየሱን ጎአመን ማዮና እን ጉት ካደያሮኮና እንኮ ካማላሮ ሄዳኖኮ ካሮረ ጎጎስሳሞኮ አመረ ዳታናኮ እስ ቁሳታራ። 7 ሂካ ኢን ካሙተሮ አየስ ካጂንኮ ካከይ ጎጎኮርኖኮ ሶኦቴ ኤኤን ኣን ካኤግራ አቦሳ ኢን ስሳመ። 8 ሂክ እን ካአቦስሳራ አየስ እንኮ ጎጎቡይሮ ጎታ ሴድ ጋለ ኤባየ። 9 አየሱን ጎአመን ኡሱ “ሁናክ ካአዴሳመ ሊ ካኮሙትናራ ላፉማታይ ማንኮሌ ማራን ስኖት ኩን ሌተታ” አመ፤ ሃንሱን ሁና ካክርስቶሳ እዬ ጉት ጎጎሌሮ ማመኮና ሮርሳየ ላፉማቴይ ገጌላታ ዳታራ። 10 ሁና አን ካኮሄላታራ ላፋ ካኮላሮ ጎራታ ማንኮሌ ማራን ክርስቶሳ ማራን ጎሀሮ፥ ጎሀባራምሮ፥ ጎራካሮ፥ ጎሆሮራምሮ፥ ጎያድሮ እን ገጌላይሳራ። ጳዉሎሳ ካቆሮንቶሳ እባዶን ያዳኖ 11 ጎዋ አን አዬሰ! ሀያ፥ ሃ ጎጎአዬስሮ ካየልቴታን እስንታን፤ እን ጋላቲን ኦዶትሳተን እስንቴን፤ አን አዮናትክ ካአዴሳሞን እባዶት ጎሌና አደ ካጂንጂ ኦአማሜራን ኦፋራሜራንኮ ማመስና አን ላኮየራታሮ። 12 አን ካሩም ካፋራመሮ ላኖ ካአጋልስሳራ አየስ አን እስን ኦሮ ግራን ኦብሲ ኦፈላሬንያን፤ ህክንሳ ማላታልና ካሳድስሮ አየስ ባሳጆልያን። 13 እስኑን ጉት ስዳነ ሀሌኖን ሄሳኖ ኳሬ ካካለ ካሞጋን ምን ካዋይ ካካለኮ እስን አን ካኮየራሰራ መይያ? ህክና ባስ አን ጎቶታመ ሻጋ የላ። 14 እስኒ ቶስ ኤመይን ጎኤካሳየኮ ሂክ ካሴድያ፤ አን ስዳነ እስኑን ሊን ላኮዶታሮ፤ አን ካዶታራ እስን ኳሬ ማራጋደክስን ላኮዮ። ይስክስኑን ዱሩማ ኩኩይሳይን ካዶትሳራ ኦኡሙለራንያን ኳሬ ይስ ኦኡሙለራዉን ላኮኩኩይሳሮ። 15 አን አደ እስን ማራን ማራጋደኬ እስኦቴና ሮርሳይ ጎስሳየ ኣሎ አን ገጌላታራ፤ ሀያ፥ አን ሂካማሌ ኣሎ እስን ጎጌላሮ እስን እን ካኮጌላታን ሂካማሌ አባራንቲያ? 16 ሀሌዎ ኳሬ አን እስኑን ስዳነ ላኮሌሮ፤ አየሱን ጎአመን አን እስን ምጌይና ሶባኖይ ካአበሮ ኣን ላራ። 17 አን እስኑን ካፋረሮ እባዶኮ ኮይና አን ላኦ ቤራ? 18 ቲቶ እስን ቶስ ጎጎኤሜሮን አን ኤባየራ፤ ሀሱ አብካን ኡሱነ ዎታ ፋረራ፤ ሀያ፥ ቲቶ እሶ ላኦ ቤረ? አንና ኡሱና እስኑን ካሀንዳይነነ አያና ኮይ ላኮየያ? ሰሴታንታን ቶ ላኮተያ? 19 እስን ዱባና ግዳግን ካቆፓታን ኖ እስን ሆረ እስኦታን እስጉኮ ካትራታኖ አን የልቴዴንያ? ኖ ክርስቶሳይ ሌነኔ ካአዬሳና ዋይ ሆሬያ፤ አን ኦጌላታሮኦቴ! ኖ ሂካ ካኮንአዬሳና እስን ቢስን አምነነያ። 20 አን ሀሴራ ካኮኤሜየ ጎራታ ዎዳሳ እስን ሊን ካዶትሳሮ አን ሀሌኖን ግራን፥ አንና እስን ጎጎዶታታን አን ሀሌኖን ግራን ካኤሰልኖ ሌዉና አመረ አብሳታራ፤ ኡሱማሌ እስን ዶሌ ኤንገ፥ ቃናተ፥ ኢኦ፥ እስ ጌላታኖ፥ መገ ካእባዶ ባሳኖ፥ ህማታኖ፥ ኮራኖና ሻላጎ ግሮዋ አመረ አብሳታራ። 21 አባባይ እስን ቶስ ጎኤሜየ ሄዶክ ዎዳሳ እስን ሆረ እን የራስሮዋ አመረ አብሳታራ፤ ሂታኮ ሆረነ ካሞጋን ጩቦ ፈለረ፤ ሂካ ካፈሌራን ባትናት፥ ሻርሙጡማ፥ ላአ ግራኖ፥ ጉላ ጋሎን ካግሮ እባዶ ጋዳ ኢሮዋ አመረ አን አብሳታራ። |