Yaannisa 1 - Ammato O?usub

Haafura kagiri

¹ Horaarjje haafura gire, haafurana Waa dollee gire, haafurana Waayye.

² Usuna horaarjje Waanneta gire.

³ Kameen dubbana usu tonsse met't'aame, kamet't'aamero dubbakkona usu kallayii kamet't'taamera koonna laagiro.

⁴ Neefo usuu gitte, hitti neefona ibaaddoon ifatte.

⁵ Ifana mugudii hank'k'aara, mugudnna lakkoɂawodaro.

⁶ Waakko kafaramera Yaannisa kaɂamamare ibaaddoti koo gire.

⁷ Ibaaddo dubba atonnatikkeessa maalire garakkeessane goggoɂammaniroon, ifa maraan ato liin emeete.

⁸ Ifa maraan ato liin emeetera kuwaarre usu ussun ifa lakkoye.

⁹ Ibaaddo dubbaan ifa kasisaro kalleera karrummii ifa alami tos emeetaa gire.

¹⁰ Usu alami orroo gire, alami kakkomet't'aamera usuu golleenna, alami ade usu lakkoɂaddeesere.

¹¹ Kakkeessa kalleero tos emeete. Fallikkeessana ade usu lakkoɂatatero.

¹² Halleewo kuwaarre oɂatateeraawunna megekkeessaa oɂammanaran dubbaawun ade ere kawaa takkoleeran feɂi sisera.

¹³ Isona Waakko umulameenan kuwaarre, taɂiige goorttun tasooye feɂi goorttun tababbaar feɂikko lakkoɂumulameraan.

¹⁴ Haafurana ibaaddo lee; sinonna rummii ammagame noo orroo baree. Aabbokkeessa dollekko kaɂemeetero, ere kookkotti kabajja noo deenne.

¹⁵ Yaannisana, «Inkko haarre kaɂemeetara inkko horeene mankkogire maraan inkko roorara ame ani kakkoonɂatotaare hikkanunya» amaa iyyee usu maraan atotee.

¹⁶ Sinottessa ammagamanokko kakkeeyi no dubbana sinoo gutii sino atannenna.

¹⁷ Waa seera gara kamusene sisere, sinona rummina adde gara kayesuusa Kiristoosane emeete.

¹⁸ Suurewana Waa kaddeera maayyona laagiro, ayesuun goɂameen Waa Odo dollee kagire ere koo kalleera Hedo usu noon addeesise.

Kat'ammak'aare Yaannisakokki atonnati

¹⁹ Ayihuudina, «Ati ayyotta?» ami goggohoosarawun tuuk'aamolnna woyyuul Iyyerusaalemikko usu tos kakkofaraneen, goorata Yaannisa kasisera atonnati hikkaye.

²⁰ Atotaanokkona haar lakkogale; «Ani Kiristoosa lakkoyo» ame addeesise atotee.

²¹ Isona, «Hayya ati ayyotta? Eelaasatta?» ameen hoosaten. Usuna, «Lakkoyo» ame. Isona, «Hayya kahegerootta?» ameen. Usuna, «Lakkoyo» ame abbaabe.

²² Isona; «Hayya ati ayyotta? Ati kafarttette ibaaddoon abbaab noo goggosinssoo isi oottaawun mematta?» ameen.

²³ Yaannisana kahegeroo Isiyaasaa goggosegameroo, «Goottawun raa ‹Ekkaasa amaa k'alullattokki ulii taɂiyyaatte yaaye aniyya› » ame abbaabe.

²⁴ Farasaawilkko ofarameeranna,

²⁵ Haanna ameen; «Hayya Kiristoosa goorttun Eelaasa goorttun kahegeroo golleenon muun t'ammak'aatta?» ameen hoosaten.

²⁶ Yaannisana, «Ani bekee t'ammak'aara, isin kakkasoonna ade isin orroo aalleera ame abbaabe.

²⁷ Inkko danbbenne kaɂemeetara, ani keferro oottessakokki shaano furin kakkodaaddeennoon usuya.»

²⁸ Hikki dubba kalleera Yaannisa t'ammak'aa takkogire Yorddaanoskko, gamaa tabittaaniya katamaayiyye.

Idaado kawaa

²⁹ Yaannisa tallami arri, Yesuusa usu tos kaɂemeetaro deere haa ame, «Hikkima! Alamikokki c'ubbo kabbaasara idaado kawaa,

³⁰ ‹Inkko haarre kaɂemeetara inkko horeene mankkogire maraan inkko roorara› ani isinuun kaɂamare usuya.

³¹ Ani metekkeewun lakkomalabere, bekee t'ammak'aa kaɂemeeyerana usu Isiraɂeel orroo goggomutiroonya» ame.

³² Esekkona Yaannisa, «Ayyaana arabe aani daruurkko dagere usu gutii hamas's'aa giraan dee.

³³ Ani metekkeewun lakkomalabere ayesuun goɂameen bekee goggot'ammak'iroo kafarerana, ‹Ayyaana K'ulluukki kat'ammak'aara, Ayyaana dagaanna usu gutii hamas's'aa kamutara usuya› ame.

³⁴ Aninna hikka deera, usu Ere kawaa laano atotinara» ame atonnati sise.

Ohoraarjjee Yesuusakko oɂagaalssatareen

³⁵ Tallami arri Yaannisa Yesuusakko oɂagaalssatareen lamane wota ese banɂee aallee gire,

³⁶ Yaannisa Yesuusa esene rooraa giraan deere, «Hikkima idaado kawaa!» ame.

³⁷ Lama Yaannisakko oɂagaalssatareenna Yaannisa hikka ayeesaa giraan maaleeren Yesuusa debee sesseeten.

³⁸ Yesuusana kamabbal amere usuu debee osesseetaran deere, «Me dootaattan?» ame hoosate. Isona, «Rabbi, haggee gitta?» Ameen, [«Rabbi» amano kaɂagaalssisaro amanoya.]

³⁹ Usuna, «Koyeen diyaa» ame. «Haanssun seeterene usu mankkogiro deen,» eserrina usu wota hayeen, arriikkona saatii tomonkki goorata lee gire.

⁴⁰ Yaannisa kaɂayeesero maaleen; Yesuusa debee osesseetaren lamakko koo kasimoona P'et'iroosakokki abbi Indiraasa gire.

⁴¹ Indiraasa horaarjje abbikkeessa Simoona helere, «Noo mesihi helannenna» ame, [«Mesihi» amano Kiristoosa amanoya.]

⁴² Yesuusa tonssa keene. Yesuusana deegure, «Ati kayoona ere Simoonatta, kefa amami uumaminatta» ame, «Kefa» amanona P'et'iroosa goorttun «eɂemo» amanoya.

Yesuusa Filp'oosana Naatinaɂeeli goggoɂuumero

⁴³ Tallami arri, Yesuusa Galiila tos seeyin goosate, Filp'oosana helere, «Indebee sesseena» ame.

⁴⁴ Filp'oosana Indiraasa P'et'iroosa aani kabeetesayida katamaakokki ibaaddotiyye.

⁴⁵ Filp'oosa Naatinaɂeeli helere, «Musena kaseera mas'aafayi, kahegeroolnna usu maraan kakkoons'aafeeren kayoosefa ere kanaazireti Yesuusa helannenna» ame.

⁴⁶ Naatinaɂeelina, «Naaziretikko kaɂidankki ayees helamin daanddaara?» ame. Filp'oosana, «Emeedde deena» ame.

⁴⁷ Yesuusana Naatinaɂeeli usu tos kaɂemeetaro deere, «Hikkima, meellane kallayikki karrummii Isiraɂeeltti» amaa gara keessa ayeese.

⁴⁸ Naatinaɂeelina «Ati in misii addeesse?» ame Yesuusa hoosate. Yesuusana, «Ati gaa kabalasi hegelii giraan, ganaa Filp'oosa ku haɂuumoon giraan ani ku deera» ame abbaabe.

⁴⁹ Naatinaɂeelina abbaabere, «Kaɂagaalssisatto! Ati ere kawaatta, ati kaɂisiraɂeel wonotta» ame.

⁵⁰ Yesuusana, «Ati Kaɂammanttetta, kabalasi gaa hegelii ani ku deera mankko amero maraanya? Ganaa hikkakko karoore ayees ati deeta» ame.

⁵¹ Adena, «Ani rumminaa rumminaa amara, daruur bananttedde, erggichcha kawaa Ere kaɂibaaddo gutii korataanna dagaa giraan dinnattaan» ame.