Ibirawwii 8 - Ammato O?usub

Yesuusa ammato oɂusubkokki katuuk'aamol woyichcha laano

¹ Goortta no kaɂayeesinanno ayeeskko kahoree ayees hikkaya; daruurii kaɂatii kawaakkokki korffinjjeeyi mina tamerggee kahamas'eero hikka aankkikki katuuk'aamol woyichcha no abnna.

² Usu kakkohanddaara tarummi dunkkaanii talleetetto k'ulluukki min kawaayiyya; hikka minkokki madaaramano gene taɂibaaddoyi alleenon giraan Goottayiyya.

³ Metemeteeyi tuuk'aamolkokki woyichcha kakkoshuumamara mebaanna jaarsso Waawun sisiinya; haannuun hikki tuuk'aamo kasisinara kooko koo girin dootisara.

⁴ Seerakokki malee meebaa kasisara tuuk'aamol mankkogiro maraan usu ulii kagiro lii girewa tuuk'aamo lii lakkogirare;

⁵ Hikki tuuk'aamol takkohanddaraan dunkkaanii daruurii tagittowun masuussana hoos taalaaltta; hikkina kakkonlleera Waa Musene ati min kakkomadaaratto goorata, «Wodamii gutii ani kuun goggotuserokki malee kameen dubba isiɂoora feli» ame goggoɂajajeerokki maleeya.

⁶ Gidda ade Yesuusa Waayinna ibaaddonna t'eɂe tabe hiɂi too kayelero kaɂammatoo haafura oddoɂan ammatokko taroorttettona taɂidantti abddi gutii kat'aabbatero mankkolleero maraan usumaleenna usuun osisameeraan felo dubbaankko orooraraanyyan.

⁷ Ohoree ammato ohaafura otuffamoon lii gireenwa kallami kaɂammatoo haafura lakkodootisare.

⁸ Waa gosa gutii otuffamiraan felo girano tusin amere haa amara, «Ani kaɂisiraɂeel gosanenna kayihuuda gosane wota Ammato oɂusubkokki haafura kakkotabinnara goorata emeeyinnara amara Goottaa.»

⁹ Hinɂi ammato ani iso kagibs's'i ulkko genettisoo abere kakkobeesare goorata odojjolaalkkisoone wota otabere ammato aanɂinɂi lakkoyyan; isona hinɂa ammato ohaafurayi ataatana mankkowaateen maraan aninna isokko bagagole, amara Goottaa.

¹⁰ «Goortta ani hittakko abbaabayire kaɂisraɂeel gosane wota ani otabinnara ohaafura ammato hinɂayaan amara Goottaa; Ani seerakkee sammuutisini kayinnara; Wodanattisooyinna s'aafinara; Waakkisoonna linnara, Isona gosakkee linnaraan ame.

¹¹ ‹Goottaa addeesi› ami ollaatteessanna leere Abbikkeessa maayyona kaɂagaalssisiro lakkodootisaro. Kic'c'arkko haggaɂabere taa ibaaddo kajiinjjiin geeroo dubbana In addeesirowa;

¹² Baaskkisoonna haheso aminara; C'ubbokkisoonna hittakko horenbbaan lakkoshaadinaro.»

¹³ Goorttanun «Usubnɂi ammato ohaafura» goɂamiro ohaafura ammato ohoree laɂo osisoon yelera amanoya; haannuun felaa kagirena kaddoɂan kooko dubba kakkobayinnara goorata gabbalamera.