Ibirawwii 1 - Ammato O?usub

Waa Erekkeessakokki garane ayeesano

¹ Horkkooskko kayere Waa raa kamoogganinna goorata kamoogganii gara kahegeroolnne odojoolkkaanuun ayeesere;

² gidda goɂameen kagachchoo geesii kameen dubba goggoɂeelloon kayelero erekkeessakokki garane noon ayeesera; alami dubba kakkomet't'eera usuuya.

³ Usu kabaja tawaa hank'k'ayise katusaroya; yadaliitteessana Waanne wota taɂekkaattotta, haafurakokki hunnaayi alami dubba isikkise abera, ibaaddo c'ubbokko k'ullooyise abbaabatere daruurii kaɂatii Waakotti merggee hamas's'ee.

Ere kawaa erggichchalkko karooraro laano

⁴ Usuun kabeera mege kaɂerggichcha megekko karooraro mankkollee maraan, ere kawaa erggichchakko aaloo karooraroya.

⁵ Waa duuddo erggichchaal orroo, «Ati erekkeetta, ani ku hittaari umulera» goorttun «Ani odo leerowa, usuna erekkee linnara» kakkoonɂamere maayyona laagire.

⁶ Waa barkki erekkeessa alami tos kakkofarare goorata, «Erggichcha kawaa dubba usuun hasagade» amera.

⁷ Erggichchakokki gara, «Erggichchaalnna ambbal aani, ohandaaranna lac'a kaɂeleenee aani yelinnara» amara.

⁸ Erekkeessakokki gara ade; «Hedo! Korffinjekka jiruu jiroommakko taa jiruujiroomma geeroon girnnara; wononatikkaanna rummii bariisatta;

⁹ Ati k'ullumma geelatta; meellaneenna diidatta; Hikkakkotti aalanttii Waa Hedokka ku assaabate; Saatilaalttaakko roorise geggeloo tasisatto zayitii kuun shigide» amara.

¹⁰ Usumaleenna, Goottakkee! «Ati horaarjje ul met't'iite; Daruurjjolnna genettaayi met't'iite;

¹¹ Iso dubba bayinnaraan; Ati adde girnnatta; Iso dubba sarssi aani doɂayinnaran.

¹² Gashe aaninna ati duubinnatta; Isona sarssi kaddoɂan sarssi kaɂusubii goggoɂiggilssamaro malee iggilissaminaran. Ati arggetto atitta, Geeskkaawun gachcho laagitto» amara.

¹³ Waa erggichchaal orroo; «Diinakkaa odonnatikkaa hegelii taa yellooyi Merggetteeyi hamas's'ii» kakkoonɂamera maayyona laagiro.

¹⁴ Erggichchaal dubba Waa ammani kafayyinnaro ibaaddon handdayin ofaramaraan Waawun ohandaaran ayyaanalyyaan.