Taytəs 3 - Vengo (Babungo)

Faŋ bàw vɨɨ Kristo kɨ zɔnə vɨɨ mbɨə faŋ vəŋ sɔꞌ vəŋ

¹ Lumə tɨ́ vɨɨ laa ŋkə bàw vəŋ fee vɨɨ mbɨə faŋ vəŋ sɔꞌ vəŋ, zɔnə vəŋ, baa yɨsə vənu vəjəəvə vənshə.

² Kɨ vəŋ kɨ ndasə vɨɨ me, kee kəə nsɔꞌ me, yɨsə vənu vənshə maa jɨɨ yijəə, duꞌ bwaŋnə ghɔ vɨ vɨɨ vənshə.

Faŋ Nwi nə bwèysə nsiŋ

³ Maa yighee vɨsɨ, nsiŋ nɨzi nə bə̀ə tɔ ley, kee zɔnə Nwi me, toꞌ maa jɨɨ yibwə, baa lùu vəbuꞌ tɨ́ vənu vəbwəvə vəyaŋ faŋ fwi saŋ-nsiŋ nə kàw, toꞌ yitoꞌ nyaa-nsiŋ nə njyoꞌ yibwə, baa ghɨꞌ vɨɨ, vɨɨ bee nsiŋ, nsiŋ baa beenə yiŋwaa nyaa-nsiŋ nɨzi.

⁴ Luu nə, nə luu maa yighee njyə faŋ Nwi, wuu məbweysə ŋwaa-nsiŋ, nə də̀ njyoꞌ yijəə yi nə ŋkawnə yi tɨ́ nsiŋ, ŋwə bweysə nsiŋ fɨ ghɔ jɨɨ yibwə yɔ́.

⁵ Faŋ ŋwə nə bweysə nsiŋ nɨniŋ nə, kee bweysə nsiŋ buꞌ vəfaꞌ vəjəəvə faŋ nsiŋ nə yɨsə me. Ŋwə bwèysə nsiŋ luu sheꞌ buꞌ gəŋ si, faŋ ŋwə nə sɔ nu bwə fɨ maa nsiŋ, bì nsiŋ fi. Zwitə Ley Nwi ŋii taa fwisə nsiŋ, kɔ nsiŋ nə nshinə yifi.

⁶ Ŋwə nə fə̀ Zwitə Ley ki taa fwisə nsiŋ kəyaŋ buꞌ Yeso Kristo, wuu məbweysə ŋwaa-nsiŋ.

⁷ Ŋwə nə yɨsə nɨniŋ tɨ́ kaꞌ vənu vaŋ-nsiŋ lùu vəloomə sɨ Nwi, buꞌ faŋ Kristo kee gəŋ saŋ-nsiŋ, gaŋtə nsiŋ nə. Ŋwə baa bweysə nsiŋ laa nsiŋ kɨ kɨꞌ məbwey vəlwaŋ faŋ nsiŋ ndɔ zɨ, buꞌ faŋ nsiŋ lùu vaŋ vi nə.

Faŋ bàw Taytəs kɨ tɨsə vɨɨ məbuulə nu Nwi nə wutə

⁸ Yigi yɔ́ lùu nu yinsəŋ. Mə kəə laa a gi vənu vɔ́ ŋkee nə wutə, laa vɨɨ mbɨə faŋ vəŋ nùŋ fwisə vəŋ maa Nwi, tə̀ sɨ maa məyɨsə vənu vəjəəvə. Kɨ luu vəŋ yɨ̀ nɨniŋ, buu luu ŋkee nu jəə. Ŋkə baa gàŋtə vɨɨ nɨzi.

⁹ Nyɨŋ fɨ maa yigisə vəmfaw nə nu yikuu yidənə, nə ntaysə nə nywaŋsə kɔ̀ŋ nuŋsə; vənu vɔ́ kee gaŋtə wə nə nu me, lùu vənu vədayday.

¹⁰ Wə mɔ́ꞌ lùu shɔ faŋ ŋwə yaa kɨ jwi nə ŋgaasə taa ŋwaa vɨɨ Nwi, a tɨ ŋwə yighee muꞌ, tɨꞌnə me ghee bɔɔ. Ŋwə kee zɔ me, a fəŋ ŋwə.

¹¹ A kɔꞌ kɨɨ laa kəŋ wə ghɔ́ ndì jɨɨ, mbɨꞌtə yi kee baa yiley me. Vənu vəbwəvə vi dəsə laa ŋwə lùu wuu bwə, faŋ kwàŋ ŋwə kwàŋ tɔ ki taa nsɔꞌ Nwi.

Faŋ Pɔɔl nə tɨ̀ Taytəs nə vaŋ-vənu vəmɔ́ꞌ, baa kɔ̀ shɔꞌtə tɨ́ ŋwə

¹² Yighee njyə faŋ mə ndɔ tɔŋ Artimas, ŋwə ziꞌ yɨ ghɔ, tɨꞌnə me Tikikɔs, a yasə ndɔ fɨ nsi, jwì yè mə shɨ Nikopolis. Mbɨꞌtə nyaa lùu laa mə taa duꞌ yifi maa yighee gwə.

¹³ Yɨ jəə maa məkɔ vətɔ və yitoꞌ tɨ́ Zenas, wuu məkɨɨ nə ntɨsə wì, nə Apɔlɔs, laa tuu wee-fa kee bə̀ə fɨ ghɔ vəŋ me.

¹⁴ Bàw laa vaŋ-nshwi vaŋ-nsiŋ zwetə maa məyɨ vənu vəjəəvə maa vɨɨ faŋ nu mɔ́ꞌ ghɔꞌ vəŋ, laa kɨ məbiŋ vəŋ, faŋ vəŋ nùŋ fwi vəŋ maa Kristo nə, kee gù nu yɔŋ me.

¹⁵ Vɨɨ vənshə faŋ yia vɨ vəŋ lùu mɔ́ꞌ, shɔꞌtə ghɔ. Shɔꞌtə vɨɨ mbɨə faŋ vəŋ kaw yia, buꞌ nu Kristo, faŋ nsiŋ nùŋ fwi saŋ-nsiŋ maa ŋwə nə, tɨ́ yia. Nwi tu mənɔŋ-bwaŋnə tɔ viŋ vənshə!