Taytəs 2 - Vengo (Babungo)

Ntɨsə tɨ́ vəndɔŋ nə vəki

¹ Gə fɨ maa ghɔ, bàw a naysə nu ŋkɨə faŋ ŋkə kùꞌnə maa nu yinsəŋ Nwi, faŋ nsiŋ deesə nə.

² Tɨsə vəndɔŋ vətaavə laa vəŋ jiatə yiŋwaa vəŋ, toꞌ yuu ŋkə kuꞌnə tɨ́ wuu taa, kɨ yɨsə vənu vənshə nə yitɔfə, nùŋ fwi vəŋ maa Kristo ŋkee maa yinsəŋ, kaw vɨɨ, jia fwisə vəŋ taa ŋɨꞌ.

³ Gə fɨ maa vəki vətaavə, tɨ vəŋ sheꞌ nɨniŋ, laa vəŋ kɨ duꞌ nə nshinə vəŋ yiley vɨsɨ Nwi, kee kɨ bɨsə təzii tə vɨɨ me, kee lùu vəbuꞌ tɨ́ məluꞌ məyaŋmə me, deesə vənu vəjəəvə, faŋ mbə gaŋtə vɨɨ maa məkii fwi yijəə.

⁴ Nɨniŋ laa vaŋ-vəki zwètə maa məduꞌ bwaŋnə, kàw vəndəə vəvəŋ nə vaŋ vəŋ,

⁵ yɨsə vənu vənshə nə yitɔfə, kee toꞌ vəswaŋ me, faꞌ vəfaꞌ taa ndɔꞌ vəŋ nə fwi yijəə, yɨsə vənu vəjəəvə, zɔnə vəndəə vəvəŋ. Nɨniŋ laa kɨ vɨɨ kɨ ndasə nu Nwi buꞌ vəŋ me.

⁶ Gə fɨ maa vəndɔŋ və zawə, tɨ vəŋ laa vəŋ kɨ shiinə yiŋwaa yivəŋ.

⁷ Nuŋsə ŋwaa wə laa a luu mfɨꞌ nu tɨ́ vəŋ maa vənu vənshə, mbə kɨ baw. Deesə sheꞌ nu yinsəŋ tɨ́ vɨɨ, faŋ a deesə nu Nwi tɨ́ vəŋ. Deesə nu Nwi nə fwi yimuꞌ,

⁸ gisə nu faŋ ŋkə lùu kəweꞌ, baa lùu nu yinsəŋ, tɨ́ kaꞌ wə kee lùlə me, tɔ wuu mbeenə ŋwaa-nsiŋ dɨɨ, buꞌ faŋ ŋwə kee yè nu bwə maa məgi tɔ nsiŋ nə me.

⁹ Gə fɨ maa vəbuꞌ, naysə tɨ́ vəŋ laa vəŋ kɨ zɔnə vətɨɨ vəvəŋ maa vənu vənshə, yɨsə vənu faŋ mbə baw too vətɨɨ vəvəŋ, kee lulə vəŋ me,

¹⁰ kee shaw fa fɨ ghɔ vəŋ me, yɨsə vənu vəvəŋ vənshə vəbi. Nɨniŋ, vəŋ gaŋtə nu Nwi, wuu məbweysə ŋwaa-nsiŋ, maa vənu vənshə, laa ŋkə baw tɨ́ vɨɨ.

Faŋ Nwi kee gəŋ saŋ-nsiŋ

¹¹ Nu məkee gəŋsə faŋ Nwi kee gəŋsə vɨɨ nə, fùu taa mbi, kɨ kəə bwèysə vɨɨ vənshə.

¹² Ŋkə də̀ jɨɨ tɨ́ nsiŋ maa məmeꞌ nu mətwey Nwi, meꞌ nu məkaw vətɔ və taa mbi, baa nə laa nsiŋ toꞌ ghuu yitoꞌ kaŋ-nsiŋ taa mbi nyə̀ nə yitɔfə, yɨsə vənu vəloomə, fee Nwi.

¹³ Nsiŋ kɨ kɨꞌ nu mənɔŋ-bwaŋnə Nwi, faŋ ŋwə ndɔ kɔ məbwey vəlwaŋ tɨ́ nsiŋ, baa kɨꞌ yighee njyə faŋ feenə Nwi, faŋ luu ŋkee Nwi kwalə nə, ndɔ fuu ghɔ Yeso Kristo, wuu məbweysə ŋwaa-nsiŋ,

¹⁴ faŋ ŋwə nə kɔ̀ ŋwaa wi, kù tɔ nsiŋ, fùusə nsiŋ fɨ taa vənu vəbwəvə vaŋ-nsiŋ vənshə, laa nsiŋ kɨ nii lùu vɨɨ ley, baa lùu ŋkee mbii vɨɨ, kəə sheꞌ maa məyɨ vənu vəjəəvə.

¹⁵ Kɨ gisə vənu vɔ́ tɨ́ vɨɨ, tɨsə vəŋ shɔ, ŋaꞌsə sɨ vəŋ buꞌ vənu vəbwəvə vəŋ, yɨsə nɨniŋ nə wutə kə kənshə. Kɨ wə shia ghɔ me.