Taytəs 1 - Vengo (Babungo)

Shɔꞌtə Pɔɔl tɨ́ Taytəs

¹ Lùu mə, Pɔɔl, wuu faꞌ Nwi, faŋ mə nyɔ̀ꞌ ŋwaꞌlə ŋwə̀ tɨ́ ghɔ, Taytəs. Mə lùu wuu ntɔŋ Yeso Kristo, faŋ mə fɨꞌtə nu Nwi tɨ́ vɨɨ mbɨə faŋ Nwi nə shòꞌ maa mbii vɨɨ nə, laa vəŋ nuŋ fwisə vəŋ maa Kristo, baa kɨ̀ɨ nə nu yinsəŋ Nwi, faŋ ŋkə yɨsə vɨɨ bəŋsə Nwi.

² Mə faꞌ faꞌ ghɔ́ buꞌ laa mə kɨꞌ məbwey vəlwaŋ faŋ ŋwə gòꞌsə yighee muꞌ. Nshɨ-tɔ Nwi faŋ ŋwə kee yaa kɨ sɨɨ ba me, nə kɔ̀ꞌnə shù fɨshi maa məndɔ kɔ məbwey vəlwaŋ ghɔ́ tɨ́ vɨɨ.

³ Ŋwə nə yɨ̀ laa yigisə yi yɔ́ fuu ntee yikəꞌ vɨɨ maa njii yighee. Yigi yɔ́ lùu ntɔŋ yijəə Nwi faŋ Nwi, wuu məbweysə ŋwaa-nsiŋ, nə kɔ̀ ghɔ mə, laa mə kɨ fɨꞌtə tɨ́ vɨɨ.

⁴ Mə tɔ̀ŋ ŋwaꞌlə ŋwə̀ tɨ́ ghɔ, Taytəs, faŋ a luu ŋkee ŋwiŋ ŋwaa maa yizii Kristo faŋ nsiŋ nùŋ fwi saŋ-nsiŋ maa ŋwə nə. Tɨta Nwi ghɔ Yeso Kristo, wuu məbweysə ŋwaa-nsiŋ, tu mənɔŋ-bwaŋnə tɔ ghɔ, nə məduꞌ-nyɔŋ.

Faŋ bàw Taytəs shoꞌ vɨɨ faŋ vəŋ kùꞌnə, nùŋ vəŋ maa vɨɨ taa taa nshəŋtə vɨɨ Nwi

⁵ Ŋiꞌ nu ŋkɨə faŋ mə nə mèꞌtə ghɔ shɨ Kriit, lùu laa a bɔŋsə vənu mbɨə faŋ mbə nə gòꞌ nə, nùŋsə vɨɨ taa taa nshəŋtə vɨɨ Nwi ntɨꞌsə ntɨꞌsə, faŋ mə nə gì tɨ́ ghɔ nə.

⁶ Bàw laa wuu taa fɨ taa nshəŋtə vɨɨ Nwi luu wə faŋ tuu kee wee-nsɔꞌ kee lùu maa ŋwə me, zu wi baa luu sheꞌ muꞌ, vaŋ vi bìŋ nu Kristo nɨzi, kee kɨ bɨbuulə me, kee shɨshii me.

⁷ Kee bàw laa wə faŋ lùu tɔ taa nshəŋtə vɨɨ Nwi kii nsɔꞌ maa ŋwə me, fɔnə ŋwə lùu wuu məndeynə vətɔ və Nwi. Kɨ ŋwə yɨsə vənu nə wutə ki me, kee kìi fwi yishəsə me, kee nu məluꞌ mbə shɔɔ sɨ ŋwə me, kee nywenə nywaŋsə me, kee kəə ka ŋkuŋ me.

⁸ Bàw ŋwə bee kii kàw maa məfisə vəndɔ taa ŋii ŋwə, kàw vənu vəjəəvə, yɨsə vənu vənshə nə yitɔfə, yɨ vənu vəloomə, baa lùu wuu ley vɨsɨ Nwi, kɨɨ maa məshiinə ŋwaa wi,

⁹ jia sheꞌ nu yinsəŋ Nwi faŋ vɨ nə dèesə tɨ́ ŋwə nə, tɨ́ kaꞌ ŋwə baa kùꞌnə maa mətɨsə vɨɨ nə nu yinsəŋ Nwi, kɨ̀ɨ maa məkɨ ŋaꞌsə sɨ vɨɨ faŋ ghɔ vɨ vəŋ shɔɔnə nə yigi.

Faŋ bàw Taytəs fəŋ yigisə vɨɨ məbuulə nu Nwi

¹⁰ Vɨɨ vəyaŋ shɔ faŋ vəŋ ndì wutə, gisə yigisə dayday, buulə yitɔ yi vɨɨ. Vɨɨ mbɨə faŋ vəŋ bɨ shɔ̀ɔ taa ŋwaa vəŋ, lùu mbɨə faŋ vəŋ fùu fɨ taa ŋwaa vɨɨ mbɨə faŋ vɨ nə sɨ̀ɨtə vəŋ nə.

¹¹ Bàw vɨ kɨ fəŋ vəŋ, buꞌ laa vəŋ kiasə ŋkee yishuu yindɔꞌ yi vɨɨ, nyə gu, buꞌ faŋ vəŋ fɨꞌtə vənu faŋ mbə kee yikuꞌnə me. Vəŋ yɨ̀ nɨniŋ sheꞌ maa məkəə ka, faŋ lùu nu tɔ dɨɨ.

¹² Maa wuu shɨ vəŋ mɔ́ꞌ, faŋ nə luu nshiiŋii-sɔghɔ, nə gi ŋkee nu yinsəŋ laa, «Vɨɨ Kriit sɨɨ təba ghee nshə. Vəŋ lùu yaa nyaasə bwəsə, lùu vɨɨ məbəə ŋay, baa lùu vəwaŋ-mfii-ndaa.»

¹³ Yigi yɔ́ luu ŋkee yinsəŋ. Nɨniŋ, bàw a kɨ gi tɨ́ vəŋ ŋkee nə wutə, laa vəŋ kɨ duꞌ nə nu ŋkɨə faŋ vəŋ nùŋ fwisə vəŋ shɔ maa Kristo,

¹⁴ kee nùŋ tɔ vəŋ maa mətiitii mə vɨɨ Jus me, tɨꞌnə me maa nuŋsə vəŋ me, faŋ luu sheꞌ nuŋsə vɨɨ faŋ vəŋ mèꞌ nu yinsəŋ.

¹⁵ Vənu vənshə ley tɨ́ vɨɨ mbɨə faŋ fwisə vəŋ lèy. Luu nə, tuu ŋkee nu kəmuꞌ kee lèy tɨ́ vɨɨ mbɨə faŋ fwisə vəŋ kee lùu səley me, baa nə tɨ́ vɨɨ mbɨə faŋ vəŋ kee nùŋ fwisə vəŋ maa Kristo me. Vənu mbɨə faŋ kəŋ vɨɨ vɔ́ bɨꞌtə nə, bɨ. Fwisə vəŋ bɨ nɨzi.

¹⁶ Vəŋ gisə laa vəŋ kɨ̀ɨ nə Nwi. Luu nə, vəŋ twey ŋwə fɨ taa nshinə vəŋ. Vəŋ luu ŋkee vɨɨ bwənə, kee zɨzɔnə Nwi me, kee bee kùꞌnə maa məyɨ tuu nu jəə kəmuꞌ me.